ໜ້າຫຼັກ >> ເພື່ອສຸຂະພາບ >> ຄຳມ່ວນ ຍຶດ ແລະ ທຳລາຍສິນຄ້າໝົດອາຍຸ
ຄຳມ່ວນ ຍຶດ ແລະ ທຳລາຍສິນຄ້າໝົດອາຍຸ
ວັນທີ 29 ພຶດສະພາ 2013 - ເວລາ 11:37:02 ເບິ່ງ 3719 ຄຳເຫັນ 510

​ເພື່ອ​ເຮັດ​ໃຫ້​ຜູ້​ບໍລິ​ໂພ​ກມີ​ຄວາມ​ປອດ​ໄພ ​ແລະ ຜູ້​ປະກອບ​ການ​ໃຫ້​ຫັນ​ເຂົ້າ​ສູ່​ລະບຽບ, ມີ​ຄວາມ​ຮັບຜິດຊອບ​ສູງ​ຕໍ່ຜະ​ລິດ​ຕະພັນ​ຂອງ​ຕົນ ​ເປັນ​ຕົ້ນ​ແມ່ນ​ອາຫານ​ທີ່ໝົດອາຍຸ ​ແລະ ​ເຄື່ອງ​ຕ້ອງ​ຫ້າມ​ຈຳນວນໜຶ່ງ.

      ​ພະ​ແນ​ກສາທາລະນະ​ສຸກ ກໍ່ຄື​ຂະ​ແໜງອາຫານ ​ແລະ ຢາ ຮ່ວມ​ກັບ ຂະ​ແໜງການ​ຄ້າ​ພາຍ​ໃນ ພະ​ແນ​ກອຸດສາຫະກຳ ​ແລ​ະ ການ​ຄ້າ ປະຈຳ​ແຂວງ​ຄຳ​ມ່ວນ ​ໄດ້​ຈັດ​ພິທີຈູດ​ທຳລາຍອາຫານ ​ແລະ ​ເຄື່ອງ​ດື່​ມທີ່ໝົດອາຍຸ ​​ໃນ​ວັນ​ທີ 28 ພຶດສະພາ 2013 ຢູ່​ທີ່​ພະ​ແນ​ກສາທາລະນະ​ສຸກ ​ແຂວງ​ຄຳ​ມ່ວນ ​ໂດຍ​ມີ​ທ່ານ ດຣ ນ. ພາ​ສຸກ ຄຳ​ມະນີ​ທອງ ຮອງ​ຫົວໜ້າພະ​ແນ​ກສາ​ທາລະນະ​ສຸກ​ແຂວງ, ທ່ານ ດຣ ສະຫວ່າງ ລັດຕະນະ​ວົງ ຫົວໜ້າຂະ​ແໜງອາຫານ ​ແລະ ຢາ, ທ່ານ ພິລາ​ວົງ ອິນ​ທະ​ວົງ ຫົວໜ້າຂະ​ແໜງການ​ຄ້າ​ພາຍ​ໃນ​ແຂວງ, ມີ​ພະນັກງານ-ວິຊາ​ການ​ທີ່​ກ່ຽວຂ້ອງ​ເຂົ້າ​ຮ່ວມ.

      ທ່ານ ດຣ ສະຫວ່າງ ລັດຕະນະ​ວົງ ກ່າວ​ວ່າ: ຂະ​ແໜງອາຫານ ​ແລະ ຢາໄດ້​ສົມທົບ​ກັບ​ພະ​ແນກ ອຸດສາຫະກຳ ​ແລະ ການ​ຄ້າ​ແຂວງ ​ໄດ້​ລົງ​​ເຄື່ອນ​ໄຫວ​​ກວດກາ​ຕົວ​ຈິງ ​ເຊິ່ງ​ເລີ້ມ​ປະຕິບັດມາ​ແຕ່​ວັນ​ທີ 18-29 ມີນາ 2013 ຕາມ​ບໍລິສັດ​ນຳ​ເຂົ້າ, ຮ້ານ​ມິນິ​ມາກ ຕາມ​ທ້ອງ​ຕະຫຼາດ ​ແລະ ຮ້ານ​ຄ້າ​ຍ່ອຍ​ໃນ​ເທດສະບານ​ເມືອງ​ທ່າ​ແຂກ ເຊິ່ງກວດກາ​ໄດ້​ທັງໝົດ 22 ຮ້ານ ​ໄດ້​ພົບ​ເຫັນ ​ແລະ ຍຶດສິນຄ້າ​ທີ່ໝົດອາຍຸ ​ແລະ ​ເຄື່ອງ​ສຳອາງ​ທີ່​ຕ້ອງ​ຫ້າມ ນ້ຳໜັກລວມທັງໝົດ 197,2 ກິ​ໂລ ລວມ​ເປັນ​ມູນ​ຄ່າ​ທັງໝົດ 4.817.000 ກີບ ​ໃນ​ນັ້ນ​ປະ​ເພດ​ອາຫານ ​ແລະ ​ເຄື່ອງ​ດື່ມ ມີ 67 ລາຍການ, ນ້ຳໜັກ 188,2 ກິ​ໂລ  ມູນ​ຄ່າ 3.113.000 ກີບ ​ແລະ ​ເຄື່ອງ​ສຳອາງ​ທີ່​ຕ້ອງ​ຫ້າມ 24 ລາຍການ, ນ້ຳໜັກ 9 ກິ​ໂລ ມູນ​ຄ່າ 1.704.000 ກີບ ສຳລັບ​ການ​ທຳລາຍ​ແມ່ນ ດ້ວຍ​ການ​ຈູດ​ເຜົາ​ຖິ້ມ ຢູ່​ທີ່​ກອງ​ຂີ້​ເຫຍື້ອ​ແຂວງ.

ທ່ານຫົວໜ້າຂະ​ແໜງອາຫານ ​ແລະ ຢາ ກ່າວ​ຕື່ມ​ວ່າ: ສິນຄ້າ​ທີ່ໝົດອາຍຸ​ທີ່​ພົບ​ເຫັນ​ສ່ວນ​ໃຫຍ່​ແມ່ນ​ນຳ​ເຂົ້າ​ໂດຍ​ບໍ່​ໄດ້​ຜ່ານ​ບໍລິສັດ​ນຳ​ເຂົ້າ​ທີ່​ຖືກຕ້ອງ, ນຳ​ເຂົ້າ​ຍ່ອຍ ​ແລະ ບໍ່​ໄດ້​ຮັບ​ການ​ກວດກາ​ທາງ​ດ້ານ​ເອກະສານ ​ແລະ ສິນຄ້າ​ຕົວ​ຈິງ, ຜູ້​ປະກອບ​ການ​ຄ້າຂາຍ​ຍັງ​ບໍ່ທັນ​ຮູ້​ເຖິງຜົນ​ສະທ້ອນ​ຂອງ​ການໝົດອາຍຸ ຫຼື​ເສຍ​ຄຸນ​ຂອງ​ອາຫານ ​ແລະ ​ທ່ານ​ຍັງ​ໄດ້​ຮຽກຮ້ອງມາ​ຍັງ​ບໍລິສັດ, ຫ້າງ​ຮ້ານ ຕະຫຼອດ​ເຖິງ​ພໍ່​ແມ່​ປະຊາຊົນ​ທີ່​ປະກອບ​ການ​ຄ້າຂາຍ​ທົ່ວ​ໄປ ຕ້ອງ​ໄດ້​ຮັບ​ຮູ້​ເຖິງ​ຜົນ​ສະທ້ອນຂອງ​ຜູ້​ບໍລິ​ໂພ​ກ​ໃນ​ການ​ນຳ​ໃຊ້​​ສິນຄ້າ​ທີ່ໝົດອາຍຸ ບໍ່​ແມ່ນ​ວ່າ​ຂາຍ​ສິນຄ້າຫວັງ​ແຕ່​ຜົນ​ກຳ​ໄລ​ພຽງຢ່າງ​ດຽວ ​ຄວນ​ຄຳນຶງ​ເຖິງຜົນ​ກະທົບ​ທີ່​ຈະ​ຕາມ​ມາ ​ເພື່ອ​ຮັບປະກັນຄວາມ​ປອດ​ໄພ​ໃຫ້​ແກ່ຜູ້​ບໍລິ​​ໂພ​ກ ​ແລະ ການ​ປະກອບ​ທຸລະ​ກິດທີ່​ຖືກຕ້ອງ​ຕາມ​ລະບຽບກົດໝາຍ.

ຂ່າວ: ກອງຄຳ

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?