ໜ້າຫຼັກ >> ວຽກງານ 3 ສ້າງ >> ຄຳມ່ວນ ສຸມໃສ່ການຜະລິດເຂົ້າທີ່ດີ ມີຄຸນນະພາບສູງ
ຄຳມ່ວນ ສຸມໃສ່ການຜະລິດເຂົ້າທີ່ດີ ມີຄຸນນະພາບສູງ
ວັນທີ 17 ພຶດສະພາ 2013 - ເວລາ 11:24:31 ເບິ່ງ 2804 ຄຳເຫັນ 5

 

ເພື່ອເຮັດໃຫ້ການຜະລິດຂອງຊາວກະສິກອນມີສະຖຽນລະພາບສູງ, ຮັບປະກັນທາງດ້ານສະມັດຕະພາບ, ຄຸນນະພາບ ແລະ ປະລິມານໃນການຜະລິດເຂົ້າ ໃນວັນທີ 15-16 ພຶດສະພາ 2013 ພະແນກກະສິກຳ ແລະ ປ່າໄມ້ ປະຈຳແຂວງຄຳມ່ວນ ເຊິ່ງນຳໂດຍທ່ານ ຄຳສອນ ອ້ວນທະວີ ຫົວໜ້າພະແນກດັ່ງກ່າວ ພ້ອມດ້ວຍຄະນະ ໄດ້ນຳເອົາແນວພັນເຂົ້າປູກມາມອບ ໃຫ້ແກ່ປະຊາຊົນ 3 ບ້ານຄື: ບ້ານທົ່ງຂາມ ເມືອງບົວລະພາ, ບ້ານປາກເປັ່ງ ເມືອງທ່າແຂກ ແລະ ບ້ານປົ້ງກິ່ວເມືອງໜອງບົກ ແຂວງຄຳມ່ວນ ເຊິ່ງທັງສາມບ້ານແມ່ນນອນຢູ່ໃນບ້ານທີ່ເຮັດທົດລອງ 3 ສ້າງຂອງແຂວງ ເຊິ່ງແນວພັນທີ່ນຳມາມອບໃນຄັ້ງນີ້ແມ່ນ ແນວພັນທ່າດອກຄຳ 8 ເປັນແນວພັນ ປັບປຸງໃໝ່ ທີ່ສູນກະສິກຳບ້ານນາພອກ ເມືອງເຊບັ້ງໄຟ ແຂວງຄຳມ່ວນ. ສາມາດປັບຕົວໄດ້ກວ້າງ, ປູກໄດ້ທັງນາແຊງ ແລະ ນາປີ, ເໝາະສົມໃນເຂດນາໂຄກ-ນາໂນນ ແລະ ນາທົ່ງ, ມີຄວາມທົນທານ ຕໍ່ກັບສັດຕູພືດຕ່າງໆເປັນຕົ້ນແມ່ນພະຍາດຂອບໃບແຫ້ງ, ດ້ວງກໍ, ພະຍາດແມງບົ່ວ ແລະ ອື່ນໆ ເປັນແນວພັນທີ່ໃຫ້ຜົນຜະລິດສູງ, ລຳຕົ້ນແຂງແຮງ, ທົນທານຕໍ່ການລົ້ມໄດ້ດີ. ຈຳນວນແນວພັນເຂົ້າປູກທີ່ນຳມາມອບແມ່ນ 1 ໂຕ່ນຕໍ່ບ້ານ ລວມທັງໝົດ 3 ໂຕ່ນ ໃນຈຳນວນ 3 ບ້ານ ຄິດເປັນມູນຄ່າ 15 ລ້ານກີບ. ທັງນີ້ກໍ່ເພື່ອແນໃສ່ເຮັດໃຫ້ການຜະລິດ ຂອງພໍ່ແມ່ປະຊາຊົນໃຫ້ມີຜົນຜະລິດທີ່ສູງ, ມີຄຸນນະພາບດີ ເປັນທີ່ຍອມຮັບຂອງຊາວນາ ແລະ ຜູ້ບໍລິໂພກ ທັງເປັນການຊຸກຍູ້, ສົ່ງເສີມການປູກເຂົ້າຂອງປະຊາຊົນ ໃຫ້ມີທ່າຂະຫຍາຍຕົວເພີ້ມຂຶ້ນໂດຍ ການຫັນປ່ຽນ ການນຳໃຊ້ເຕັກນິກໃໝ່ ແລະ ເປັນການປຸກລະດົມໃຫ້ ພໍ່ແມ່ປະຊາຊົນໄດ້ທົດລອງປູກແນວພັນເຂົ້າທີ່ປັບ ປຸງໃໝ່. 

ຊື່ຜູ້ຂຽນ: Dengsavath SENPHANITH - IP: 183.182.118.xxx

ຕອບຄຳຄິດເຫັນຂອງຜູ້ອ່ານ

 

       ນະ​ໂຍບາຍ 3 ສ້າງ​ແມ່ນ​ການ​ນຳ​ເອົາ​ແນວທາງ​ນະ​ໂຍບາຍ​ຂອງ​ພັກ,ລະບຽບ​ກົດໝາຍ​ຂອງ​ລັດ ​ແລະ ​ແຜນ​ພັດທະນາ​ເສດຖະກິດ - ສັງຄົມ​ຂອງ​ລັດຖະບານ​ລົງ​ສູ່ຊີວິດ​ຕົວ​ຈິງ​ຂອງ​ປະຊາຊົນ​ລາວ​ບັນດາ​ເຜົ່າ​ເພື່ອ​​ເຮັດໃຫ້​ປະຊາຊົນ​ສາມາດ​ເພິ່ງ​ພາ​ຕົນ​ເອງ​ໄດ້​ໃນ​ອານາ​ຄົດ​ ເວົ້າ​ງ່າຍໆ​ກໍ່​ຄື​ເປົ້າ​ໝາຍ​ບຸກທະລຸ​ຂອງລັດຖະ ບານ​ເພື່ອ​ແນ​ໃສ່​ລຸດຜ່ອນ​ຄວາມທຸກ​ຍາກ​ຂອງ​ປະຊາຊົນ​ໃນ​ກົນ​ໄກ​ຫັນ​ໄປ​ສູ່​ເສດຖະກິດ​ຕະຫຼາດ ​. ສະ​ເພາະ ຢູ່ແຂວງ​ຄໍ​າມ່ວນຂອງ​ພວກ​ເຮົາ​ປະ ກອບ​ມີ 6 ບ້ານທີ່​ນອນ​ຢູ່​ໃນ 3 ຕົວ​ເມືອງ​ຄື : ​ເມືອງ​ທ່າ​ແຂກ​ມີ​ບ້ານ​ປາກ​ເປັ່ງ,ບ້ານ​ທ່າ​ແຂກ​ກາງ , ​ເມືອງ​ໜອງ​ບົກ​ມີ​ບ້ານ​ດອນ​ຂຽວ​ເໜືອ,ບ້ານ​ປົ່ງ​ກິ່ວ ​ແລະ ​ເມືອງ​ບົວລະພາ​ມີ​ບ້ານ​ຈະ​ແລດ , ບ້ານ​ຕະຫຼອງ .

      ສ່ວນ​ຄຳ​ເຫັນ​ຂອງ​ທ່ານຜູ້​ອ່ານ​ທີ່​ຖາມ​ວ່າ : ນະໂຍບາຍ 3 ສ້າງແມ່ນຫຍັງ ? ເຮັດເພື່ອໃຜ ? ຍ້ອນຫຍັງ ຈິງເຮັດ ? ແມ່ນໃຜໄດ້ປະໂຫຍດ ແລະ ຜົນໄດ້ຮັບຕາມມາມີຄືແນວໃດ ? ການ​ນຳ​ເອົາ​ແນວ​ພັນ​ເຂົ້າ​ລົງ​​ໄປມອບ​ໃຫ້​ປະຊາຊົນມັນ​ຈະ​ໄດ້ຮັບ​ໝາກຜົນ​ສຳ​​ໃດ ? ເປັນຫຍັງບໍ່ນຳເອົາເຕັກນິກວິຊາການດ້ານການຜະ ລິດກະສິກຳລົງໄປເຜີຍແຜ່ໃຫ້ປະຊາຊົນ ?

     3 ສ້າງຄືການສ້າງແຂວງເປັນຫົວໜ່ວຍຍຸດທະສາດ , ສ້າງເມືອງເປັນໜ່ວຍເຂັ້ມແຂງຮູ້ນຳພາຮອບ ດ້ານ ແລະ ສ້າງບ້ານເປັນຫົວໜ່ວຍໃນການພັດທະນາ . ເນື່ອງຈາກວ່າຮາກຖານຂອງການພັດທະນາຂອງ ວຽກງານຕ່າງໆແມ່ນຢູ່ຂັ້ນບ້ານ ດັ່ງນັ້ນຂັ້ນເທິງຈິ່ງໄດ້ນຳເອົາໜ້າວຽກຕ່າງໆລົງໃຫ້ຂັ້ນລຸ່ມ ( ຂັ້ນບ້ານ ) ເປັນຜູ້ຈັດຕັ້ງປະຕິບັດຕົວຈິງ . ຖ້າຫາກຮາກຖານຂັ້ນບ້ານມີຄວາມເຂັ້ມແຂງ ຂັ້ນເທິງກໍ່ມີຄວາມເຂັ້ມແຂງ  ແລະ ມີສະຖຽນລະພາບເຊັ່ນກັນ .

       ຂ້າພະເຈົ້າຂໍມີຄຳເຫັນວ່າ : ໃນການນຳເອົາແນວພັນເຂົ້າລົງ​​ໄປມອບ​ໃຫ້​ປະຊາຊົນນັ້ນ ແນ່ນອນພະ ນັກງານວິຊາການທີ່ກ່ຽວຂ້ອງເພິ່ນຕ້ອງໄດ້ແນະນຳພໍ່ແມ່ປະຊາຊົນ ແຕ່ເນື່ອງຈາກປະຊາຊົນລາວບັນ ດາເຜົ່າເຄີຍມີບົດຮຽນ ແລະ ມີມູນເຊື້ອໃນການປູກຝັງຢູ່ບວກກັບການເອົາໃຈໃສ່ຊີ້ນຳຂອງຂະແໜງການ ທີ່ກ່ຽວຂ້ອງ . ໃນການເຮັດວຽກງານ 3 ສ້າງນີ້ບໍ່ສະເພາະແຕ່ຂົງເຂດກະສິກຳຂົງເຂດອື່ນໆກໍ່ໄດ້ນຳເອົາ ວຽກໃນຂົງເຂດຕົນເອງຮັບຜິດຊອບລົງໄປຈັດຕັ້ງປະຕິບັດເຊັ່ນດຽວກັນ .

          ໃນນາມບັນນາທິການຂ້າພະເຈົ້າຂໍສະແດງຄວາມຂອບໃຈຢ່າງຈິງໃຈມາຍັງທ່ານຜູ້ອ່ານທຸກໆທ່ານ ທີ່ໄດ້ສົ່ງແງ່ຄວາມຄິດເຫັນໃນມູມມອງຕ່າງໆ ສົ່ງມາຫາທີມງານຂອງພວກເຮົາເພື່ອທີ່ພວກເຮົາຈະໄດ້ນຳ ເອົາຄວາມຄິດເຫັນດັ່ງກ່າວມາປັບປຸງວຽກງານໃຫ້ດີຂຶ້ນໃນໂອກາດຕໍ່ໄປ . 

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?