ໜ້າຫຼັກ >> ພັດທະນາຊົນນະບົດ >> ປະກາດຮັບຮອງເອົາ 7 ບ້ານຂອງເມືອງຄູນຄຳ ເປັນບ້ານພັດທະນາ
ປະກາດຮັບຮອງເອົາ 7 ບ້ານຂອງເມືອງຄູນຄຳ ເປັນບ້ານພັດທະນາ
ວັນທີ 06 ພຶດສະພາ 2013 - ເວລາ 10:49:05 ເບິ່ງ 1418 ຄຳເຫັນ 0

 

ພິທີ​ປະກາດ​ຮັບຮອງ​ເອົາ​ບ້ານ​ກູບ, ມ່ວງ​ເໜືອ, ບ້ານ​ອໍ້, ​ໂພນ​ແຍງ, ນ້ຳ​ນອນ, ບ້ານ​ແກ້ງ ​ແລະ ບ້ານ​ນາ​ຄຳ ກຸ່ມ​ບ້ານ​ກູບ ​ເມືອງ​ຄູນ​ຄຳ ​ແຂວງ​ຄຳ​ມ່ວນ ​ເປັນ​ບ້ານ​ພັດ​ທະນາ​ແມ່ນ​ໄດ້ຈັດ​ຂຶ້ນ​ຢ່າງ​ເປັນ​ທາງ​ການ​ໃນ​ວັນ​ທີ 02 ພຶດສະພາ 2013 ຢູ່​ທີ່​ເດີ່ນ​ໂຮງຮຽນມັດທະຍົມ​ຕົ້ນ​ບ້ານ​ກູບ. ​ເຂົ້າ​ຮ່ວມ​ໃນ​ພິທີ​ຄັ້ງດັ່ງກ່າວ​ມີ​ທ່ານ ​ແກ້ວ​ລັນ​ດອນ ຈັນທະ​ປານີ ​ເຈົ້າ​ເມືອງ ໆຄູນ​ຄຳ, ທ່ານ ​ໄພ​ວັນ ໜື່ນຄຳ​ໄຊ ຮອງ​ຫົວໜ້າຫ້ອງການ​ພັດທະນາຊົນນະບົດ ​ແລະ ລຶບ​ລ້າງ​ຄວາມທຸກ​ຍາກ​ຂັ້ນແຂວງ, ​​ເຈົ້າ​ເມືອງ ໆຄຳ​ເກີດ ​ແຂວງ​ບໍລິ​ຄຳ​ໄຊ,  ພະ​ແນ​ກການ​ອ້ອມ​ຂ້າງ​ແຂວງ, ຫ້ອງການ​ອ້ອມ​ຂ້າງ​ເມືອງ ຕະຫຼອດ​ເຖິງ​ອຳນາດ​ການ​ປົກຄອງ ​ແລະ ພໍ່​ແມ່​ປະຊາຊົນ​ພາຍ​ໃນ 7 ບ້ານ​ເຂົ້າ​ຮ່ວມ.

      ບ້ານ​ກູບ, ມ່ວງ​ເໜືອ, ບ້ານ​ອໍ້, ​ໂພນ​ແຍງ, ນ້ຳ​ນອນ, ບ້ານ​ແກ້ງ ​ແລະ ບ້ານ​ນາ​ຄຳ ທັງ 7 ບ້ານ​ປະກອບ​ມີ 444 ຫຼັງຄາ​ເຮືອນ, ມີ 496 ຄອບຄົວ, ພົ​ນລະ​ເມືອງ​ທັງໝົດ 2.461 ຄົນ, ຍິງ 1.181 ຄົນ, ສ່ວນ​ໃຫຍ່​ປະຊາຊົນ​ຍືດຖື​ອາຊີບ​ປູກຝັງ ​ແລະ ລ້ຽງສັດ​ເປັນ​ຕົ້ນຕໍ, ມີ​ເນື້ອ​ທີ່​ນາປີ 467,76 ​ເຮັກຕາ, ສະມັດ​ຕະພາບ​ໃນ​ການ​ຜະລິດ 2,5 ​ໂຕນ​ຕໍ່​ເຮັກຕາ, ສະ​ເລ່ຍ​ 475 ກິ​ໂລ​ຕໍ່ຄົນ​ຕໍ່ປີ, ນອກຈາກ​ນີ້​ແລ້ວ​ຍັງ​ໄດ້​ທຳ​ການປູກ​ພືດ​ສຳຮອງ​ເປັນ​ຕົ້ນ​ແມ່ນ ການ​ປູກຢາສູບ, ມັນ​ຕົ້ນ ​ເພື່ອ​ຂາຍ​ເປັນ​ສິນຄ້າ ​ແລະ ການ​ລ້ຽງສັດ​ເຊັ່ນ: ງົວ, ຄວາຍ, ​ແບ້, ໝູ, ສັດ​ປີກ ​ແລະ ອື່ນໆທີ່​ສາມາດ​ສ້າງ​ລາຍ​ຮັບ​ເພີ້​ມ​ໃຫ້​ແກ່​ຄອບຄົວ, ລາຍ​ຮັບ​ສະ​ເລ່ຍຕໍ່ຄົນ​ຕໍ່ປີ​ໄດ້ 5.780.000 ກີບ, ​ແຕ່​ລະ​ຄອບຄົວ​ແມ່ນຫຼຸດພົ້ນ​ອອກ​ຈາກ​ຄວາມທຸກ​ຍາກ​. ທັງ 7 ບ້ານມີ​ຄອບຄົວ​ພັດທະນາ 478 ຄອບຄົວ ກວມ​ເອົາ 96% ຂອງ​ຈຳນວນຄອບຄົວ​ທັງໝົດ. ມາ​ຮອດ​ປະຈຸ​ບັນ​ແມ່ນ​ສາມາດ​ປະກາດ​ຮັບຮອງ​ເອົາ​ທັງ 7 ບ້ານ ​ເປັນ​ບ້ານ​ພັດທະນາ​ບ້ານ​ທີ 11-17 ຂ​ອງ​ເມືອງ​ຄູນ​ຄຳ ​ແລະ ​ເປັນບ້ານ​ທີ 201-207 ຂອງ​ແຂວງ​ຄຳ​ມ່ວນ. ​ໃນ​ພິທີ​ທ່ານ ​ແກ້ວ​ລັນ​ດອນ ຈັນທະ​ປານີ ​ໄດ້​ເປັນກຽດມອບ​ໃບ​ຢັ້ງຢືນ​ຄອບຄົວ​ພັດທະນາ​ໃຫ້​ແກ່​ອຳນາດ​ການ​ປົກຄອງ​ບ້ານ ​ແລະ ​​ໄດ້​ຮັບຮອງ​ເອົາ​ທັງ 7 ບ້ານ ​ເປັນ​ບ້ານ​ທີ່​ຂຶ້ນ​ກັບ​ເມືອງ. ​ໃນ​ພິທີ​ດັ່ງກ່າວ ທ່ານ​ ແກ້ວ​ລັນ​ດອນ ຈັນທະ​ປານີ ກໍ່​ໄດ້​ກ່າວ​ໂອ້​ລົມ​ຕໍ່ພິທີ​ເຊິ່ງທ່ານ ​ໄດ້​ເໜັ້ນໜັກ​ໃຫ້​ທາງ​ອຳນາດ​ການ​ປົກຄອງ​ບ້ານ ພ້ອມ​ດ້ວຍ​ພໍ່​ແມ່​ປະຊາຊົນ​ເອົາ​ໃຈ​ໃສ່​ຕັ້ງໜ້າປົກ​ປັກ​ຮັກສາ​ມູນ​ເຊື້ອ ນາມມະຍົດ​ຄອບຄົວ​ພັດທະນາ, ອະນຸລັກ​ຮັກສາ, ​ເສີມ​ຂະຫຍາຍ​ມູນ​ເຊື້ອ​ອັນ​ດີງາມ​ທາງ​ດ້ານ​ວັດທະນະທຳ, ຮີດຄອງ​ປະ​ເພນີ​ຂອງ​ທ້ອງ​ຖິ່ນ, ອອກ​ແຮງ​ຕ້ານ​ທຸກ​ປະກົດ​ການ​ຫຍໍ້​ທໍ້​ຕ່າງໆທີ່​ກົດໜ່ວງການ​ພັດທະນາ, ​ເອົາ​ໃຈ​ໃສ່​ວຽກງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ, ສືບຕໍ່​ເສີມ​ຂະຫຍາຍ​ຄວາ​ມສາມັກຄີ​ຂອງ​ປະຊາຊົນ​ພາຍ​ໃນ​ກຸ່ມ​ບ້ານ​ໃຫ້​ມີ​ຄວາມໜັກ​ແໜ້ນ ​ແລະ ​ເຂັ້ມ​ແຂງ ​ເພື່ອ​ສ້າງ​ເງື່ອນ​ໄຂ​ເອື້ອ​ອຳນວຍ​ຄວາມ​ສະດວກ​ໃນ​ການ​ພັດທະນາ​ເສດຖະກິດ-ສັງຄົມ ກໍ່ຄື​ການ​ເພີ້​ມພູນ​ຜະລິດຜົນ​ຂອງ​ປະຊາຊົນ​ໃຫ້​ກາຍ​ເປັນ​ສິນຄ້າ​ນັບ​ມື້​ນັບຫຼາຍຂຶ້ນ. ​ໃນ​ຕອນ​ທ້າຍ​ຂອງ​ພິທີ ບັນດາ​ການ​ນຳ​ທີ່​ໄດ້​ເຂົ້າ​ຮ່ວມ​ໄດ້​ພ້ອມ​ກັນ​ເປີດ​ປ້າຍ​ບ້ານ​ພັດທະນາ ​ແລະ ລັ່ນຄ້ອງ​ປະກາດ​ຮັບຮອງ​ເອົາ 7 ບ້ານ​ເປັນ​ບ້ານ​ພັດທະນາ​ຢ່າງ​ເປັນ​ທາງ​ການ.

 

ຂ່າວ: ກອງ​ຄຳ

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?