ໜ້າຫຼັກ >> ອົງການຈັດຕັ້ງມະຫາຊົນ >> ຄະນະບໍລິຫານງານຊາວໜຸ່ມແຂວງຄໍາມ່ວນ ຂະຫຍາຍສະມາຊິກຊາວໜຸ່ມ ປະຊາຊົນ ປະຕິວັດລາວ
ຄະນະບໍລິຫານງານຊາວໜຸ່ມແຂວງຄໍາມ່ວນ ຂະຫຍາຍສະມາຊິກຊາວໜຸ່ມ ປະຊາຊົນ ປະຕິວັດລາວ
ວັນທີ 12 ເມສາ 2017 - ເວລາ 09:27:41 ເບິ່ງ 38 ຄຳເຫັນ 0

​ເພື່ອ​ເປັນ​ການ​ສ້າງ​ຖັນ​ແຖວ​ຂອງ​ກຳລັງ​​ຊາວ​ໜຸ່ມ-​ເຍົາວະ​ຊົນ ​ໃຫ້​ມີ​ຄວາມ​ໜັກ​ແໜ້ນ​ເຂັ້ມ​ແຂງ ຮັບປະກັນໄດ້​ປະລິມານ ​ແລະ ຄຸນ​ນະພາ​ບ ​ໃຫ້​ໄດ້​ຕາມ​ແຜນການ, ​ແຜນ​ງານ ແລະ ກົດ​ລະບຽບ​ຊາວ​ໜຸ່ມ-​ເຍົາວະ​ຊົນ ທີ່​ໄດ້​ກຳນົດ​ໄວ້ ວ່າ​ດ້ວຍ​ການ​ຂະຫຍາຍ​ສະມາ​ຊິກ​ຊາວ​ໜຸ່ມ ທີ່​ເຖິງອາຍຸ​ກະສຽນ​ເຂົ້າຮ່ວມ​ການ​ເຄື່ອນ​ໄຫວ​ກິດຈະກຳ​ຕ່າງໆ ​ໃນ​ຂະ​ບວນການ​ຂອງ​ຊາວ​ໜຸ່ມ; ພິທີຂະຫຍາຍເຍົາວະຊົນທັນວາ ແລະ ມະຫາຊົນກ້າວໜ້າ ເຂົ້າເປັນສະມາຊິກຊາວໜຸ່ມ ປະຊາຊົນ ປະຕິວັດລາວ ໄດ້ຈັດຂຶ້ນຢ່າງເປັນທາງການ ໃນວັນທີ 10 ເມສາ 2017 ຢູ່ທີ່ອານຸສາວະລີປະທານ ໄກສອນ ພົມວິຫານ ໂດຍການເປັນກຽດເຂົ້າຮ່ວມຂອງ ທ່ານ ແສງທອງ ພະຄຸນທອງ ກຳມະການປະຈໍາພັກແຂວງ ປະທານແນວລາວສ້າງຊາດແຂວງ ຜູ້ຊີ້ນຳວຽກງານອົງການຈັດຕັ້ງມະຫາຊົນ, ທ່ານ ປອ. ແກ້ວອຸດອນ ບຸດສິງຂອນ ກຳມະການພັກ ແຂວງ ເລຂາຄະນະບໍລິຫານງານຊາວໜຸ່ມແຂວງ, ມີທ່ານສະມາຊິກສະພາປະຊາຊົນແຂວງ, ບັນດາທ່ານຈາກພະແນກການອ້ອມຂ້າງແຂວງ, ຄະນະອຳນວຍ ການໂຮງຮຽນ  ຕະຫຼອດຮອດບັນດາຄູອາຈານ, ສະມາຊິກຊາວໜຸ່ມ-ເຍົາວະຊົນ ເຂົ້າຮ່ວມ 230 ສະຫາຍ, ຍິງ 88 ສະຫາຍ.

          ທ່ານ ນາງ ບຸນແປງ ພິມມະສອນ ຮອງເລຂາຄະນະບໍລິຫານງານຊາວໜຸ່ມເມືອງທ່າແຂກ ໄດ້ຂຶ້ນຜ່ານຂໍ້ຕົກລົງຂອງ ຄະນະບໍລິຫານງານຊາວໜຸ່ມແຂວງ ວ່າດ້ວຍການອອກໃບອະນຸມັດເລື່ອນເຍົາວະຊົນທັນວາເຂົ້າເປັນສະມາຊິກຊາວໜຸ່ມປະຊາຊົນ ປະຕິວັດ ລາວໃນ 2 ໂຮງຮຽນຄື: ໂຮງຮຽນມໍປາຍ ທ່າແຂກ ແລະ ມັດທະຍົມຕົ້ນ ສີໂຄດຕະບອງ ຈໍານວນ 209 ນ້ອງ, ຍິງ 64 ນ້ອງ ເຊິ່ງໃຫ້ກຽດມອບໃບອະນຸມັດໂດຍບັນດາທ່ານການນຳຂັ້ນແຂວງ, ຈາກນັ້ນທ່ານກໍ່ໄດ້ຮັບຟັງການໂອ້ລົມຂອງ ທ່ານແສງທອງ ພະຄຸນທອງ ກຳມະການປະຈໍາພັກແຂວງ ປະທານແນວລາວສ້າງຊາດແຂວງ ຜູ້ຊີ້ນຳວຽກງານອົງການຈັດຕັ້ງມະຫາຊົນ ເຊິ່ງທ່ານໄດ້ເນັ້ນໜັກຕໍ່ກັບບັນດາສະມາຊິກຊາວໜຸ່ມຊຸດໃໝ່ວ່າ: ເມື່ອພວກສະຫາຍໄດ້ເຂົ້າມາຢູ່ໃນອົງການຈັດຕັ້ງຊາວໜຸ່ມແລ້ວ ຈົ່ງພ້ອມກັນປະຕິບັດສິດ, ໜ້າທີ່, ພັນທະ, ພາລະບົດບາດ ແລະ ກົດລະບຽບ ຂອງຄະນະຊາວໜຸ່ມ ປະຊາຊົນ ປະຕິວັດລາວ ວາງອອກ ໃຫ້ໜັກແໜ້ນ ແລະ ເຂັ້ມແຂງ, ສຸມໃສ່ຢ່າງ ຕັ້ງໜ້າຕໍ່ເນື້ອໃນຂໍ້ແຂ່ງຂັນ 4 ບຸກ ໂດຍສະເພາະບຸກທາງດ້ານແນວຄິດ ແລະ ບຸກທາງດ້ານການ ຝຶກຝົນຫໍ່ຫຼອມຮໍ່າຮຽນ ເພື່ອສ້າງຕົນເອງໃຫ້ກາຍເປັນພົນລະເມືອງດີຂອງສັງຄົມ, ເປັນສະມາຊິກຊາວໜຸ່ມທີ່ດີເດັ່ນ ໃນກົມກອງຂອງຕົນ ແລະ ເພື່ອສ້າງຕົນເອງໃຫ້ເປັນສະມາຊິກຊາວໜຸ່ມ 4 ບຸກ ຕາມຂໍ້ກໍານົດເລກ 421 ຂອງສູນກາງ ຊປປລ ກໍານົດໄວ້ ເພື່ອໃຫ້ສົມກັບພັກຂະໜານນາມໃຫ້ຊາວໜຸ່ມວ່າ: “ຊາວໜຸ່ມເປັນແຂນຂວາຂອງພັກ ເປັນກະດູກສັນຫຼັງຂອງຊາດ ເປັນຜູ້ສືບທອດທີ່ຈົ່ງຮັກພັກດີ ແລະ ໄວ້ເນື້ອເຊື່ອໃຈຂອງພັກ” ແມ່ນກໍາລັງແຮງອັນສໍາຄັນໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງ ເຮືອງຂຶ້ນໄປເທື່ອລະກ້າວ.

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?