ໜ້າຫຼັກ >> ຂ່າວໜ້າໜຶ່ງ >> ໂຄງການສູນການຄ້າ ແລະ ບໍລິການ ໃນເຂດເສດຖະກິດສະພິເສດທ່າແຂກ ຈະເລີ່ມລົງມືກໍ່ສ້າງໃນໄວໆນີ້
ໂຄງການສູນການຄ້າ ແລະ ບໍລິການ ໃນເຂດເສດຖະກິດສະພິເສດທ່າແຂກ ຈະເລີ່ມລົງມືກໍ່ສ້າງໃນໄວໆນີ້
ວັນທີ 18 ເມສາ 2017 - ເວລາ 10:42:32 ເບິ່ງ 41 ຄຳເຫັນ 0

​ໂຄງການ​ກໍ່ສ້າງພັດທະນາ​ເຂດ​ເສດຖະກິດ​ສະ​ເພາະ ທ່າ​ແຂກ ​ແມ່ນໜຶ່ງ​ໃນ​ບັນດາ​ໂຄງການ​ບູລິ​ມະ​ສິດ​ຂອງ​ແຂວງ​ຄຳ​ມ່ວນ ທີ່​ມີ​ເປົ້າໝາຍ​ເລັ່ງ​ໃສ່​ພັດທະນາ​ທີ່​ດິນ​ໃນ​ຂອບ​ເຂດ​ຫົວ​ຂົວ​ມິດຕະພາບ​ລາວ-​ໄທ ​ແຫ່ງ​ທີ 3 ​ແຂວງ​ຄຳ​ມ່ວນ-ນະຄອນ​ພະນົມ ມີ​ເນື້ອ​ທີ່​ຕອນ​ດິນ​​ເພື່ອ​ພັດທະນາ​ທັງໝົດ 1.035 ​ເຮັກຕາ ​ໃຫ້​ກາຍ​ເປັນ​ເຂດ​ເສດຖະກິດ​ພິ​ເສດ ​​ເພື່ອ​ພັດທະນາ​ໃຫ້​​ເປັນ​ຕົວ​ເມືອງ​ໃໝ່ທີ່​ທັນ​ສະ​ໄໝ, ​ເປັນ​ບ່ອນ​ດຶງ​ດູດ​ການ​ລົງທຶນ​ພາຍ​ໃນ ​ແລະ ຕ່າງປະ​ເທດ, ມີ​ນະ​ໂຍບາຍ​ສົ່ງ​ເສີມ​ພິ​ເສດ, ມີ​ລະບົບ​ເສດຖະກິດ-ການ​ເງິນ, ​ເປັນ​ຫົວໜ່ວຍບໍລິການສັງຄົມ​ກວ້າງ, ມີ​ລະບົບ​ຮັບປະກັນ​ຄວາມ​ສະຫງົບ​ປອດ​ໄພ ​ແລະ ປົກ​ປັກ​ຮັກສາ​ສິ່ງ​ແວດ​ລ້ອມ​ໃຫ້​ຍືນ​ຍົງ.

          ບໍລິສັດ​ອາຄະ​ເນ​ພັດທະນາ​ລາວ ​ເອສອີ​ແຊັດ (SEZ)ຈໍາກັດ ກໍ່​ເປັນໜຶ່ງ​ໃນ​ບັນດາ 21 ​ບໍລິສັດທີ່​ໄດ້​ລົງ​ທຶນ​ໃນ​ເຂດ​ດັ່ງກ່າວ ​ເຊິ່ງບໍລິສັດ​ໄດ້​ຮັບ​ການ​ສຳ​ປະທານ​ເນື້ອ​ທີ່​ດິນ​ຈຳນວນ 7 ​ເຮັກຕາ, ມີ​ອາຍຸ​ສຳ​ປະທານ 75 ປີ, ມີ​ແຜນການ​ລົງທຶນ​ທັງໝົດ 5 ຕື້​ໂດ​ລາ​ສະຫະລັດ ​ໂດຍ​ມີ​ຈຸດປະສົງ​ເພື່ອ​ການ​ລົງທຶນ​ພັດທະນາ​ໃນ​ຕອນ​ດິນ​ດັ່ງກ່າວ​​ໃຫ້ກາຍ​ເປັນ​ເຂດ​ການ​ຄ້າ ​ແລະ ບໍລິການ ​ເຊິ່ງປະກອບ​ດ້ວຍ​ຕຶກ​ສະ​ຖາ​ບັນ​ການ​ເງິນ 65 ຊັ້ນ ຈຳນວນ 1 ຫຼັງ, ​ໂຮງ​ແຮມ​ລະດັບ 5 ດາວ ສູງ 40 ຊັ້ນ, ລະດັບ 4 ດາວ ສູງ 35 ຊັ້ນ, ຫ້າງ​ຊັບ​ພະ​ສິນຄ້າ, ຊັ້ນ​ໃຕ້​ດິນ, ​ໂຄງ​ລ່າງ​ພື້ນຖານ, ສວນສາທາລະນະ ​ແລະ ​ໂຄງ​ສ້າງ​ອື່ນໆ ​ໂດຍ​ແບ່ງ​ອອກ​​ເປັນ 3 ​ໂຊນ​ຄື ​ໂຊນ A, B ​ແລະ C ​ໃນ​ນີ້​ໂຊນ A ບໍລິສັດ​ອາຄະ​ເນ​ພັດທະນາ​ລາວ​ໄດ້​ລົງ​ນາມ​ເຊັນ​ສັນຍາ​ກັບ​ບໍລິສັດ Hubei Haoyi Construction Group Co.Ltd ສປ ຈີນ ​ໃນ​ວັນ​ທີ 29 ຕຸລາ 2016 ຜ່ານ​ມາ​ທີ່​ນະຄອນຫຼວງວຽງຈັນ ມີ​ມູນ​ຄ່າ 200 ລ້ານ​ໂດ​ລາ​ສະຫະລັດ ​ໃນ​ໄລຍະ​ເວລາ​ການກໍ່ສ້າງ 3 ປີ.

          ສຳລັບ​ພິທີ​ເຊັນ​ບົດ​ບັນທຶກ​ການ​ຕົກລົງ MOA ​ເພື່ອ​ລົງທຶນ​ຮັບ​ເໝົາກໍ່ສ້າງ​ໂຊນ B ​ແລະ C ​ແມ່ນ​ໄດ້​ມີ​ຂຶ້ນ​ໃນ​ວັນ​ທີ 12 ​ເມສາ 2017 ທີ່​ເມືອງ​ທ່າ​ແຂກ ​ແຂວງ​ຄຳ​ມ່ວນ ລະຫວ່າງ​ບໍລິສັດ​ອາຄະ​ເນ​ພັດທະນາ​ລາວ ກັບ​ອີກ 3 ບໍລິສັດ​ຫຸ້ນ​ສ່ວນ​ຄື: ບໍລິສັດ Dau Tu Xay Dung Cong Nghe Modunlar Block Container, ບໍລິສັດ ABT Survey-Desig​n, Construction and Promote Agriculture Co.Ltd ​ແລະ ບໍລິສັດ Phu Hung Tin ​ເຊິ່ງ​ໂຊນ B ປະກອບ​ມີ ຕຶກ​ການ​ເງິນ 65 ຊັ້ນ 1 ຫຼັງ, ​ໂຮງ​ແຮມ 5 ດາວ 1 ຫຼັງ ສູງ 40 ຊັ້ນ, ຊັ້ນ​ໃຕ້​ດິນ, ​ໂຄງ​ລ່າງ​ພື້ນຖານ ​ແລະ ​ໂຄງ​ສ້າງ​ເພີ່ມ​ເຕີມ​ອື່ນໆ ​ເຊິ່ງມີ​ມູນ​ຄ່າ​ສັນຍາ 250 ລ້ານ​ໂດ​ລາ​ສະຫະລັດ, ​ໄລຍະ​ເວລາ​ໃນ​ການກໍ່ສ້າງ​ໃຫ້​ສຳ​ເລັດ 4 ປີ. ສ່ວນ​ໂຊນ C ປະກອບ​ມີ ​ໂຮງ​ແຮມ 4 ດາວ 1 ຫຼັງ ສູງ 35 ຊັ້ນ, ຫ້າງ​ຊັບ​ພະ​ສິນຄ້າ 5 ຊັ້ນ 1 ຫຼັງ, ​ໂຄງ​ລ່າງ​ພື້ນ​ຖານ ​ແລະ ​ໂຄງ​ສ້າງ​ເພີ່ມ​ເຕີມ ມີ​ມູນ​ຄ່າ​ສັນຍາ 120 ລ້ານ​ໂດ​ລາ​ສະຫະລັດ, ​ໄລຍະ​ການກໍ່ສ້າງ 4 ປີ. ​ໂດຍ​ມີ​ທ່ານ ສົມ​ຈິດ ອາ​ລິ​ຍະ​ພາ​ພອນ ປະທານ​ບໍລິສັດ ອາຄະ​ເນ​ພັດທະນາ​ລາວ ຈຳກັດ ​ແລະ ຜູ້ຕາງໜ້າຈາກ 3 ບໍລິສັດ​ຮັບ​ເໝົາກໍ່ສ້າງ, ​ເຊິ່ງ​ເຂົ້າ​ຮ່ວມ​ເປັນ​ສັກຂີ​ພິຍານ​​ໃນ​ຄັ້ງ​ນີ້​ມີ​ທ່ານ ນົງ​ສະຫວັນ ທຳ​ມະ​ວົງ ຮອງ​ປະທານ​ສະພາ​ບໍລິຫານ​ເຂດ​ເສດຖະກິດ​ສະ​ເພາະ​ທ່າ​ແຂກ ​ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ. 

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?