ໜ້າຫຼັກ >> ຂ່າວຈາກຕ່າງເມືອງ >> ບ້ານກອງລໍກະກຽມຈັດງານສະຫຼອງປີໃໝ່ລາວ ພສ 2560 ຕິດພັນກັບແຫຼ່ງທ່ອງທ່ຽວຖໍ້າກອງລໍ
ບ້ານກອງລໍກະກຽມຈັດງານສະຫຼອງປີໃໝ່ລາວ ພສ 2560 ຕິດພັນກັບແຫຼ່ງທ່ອງທ່ຽວຖໍ້າກອງລໍ
ວັນທີ 12 ເມສາ 2017 - ເວລາ 11:04:24 ເບິ່ງ 69 ຄຳເຫັນ 0

       

  ຫ້ອງການ ຖວທ ເມືອງຄູນຄໍາ ແຂວງຄໍາມ່ວນຮ່ວມກັບອໍານາດການປົກຄອງບ້ານກອງລໍ ແລະ ຄະນະປະສານງານ ໂຄງການນໍາທ່ຽວແບບປະຊາຊົນມີສ່ວນຮ່ວມໄດ້ຈັດກອງປະຊຸມປຶກສາຫາລືເພື່ອກະກຽມໃຫ້ແກ່ການຈັດງານສະຫຼອງປີໃໝ່ ລາວ ພສ 2560 ຕິດພັນກັບແຫຼ່ງທ່ອງທ່ຽວຖໍ້າກອງລໍຢ່າງເປັນທາງການໃນວັນທີ 6 ເມສາ 2017 ຜ່ານມາຢູ່ທີ່ຫ້ອງການປົກຄອງບ້ານດັ່ງກ່າວໂດຍການເປັນປະທານຂອງທ່ານ ນາງ ວັນນະຄານ ໄຊຍະລາດ ຮອງຫົວໜ້າຫ້ອງການ ຖວທ ເມືອງ , ທ່ານ ສາລີ ທອງສະຫວັນ ນາຍບ້ານໆກອງລໍທັງເປັນປະທານສະມາຄົມການທ່ອງທ່ຽວບ້ານດັ່ງກ່າວ , ມີ​ບັນດາທ່ານ​ໃນ​ຄະນະ​ປະສານ​ງານ​ໂຄງການ , ອົງການ​ຈັດ​ຕັ້ງ​ບ້ານ​ເຂົ້າ​ຮ່ວມ .

        ທ່ານ ສາລີ ທອງ​ສະຫວັນ ນາຍບ້ານໆ​ກອງ​ລໍ​ໄດ້​ຜ່ານ​ຂໍ້​ຕົກລົງ​ການ​ແຕ່ງ​ຕັ້ງ​ຄະນະ​ອະນຸ​ກໍາມະການຮັບຜິດຊອບ​ການ ຈັດ​ງານ​ບຸນປີ​ໃໝ່ . ຈາກ​ນັ້ນ​ທ່ານ ນາງ ວັນນະຄານ ໄຊຍະລາດ ຮອງຫົວໜ້າຫ້ອງການ ຖວທ ເມືອງກໍ່​ໄດ້​ຜ່ານ​ລະບຽບພາຍ​ໃນ​ງານ​ບຸນທັງ​ນີ້​ກໍ່​ເພື່ອ​ເຮັດ​ໃຫ້​ງານດັ່ງກ່າວ​ມີ​ຄວາມປັນ​ລະບຽບ​ຮຽບຮ້ອຍ , ປອດ​ໄພ ​ແລະ ຮັກສາ​ໄດ້​ເຊິ່ງວັດທະນະ​ທໍາ, ຮີດຄອງ​ປະ​ເພນີ​ອັນ​ດີງາມ​ຂອງທ້ອງ​ຖິ່ນພ້ອມ​ທັງ​ເປັນ​​ໂຄສະນາ​ດຶງ​ດູດ​ນັກ​ທ່ອງ​ທ່ຽວ​ພາຍ​ໃນ ​ແລະ ຕ່າງປະ​ເທດ​ເຂົ້າ​ມາ​ທ່ອງ​ທ່ຽວ,ຈັບ​ຈ່າຍຊື້​ຂອງ​ທີ່​ລະນຶກ​ທີ່​ຜະລິດ​ຈາກ​ສີມື​ຂອງ​ປະຊາຊົນ​ພາຍ​ໃນ​ບ້ານ​ໂດຍ​ສະ​ເພາະ​ກໍ່​ແມ່ນ​ສິນຄ້າ​ຫັດຖະ​ກໍາຕະ ຫຼອດ ​ເຖິງ​ເຮືອນ​ພັກ , ຮ້ານ​ອາຫານ , ສົ່ງ​ເສີມ​ໃຫ້​ຜູ້​ປະກອບ​ການ​ມີ​ລາຍ​ໄດ້​ໝູນວຽນ​ຕະຫຼອດ​ປີ​ໂດຍ​ສະ​ເພາະ​ແມ່ນ​ກິດຈະ​ກໍາ​ທີ່​ຕິດ​ພັນ​ກັບ​ການທ່ອງທ່ຽວ . ສໍາລັບ​ການຈັດ​ງານ​​ເທສະ​ການ​ບຸນປີ​ໃໝ່​ລາວຢູ່​ບ້ານ​ກອງ​ລໍ​ແມ່ນ​ຈະ​ໄດ້​ຈັດ​ຂຶ້ນ​ຢ່າງ​ເປັນ​ທາງ​ການ​​ເປັນ​ເວລາ 04 ວັນ​ຄືນັບ​ແຕ່​ວັນ​ທີ 13 – 16 ​ເມສາ 2017 ຖ້າ​ຫາກ​ສະພາບ​ອາກາດ​ເປັນ​ໃຈຄາດ​ວ່າ​ງານ​ດັ່ງກ່າວ​ຈະ​ດຶງ​ດູດ​ນັກ​ທ່ອງ​ທ່ຽວ​ທັງ​ພາຍ​ໃນ ​ແລະ ຕ່າງປະ​ເທດ​​ເຂົ້າ​ທ່ຽວ​ສະຖານ​ທີ່​ທ່ອງ​ທ່ຽວ​ຖ້ຳ​ກອງ​ລໍ​ໄດ້​​ເປັນ​ຢ່າງ​ດີ .

                                                                                                                                                                        ຂ່າວ - ພາບ : ​ແດງ​ສະຫວັດ ​ແສນ​ພານິດ .

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?