ໜ້າຫຼັກ >> ພັດທະນາຊົນນະບົດ >> ລູກຫຼານບ້ານໂພນແລະບ້ານລັງຄັງ ເຂດຈຸດສຸມເມືອງບົວລະພາພູມໃຈທີ່ໄດ້ມີໂຮງຮຽນຫຼັງໃໝ່
ລູກຫຼານບ້ານໂພນແລະບ້ານລັງຄັງ ເຂດຈຸດສຸມເມືອງບົວລະພາພູມໃຈທີ່ໄດ້ມີໂຮງຮຽນຫຼັງໃໝ່
ວັນທີ 14 ພຶດສະພາ 2013 - ເວລາ 15:57:52 ເບິ່ງ 1413 ຄຳເຫັນ 0

 

​ເພື່ອ​ເປັນການ​ຂະຫຍາຍ​ຕາໜ່າງ​ການສຶກສາ​ ໂດຍ​ສະ​ເພາະ​ແມ່ນ​ການ​ຂະຫຍາຍ​ໂອກາດ​ການ​ເຂົ້າຮຽນ​ຂອງ​ເດັກນ້ອຍ​ໃນ​ເກນອາຍຸ​ການ​ເຂົ້າຮຽນຢູ່​ໃນ​ເຂດ​ຫ່າງ​ໄກ​ສອກ​ຫຼີກ​. ໃນ​ວັນ​ທີ 10 ພຶດສະພາ 2013 ຢູ່​ທີ່​​ໂຮງຮຽນ​ອານຸບານ​ບ້ານ​ລັງ​ຄັງ ​ເມືອງ​ບົວລະພາ​ ໄດ້​ຈັດພິທີ​ມອບ-ຮັບ​ໂຮງຮຽນ​ອານຸບານ ບ້ານ​ລັງ​ຄັງ ​ແລະ ​ບ້ານ​ໂພນ​ ເຂດ​ຈຸ​ດສຸມ​ເມືອງ​ບົວລະພາ​ ໂດ​ຍການ​ເຂົ້າຮ່ວມ​ຂອງ​ທ່ານ​ ສີ​ໄຮ ​ແກ້ວ​ໄກ​ຖິ່ນ ຫົວໜ້າ​ພະ​ແນ​ກສຶກສາທິການ ​ແລະ​ ກິລາປະຈຳ​ແຂວງ​ຄຳ​ມ່ວນ, ທ່ານ ດຣ ມີ​ທອງ​ ສຸວັນ​ວິ​ໄຊ ຫົວໜ້າ​ກົມ​ອານຸບານ-ປະ​ຖົມສຶກສາ, ກະ​ຊວງ​ສຶກສາ​ທິການ​ ແລະ​ ກິລາ, ທ່ານ ​ນາງ​ ອີໂລດີ້ ​ໂກ​ລົງ​ຊ໌ ຫົວໜ້າ​ສະມາຄົມ​ຮ້ອຍ​ຍິ້ມ​ເດັກ ​ເຂດ​ໂຣນ-ອານ​ເປີ ປະ​ເທດ​ຝຣັ່ງ, ພ້ອມ​ດ້ວຍ​ບັນດາ​ພາກສ່ວນ​ຕ່າງໆທີ່​ກ່ຽວຂ້ອງ​ເຂົ້າຮ່ວມ.​

​ໂຮງຮຽນ​ອະນຸບານ​ບ້ານ​ໂພນ ​ແລະ​ ບ້ານ​ລັງ​ຄັງ​ແມ່ນ​ໄດ້​ຮັບ​ທຶນຊ່ວຍ​ເຫຼືອລ້າຈາກ​ທາງໂຄງການ​ສະມາຄົມຮອຍ​ຍິ້ມ​ເດັ​ກ ​ເຂດ​ໂຣນ-ອານ​ເປີ ປະ​ເທດ​ຝຣັ່ງ ​ໂຮງຮຽນ​ດັ່ງ​ກ່າວ​ແມ່ນ​ໄດ້​ເລີ້ມກໍ່ສ້າງ​ແຕ່​ເດືອນ ພຶດສະພາ 2012 ມາ​ຮອດ​ປະຈຸ​ບັນ​ແມ່ນ​ສຳ​ເລັດ 100% ​ເຊິ່ງອາຄານ​ຮຽນດັ່ວກ່າວ​ເປັນ​ອາຄານ​ຮຽນຊັ້ນດຽວ, ມີ​ຂະໜາດ​ລວງຍາວ 40 ​ແມັດ, ກວ້າງ 8 ​ແມັດ, ປະກອບ​ມີ 4 ຫ້ອງ​ຮຽນ, 1 ຫ້ອງ​ໂຖງ, 1 ຫ້ອງ​ຄົວ ​ແລະ 4 ຫ້ອງ​ນ້ຳ, ສະ​ເພາະ​ໂຮງຮຽນອານຸບານ​ບ້ານ​ໂພນ ມີ 3 ຫ້ອງ​ຮຽນ, ມີ 1 ຫ້ອງ​ໂຖງ, ມີ 1 ຫ້ອງ​ຄົວ ​ແລ​ະ 4 ຫ້ອງ​ນ້ຳ. ​ໂຮງຮຽນທັງ​ສອງ​ແຫ່ງສາມາດ​ຮັບຮອງ​ຈຳນວນ​ນັກຮຽນ​ໄດ້ 180 ຄົນ, ລວມມູນ​ຄ່າ​ທັງໝົດ 200.000 ຢູ​ໂຣ, ​ໃນ​ນີ້​ໂຮງຮຽນອານຸບານ​ບ້ານຫຼັງຄັງ 115.000 ຢູ​ໂຣ ​ແລະ ອານຸບານ​ບ້ານ​ໂພນ 85.000 ​ຢູ​ໂຣ. ນອນ​ຈາກ​ນີ້​ແລ້ວ​ທາງ​ສະມາຄົມ​ຍັງ​ໄດ້​ສົ່ງ​ນັກຮຽນທີ່​ຈົບ ມໍ​ປາຍ ຈຳນວນ 7 ຄົນ ທີ່ຢູ່​ໃນ​ເຂດ​ດັ່ງກ່າວ​ໄປ​ຮຽນຕໍ່ທີ່​ນະຄອນຫຼວງວຽງຈັນ ພາຍຫຼັງສຳ​ເລັດ​ການ​ສຶກສາ​ແລ້ວ ​ແມ່ນ​ຈະ​ໄດ້​ກັບ​ມາ​ສອນ​ທີ່​ບ້ານ​ຂອງ​ຕົນ. ​​ໃນ​ໂອກາດ​ດຽວກັນ​ນີ້​ທ່ານ ນາງ ອີ​ໂລ​ດີ້ ​ໂກ​ລົງ​ຊ໌ ກໍ່​ໄດ້​ກ່າວ​ມອບ​ໂຮງຮຽນອານຸບານ​ທັງ​ສອງ​ແຫ່ງ​ໃຫ້​ແກ່​ທ່ານ ສີ​ໄຮ ​ແກ້ວ​ໄກ​ຖິ່ນ ຫົວໜ້າພະ​ແນ​ກສຶກສາ​ທິການ ​ແລະ ກິລາ​ປະຈຳ​ແຂວງ​ຄຳ​ມ່ວນ ​ເພື່ອ​ມອບ​ຕໍ່​ໃຫ້​ແກ່ ຫ້ອງການ​ສຶກສາ​ທິການ ​ແລະ ກິລາ​ເມືອງ​ບົວລະພາ ຮ່ວມ​ກັບ​ອຳນາດ​ການ​ປົກຄອງ​ບ້ານ​ເປັນ​ຜູ້ນຳ​ໃຊ້ ​ແລະ ປົກ​ປັກ​ຮັກສາ​ໃຫ້​ກາຍ​ເປັນ​ບ່ອນ​ຝຶກ​ຝົນຫຼໍ່ຫຼອມລູກຫຼານຂອງ​ຕົນ​​ໃຫ້​ກາຍ​ເປັນ​ຄົນ​ທີ່​ມີ​ຄວາມ​ຮູ້, ຄວາມ​ສາມາດ ​ໃນ​ການ​ປະກອບສ່ວນ​ເຂົ້າ​ຮັບ​ໃຊ້​ປະ​ເທດ​ຊາດ.

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?