ໜ້າຫຼັກ >> ຂ່າວຈາກຕ່າງເມືອງ >> ເມືອງ ບົວລະພາ ປະກາດຮັບຮອງ 4 ບ້ານ ເປັນບ້ານ ວັດທະນະທຳ
ເມືອງ ບົວລະພາ ປະກາດຮັບຮອງ 4 ບ້ານ ເປັນບ້ານ ວັດທະນະທຳ
ວັນທີ 31 ມີນາ 2017 - ເວລາ 15:10:47 ເບິ່ງ 46 ຄຳເຫັນ 0

ໃນວັນທີ 27 ມີນາ 2017 ທີ່ຜ່ານມາ ຢູ່ທີ່ ຫ້ອງການບ້ານ ໜອງແສງ ເມືອງ ບົວລະພາ ​ແຂວງ​ຄຳ​ມ່ວນ ໄດ້ຈັດພິທີ ປະກາດຮັບຮອງເອົາ 4 ບ້ານ ຄື: ບ້ານໜອງແສງ, ບ້ານວັງມະເນີ, ບ້ານທົ່ງຊຳ ແລະ ບ້ານວັງຄົນ  ເປັນບ້ານວັດທະ ນະທຳ ຂອງເມືອງ ເຂົ້າຮ່ວມໃນພິທີດັ່ງກ່າວ ໂດຍ ທ່ານ ຄຳເພົ່າ ທອງເທພາຮັກ ເຈົ້າເມືອງ ເມືອງ ບົວລະພາ, ທ່ານ ບຸນທຳ ທຳມະວົງ ຮອງຫົວໜ້າພະແນກ ຖະແຫລງຂ່າວ,ວັດທະນະທຳ ແລະ ທ່ອງທ່ຽວ​ແຂວງ, ທ່ານ ໄຄສີ ດາລາສີ ຮອງຫົວໜ້າພະແນກກະສິກຳ-ປ່າໄມ້ ແລະ ພັດທະນາຊົນນະບົດແຂວງ ພ້ອມດ້ວຍບັນດາແຂກຖືກເຊີນ, ອຳນາດການປົກ ຄອງ ຕະຫຼອດເຖິງພໍ່ແມ່ປະຊາຊົນທັງ 4  ບ້ານເຂົ້າຮ່ວມ.

          ບ້ານໜອງແສງ, ບ້ານວັງມະເນີ, ບ້ານທົ່ງຊຳ ແລະ ບ້ານວັງຄົນ ແມ່ນຂຶ້ນກັບຈຸດສຸມຫລັງຄັງ-ວັງມະເນີ ເມືອງ ບົວລະພາ ແຂວງຄຳມ່ວນ ປະກອບມີ 230 ຫລັງຄາເຮືອນ, ມີ 239 ຄອບຄົວ, ມີປະຊາກອນທັງໝົດ 1206 ຄົນ, ຍິງ 632 ຄົນ, ນັບຖືສາສະໜາພຸດ ການດຳລົງຊີວິດຂອງປະຊາຊົນແມ່ນຕິດພັນກັບທຳມະຊາດມີມູນເຊື້ອດຸໝັ່ນຂະຫຍັນພຽນ ທຳການຜະລິດ, ເພີ້ມພູນຜະລິດຜົນ ປູກຝັງ-ລ້ຽງສັດ ພ້ອມກັນເອົາໃຈໃສ່ຢ່າງຕັ້ງໜ້າ ໃນການຮັກສາ ວັດທະນະທຳ, ຮີດຄອງປະເພນີອັນດີງາມຂອງບັນດາເຜົ່າ, ສ້າງຄວາມສາມັກຄີ ເປັນປຶກແຜ່ນແໜ້ນໜາ ໄດ້ເປັັນຢ່າງດີຍ້ອນມູນເຊື້ອດັ່ງກ່າວທາງຄະນະກຳມະການທີ່ກ່ຽວຂ້ອງໄດ້ລົງເຄື່ອນໄຫວເອົາໃຈໃສ່ ຊຸກຍູ້ວຽກງານຕ່າງໆເປັນຕົ້ນແມ່ນວຽກງານສຶກສາ, ຍຸຕິທຳ, ສາທາລະນະສຸກ, ກະສິກຳ, ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ. ສາ ມາດບັນລຸຜົນໄດ້ເຊັ່ນ: ໄດ້ລຶບລ້າງການກືກໜັງສືຂອງປະຊາຊົນຢູ່ໃນເກນອາຍຸ 15-45 ປີ ໄດ້ຫຼາຍກວ່າ 100%, ມີຄອບຄົວຕົວແບບສາມາດສ້າງລາຍຮັບໄດ້ 10 ລ້ານກີບຕໍ່ປີ, ໄດ້ຮັບຮອງເປັນບ້ານປອດຄະດີ, ບ້ານສາທາລະນະສຸກແບບຢ່າງ, ບ້ານແມ່ຍິງ 3 ດີ ແລະ ໄດ້ຮັບໃບຢັ້ງຢືນຄອບ ຄົວວັດທະນະທຳທັງໝົດ 196 ຄອບຄົວກວມເອົາ 82 % ຂອງຄອບຄົວທັງໝົດ ແລະ ສາມາດປະກາດເອົາທັງ 4 ບ້ານ ເປັນບ້ານວັດທະນະທຳ ບ້ານທີ 24 – 27  ຂອງເມືອງບົວລະພາ ແລະ ເປັນບ້ານທີ 459-462 ຂອງແຂວງຄຳມ່ວນ ໃນພິທີດັ່ງກ່າວ ທ່ານ ບຸນທຳ ທຳມະວົງ ຮອງຫົວໜ້າພະແນກ ຖວທ ແຂວງ ກໍ່ໄດ້ເປັນກຽດມອບໃບຢັ້ງຢືນບ້ານວັດທະນະທຳໃຫ້ແກ່ອຳນາດການປົກຄອງບ້ານ ທັງ 4 ບ້ານ,  ໃນໂອກາດດຽວກັນນີ້ທ່ານ ຄຳເພົ່າ ທອງເທພາຮັກ ເຈົ້າເມືອງ ເມືອງບົວລະພາ ກໍ່ໄດ້ກ່າວໂອ້ລົມຕໍ່ອຳ ນາດການປົກຄອງ ແລະ ພໍ່ແມ່ປະຊາຊົນ ທັງ 4 ບ້ານ ເບື້ອງຕົ້ນ ທ່ານຍັງໄດ້ຍ້ອງຍໍຊົມເຊີນ ທັງ 4 ບ້ານ ທີ່ສາມາດຍາດແຍ່ງເອົາຜົນງານດັ່ງກ່າວມາໄດ້ ພ້ອມນັ້ນ ທ່ານໄດ້ຮຽກຮ້ອງໃຫ້ອຳນາດການປົກຄອງຈົ່ງພ້ອມກັນເອົາໃຈ ໃສ່ປະ ຕິບັດວຽກງານຕ່າງໆ ທີ່ໄດ້ຮັບມອບໝາຍ ໂດຍສະເພາະແມ່ນບັນຫາຂໍ້ຄົງຄ້າງທີ່ເຮັດໃຫ້ການປະຕິບັດບໍ່ໄດ້ຮັບຜົນສຳ ເລັດ, ສືບຕໍ່ສ້າງຄອບຄົວທີ່ຍັງເຫຼືອໃຫ້ກາຍເປັນຄອບຄົວວັດທະນະທຳໃຫ້ກວມເອົາ 100% ພ້ອມກັນນັ້ນຈົ່ງຮັກສານາມມະຍົດບ້ານວັດທະນະທຳ ເພື່ອກ້າວໄປສູ່ບ້ານພັດທະນາໃນອະນາຄົດ.

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?