ໜ້າຫຼັກ >> ສຶກສາດີມີປະໂຫຍດ >> ກະຊວງ ສກ ແລກປ່ຽນບົດຮຽນກ່ຽວກັບການຈັດຕັ້ງປະຕິບັດ ໂຄງການສຸຂະພາບດີໃນໂຮງຮຽນໃຫ້ແກ່ພະແນກ ສກ ຂັ້ນແຂວງ
ກະຊວງ ສກ ແລກປ່ຽນບົດຮຽນກ່ຽວກັບການຈັດຕັ້ງປະຕິບັດ ໂຄງການສຸຂະພາບດີໃນໂຮງຮຽນໃຫ້ແກ່ພະແນກ ສກ ຂັ້ນແຂວງ
ວັນທີ 12 ເມສາ 2017 - ເວລາ 11:10:49 ເບິ່ງ 59 ຄຳເຫັນ 0

 

   ​ກະຊວງ​ສຶກສາ​ທິການ ​ແລະ ກິລາ​ໄດ້​ຈັດ​ກອງ​ປະຊຸມ​ແລກປ່ຽນ​ບົດຮຽນ ກ່ຽວ​ກັບ​ການ​ຈັດ​ຕັ້ງ​ປະຕິບັດ​ໂຄງການ​ສຸຂະພາບ​ດີ​ໃນ​ໂຮງຮຽນ​ລະດັບ​ແຂວງ .​​ໂຄງການ​ສຸຂະພາບ​ດີ​ໃນ​ໂຮງຮຽນ​ແມ່ນ​ແນ​ໃສ່​ການ​ເຮັດ​ກິດຈະ​ກໍາ​ລ້າງ​ມື​ໃສ່​ສະບູ​ເປັນ​ກຸ່ມ , ການ​ຖູ ​ແຂ້ວ​ດ້ວຍ​ຢາ​ສີ​ຟັນ​ທີ່​ມີ​ຟຼູອໍ​ລາຍ ​ແລະ ການ​ກິນ​ຢາຂ້າ​ແມ່​ທ້ອງ 2 ຄັ້ງ​ຕໍ່​ປີ . ກອງ​ປະຊຸມ​ດັ່ງກ່າວ​ໄດ້​ຈັດ​ຂຶ້ນ​ໃນ​ລະຫວ່າງ​ວັນ​ທີ 3 – 4 ​ເມສາ 2017 ຜ່ານ​ມາ​ຢູ່​ທີ່​ພະ​ແນ​ກສຶກສາ​ທິການ ​ແລະ ກິລາ​ແຂວງ​ຄໍາ​ມ່ວນ​ໂດຍ​ການ​ເປັນ​ປະທານ​ຂອງ​ທ່ານ ປອ. ມີ​ທອງ ສຸວັນ​ມີ​ໄຊ ຫົວໜ້າ​ກົມ​ອະນຸບານ ​ແລະ ປະຖົມ​ສຶກສາ , ທ່ານ ອາ​ເລັກຊັນ​ເດີ ວິນ​ຊາ ຜູ້​ປະສານ​ງານ​ລະດັບ​ພາກ​ພື້ນ​ໂຄງການ​ສຸຂະພາບ​ດີ​ໃນ​ໂຮງຮຽນ . ນອກ​ນັ້ນ​ຍັງ​ມີ​ບັນດາ​ທ່ານ​ທີ່​ຕາງໜ້າ​ໃຫ້​ແກ່​ອົງການຈີ​ໄອ​ແຊດ GIZ , ອົງການ SEAMEO INNOTECH , ພະ​ແນ​ກສາທາລະນະ​ສຸກ​ແຂວງ​ຄໍາ​ມ່ວນ , ສະມາຄົມ​ເພື່ອ​ຮອຍ​ຍິ້ມ​ເດັກ​ແຫ່ງ​ປະ​ເທດ​ຝຣັ່ງ , ອົງການ​ເວີນ​ວີ​ຊັນ WORLD VISION , ຕາງໜ້າ​ພະ​ແນ​ກສຶກສາ​ ​ແລະ ກິລາ​ຈາກ 6 ​ແຂວງ​ຄື : ບໍລິ​ຄໍາ​ໄຊ , ບໍ່​ແກ້ວ , ຈໍາປາ​ສັກ , ອຸດົມ​ໄຊ , ນະຄອນຫຼວງ​ວຽງ​ຈັນ ​ແລະ ຄໍາ​ມ່ວນ​ເຈົ້າພາບ ພ້ອມ​ກັນ​ນັ້ນ​ຍັງ​ມີ​ຄະນະ​ຜູ້​ແທນ​ຈາກ​ກະຊວງ​ສຶກສາ​ທິການ , ຊາວ​ໜຸ່ມ ​ແລະ ກິລາ​ປະ​ເທດ​ກໍາປູ​ເຈຍ , ພະ​ແນ​ກສຶກສາ​ທິການ , ຊາວ​ໜຸ່ມ ​ແລະ ກິລາ​ແຂວງ​ກໍາ​ປົດ ປ​ະ​ເທດ​ກໍາປູ​ເຈຍ​ເຂົ້າ​ຮ່ວມ​ເຊິ່ງມີ​ເປົ້າ​ໝາຍ​ເພື່ອ​ຖອດ​ຖອນ​ບົດຮຽນ​ໄປ​ຜັນ​ຂະຫຍາຍ​ໂຄງການ​ສຸຂະພາບ​ດີ​ໃນ​ໂຮງຮຽນ​ທີ່​ປະ​ເທດ​ກໍາປູ​ເຈຍ .

      ​ໃນ​ວາລະ​ການ​ດໍາ​ເນີນ​ກອງ​ປະຊຸມ​ເປັນ​ເວລາ 2 ວັນ​ແມ່ນ​ໄດ້​ສຸມ​ໃສ່​ແລກປ່ຽນ​ປະສົບ​ການ ​ແລະ ສິ່ງ​ທ້າ​ທາຍ​ໃນ​ການຈັດ​ຕັ້ງ​ປະຕິບັດ​ໂຄງການ​ສຸຂະພາບ​ດີ​ໃນ​ໂຮງຮຽນ , ພະຍາດ​ທີ່​ເກີດ​ຈາ​ການ​ຂາດ​ການ​ອະນາ​ໄມ​ເຊັ່ນ : ພະຍາດ​ຖອກທ້ອງ , ພະຍາດ​ອັກ​ເສບ​ລະບົບ​ຫາຍ​ໃຈຍັງ​ເປັນ​ສາຍ​ເຫດການ​ຕາຍ​ຫຼັກ​ຂອງ​ເດັກນ້ອຍ​ໃນ ສປປ ລາວ ກໍ່​ຄື​ປະ​ເທດ​ໃນ​ອາຊີ​ຕາ​ເວັນ​ອອກສຽງ​ໃຕ້  , ​ເດັກນ້ອຍ​ໃນ​ຊ່ວງ​ເຂົ້າ​ໂຮງຮຽນ​ຫຼາຍ​ກວ່າ​ເຄິ່ງໜຶ່ງ​ແມ່ນ​ມີ​ແມ່​ກາ​ຝາກ​ໃນ​ລໍາ​ໄສ້ ​ແລະ ສ່ວນ​ໃຫຍ່​ເປັນ​ພະຍາດ​ແຂ້ວ​ແມງ​ເຊິ່ງບໍ່​ໄດ້​ຮັບ​ການ​ປິ່ນປົວ , ນັກຮຽນ​ທີ່​ທໍລະມານ​ກັບ​ຄວາມ​ເຈັບ​ປ່ວຍ​ມັກ​ຂາດ​ໂຮງຮຽນ​ສົ່ງ​ຜົນ​ໃຫ້ການ​ຮຽນ​ອ່ອນ​ເມື່ອ​ທຽບ​ໃສ່​ກັບ​ນັກຮຽນ​ທີ່​ບໍ່​ເປັນ​ພະຍາດ , ສຸຂະພາບ ​ແລະ ຜົນ​ການ​ຮຽນ​ມີ​ການ​ພົວພັນ​ກ່ຽວຂ້ອງ​ເຊິ່ງກັນ ​ແລະ ກັນ .

      ​ໂຄງການ​ສຸຂະພາບ​ດີ​ໃນ​ໂຮງຮຽນ​ແມ່ນ​ຈັດ​ຕັ້ງ​ປະຕິບັດ​ໂດຍ​ອົງການ ຈີ​ໄອ​ແຊດ GIZ , ອົງການ SEAMEO INNOTECH ຢູ່​ໃນ​ປະ​ເທດ​ຟີ​ລິບ​ປິນ , ສປປ ລາວ , ປະ​ເທດ​ກໍາປູ​ເຈຍ ​ແລະ ປະ​ເທດ​ອິນ​ໂດ​ນີ​ເຊຍ . ​ໂຄງການ​ດັ່ງກ່າວ​ໄດ້​ໃຫ້ການ​ຊ່ວຍ​ດ້ານ​ວຽກ​ງານ​ວິຊາ​ການ​ໃຫ້​ແກ່​ກະຊວງ​ສຶກສາ​ທິການ ​ແລະ ກິລາ​ຂອງ ສປປ ລາວ​ນັບ​ແຕ່​ປີ 2011 ​ເປັນ​ຕົ້ນ​ມາ . ​ໂຄງການ​ໄດ້​ເລີ້ມ​ຈັດ​ຕັ້ງ​ປະຕິບັດ​ຢູ່​ໂຮງຮຽນ​ປະຖົມ​ຂອງ​ລັດ​ຈໍານວນ 22 ​ແຫ່ງ ທີ່​ນະຄອນຫຼວງ​ວຽງ​ຈັນ​ນັບ​ແຕ່​ມີ​ການ​ລິ​ເລີ້ມ​ມາ​ເຖິງ​ປະຈຸ​ບັນ ​ໂຄງການ​ໄດ້​ຜັນ​ຂະຫຍາ​ຍອອກ​ເຖິງ 400 ​ໂຮງຮຽນ​ທົ່ວ​ປະ​ເທດ ​ແລະ ​ໄດ້​ສ້າງ​ປະ​ໂຫຍ​ດ​ໃຫ້​ແກ່​ນັກຮຽນ​ເຖິງ 42.000 ນ້ອງ , ​ໂຄງການ​ສຸຂະພາບ​ດີ​ໃນ​ໂຮງຮຽນ​ໄດ້​ມີ​ໂຮງຮຽນ​ແບບຢ່າງ​ຢູ່​ໃນ​ແຕ່ລະ​ແຂວງ​ເພື່ອ​ເປັນ​ຕົວ​ແບບ​ໃຫ້​ແກ່​ບັນດາ​ໂຮງຮຽນ​ພາຍ​ໃນ​ເມືອງ ​ແລະ ​ແຂວງ​ໃນ​ການ​ຮຽນ​ຮູ້ .

     ​ໃນ​ການ​ຖອດ​ຖອນ​ແລກປ່ຽນ​ບົດຮຽນ​ໃນ​ຄັ້ງ​ນີ້​ຜູ້​ເຂົ້າ​ຮ່ວມ​ຍັງ​​​ໄດ້ແບ່ງ​ອອກ​ເປັນ 4 ກຸ່ມ​ເພື່ອລົງ​ຢ້ຽມຢາມ​ໂຮງຮຽນ​ເປົ້າ​ໝາຍ​ຢູ່ 2 ​ເມືອງ​ຂອງ​ແຂວງ​ຄໍາ​ມ່ວນ​ຄື : ​ເມືອງ​ທ່າ​ແຂກ ​ແລະ ​ເມືອງ​ຫີນ​ບູນ ​ໃນ​ນັ້ນ​ປະກອບ​ມີ​ໂຮງຮຽນ​ຈອມ​ທອງ , ​ໂຮງຮຽນ​ລາວ - ຫວຽດນາມ , ​ໂຮງຮຽນ​ຈອມ​ທອງ , ​ໂຮງຮຽນ​ຈອມ​ແຈ້ງ , ​ໂຮງຮຽນ​ໂພນ​ສະໜາມ ​ແລະ ​ໂຮງຮຽນ​ເມືອງ​ຫີນ​ບູນ .

 

                                                                                                                                                                                ຂ່າວ - ພາບ : ​ແດງ​ສະຫວັດ ​ແສນ​ພານິດ . 

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?