ໜ້າຫຼັກ >> ເວທີນັກຂຽນ >> ຄອຍຮັກວັນນັດພົບ
ຄອຍຮັກວັນນັດພົບ
ວັນທີ 29 ເມສາ 2013 - ເວລາ 08:44:33 ເບິ່ງ 1532 ຄຳເຫັນ 3

 

                                                                      ໂດຍ: ຖິ່ນໄດໂນເສົາ

  ສາຍລົມທີ່ພັດຜ່ານແສງແດດກ້າໄດ້ຫຸບຫອບເອົາອາຍຄວາມຮ້ອນມາພ້ອມກໍ່ບໍ່ແມ່ນເລື່ອງແປກເລີຍທີ່ອາກາດ ຈະມີການປ່ຽນແປງໃນໄລຍະນີ້ເພາະເປັນຕົ້ນເດືອນ 5 ເປັນໄລຍະຂອງລະດູຝົນມາພ້ອມໆກັບແສງແດດອັນ ເຈີດຈ້າໃຜໄດ້ພົບເຫັນ ແລະ ປະເຊີນໜ້າກັບມັນກໍ່ຈະເກີດອາລົມງຸດງິດຈົ່ມຮ້ອນຈົ່ມໜາວແນ່ນອນ , ຄຳຕານັ່ງ ເຮັດວຽກຢູ່ເທິງຂົວຂ້າມມິດຕະພາບ 3 ຄຳມ່ວນ - ນະຄອນພະນົມ , ທົ່ວໃບໜ້າຂອງເຂົາອາບໄປດ້ວຍເຫື່ອ ໄຫຼຍ້ອຍເປັນກະແສນ້ອຍໆຜ່ານວ່າງຄາງຂອງເຂົາ , ຮົ່ມທີ່ໃຫ້ຄວາມເຢັນກໍ່ມີພຽງໝວກໃບນ້ອຍໆເທົ່ານັ້ນ, ທຸກ ຄັ້ງທີ່ຄຳຕາສາດສາຍຕາໄປຕາມສາຍນ້ຳຂອງທາງເໜືອ ແລະ ທາງໃຕ້ອັນມີທິດທັດທຳມະຊາດທີ່ສວຍງາມກໍ່ຈະ ເຮັດໃຫ້ເຂົາມີຮອຍຍິ້ມຂຶ້ນມາໄດ້.

      ການເຮັດວຽກດ້ານການຕົກແຕ່ງເກັບຄວາມລະອຽດນີ້ກໍ່ແມ່ນການເຮັດວຽກເປັນທີມ ແລະ ໃນໄລຍະນີ້ ການກໍ່ສ້າງຂົວແຫ່ງດັ່ງກ່າວກໍ່ໄດ້ເຖິງ 90 % ແລ້ວໃນວຽກງານນີ້ກໍ່ມີອ້າຍສິງຫາເຊິ່ງເປັນຜູ້ໜື່ງທີ່ເປັນຫຼັກໃຫ້ແກ່ ອ້າຍນ້ອງໝົດທຸກຄົນ.

- ເປັນຈັ່ງໃດຄໍາຕາ ອາກາດຮ້ອນປານນີ້ບໍ່ພັກແນ່ບໍ? ອ້າຍສິງຫາທັງເວົ້າທັງຍ່າງເຂົ້າມາຈັບບ່າຂອງຄຳຕາ

- ໂອຍ! ນ້ອງຊິນເຄີຍແລ້ວ! ແດດຊ່ຳນີ້ເຮັດຫຍັງນ້ອງບໍ່ໄດ້ດອກ, ພຸ້ນ! ເບິ່ງແມມັນຊິມາອີກແລ້ວ. ຄໍາຕາຊີ້ ໄປທີ່ກ້ອນເມກອັນດຳກ່ຳຢູ່ເທິງທ້ອງຟ້າ ກຳລັງກໍ່ຕົວເປັນກຸ່ມກ້ອນ ແລະ ເຄື່ອນທີ່ມາໃກ້.

      ແສງແດດໃນຕອນທ່ຽງກໍ່ຜ່ານພົ້ນໄປເວລາຫຍັບມາຮອດບ່າຍສາມໂມງແລງແສງແດດກໍ່ຍັງບໍ່ລົດລະ ຄວາມກ້າລົງເລີຍ, ຖັງສີທີ່ຄຳຕາຫິ້ວພ້ອມຟອຍທາກ້ານນ້ອຍໆ ກໍ່ຍັງຢູ່ຄຽງຂ້າງເຂົາສະເໝີ.

-  ລົດໃຜພັດແລ່ນມາອີກແລ້ວ ດ໋ຽວຝຸ່ນກໍຈັບສີແຖວນີ້ໝົດດອກ! ຄຳຕາຈົ່ມ ເມື່ອຫຼຽວເຫັນລົດຄັນສີແດງ 2 ຄັນ ແລ່ນມາແຕ່ຝັ່ງໄທແລະແລ້ວຄຳຕາກໍຕ້ອງຕົກໃຈເມື່ອເຫັນອ້າຍສິງຫາແລ່ນມາຈາກແຄ້ມມຸ້ງໜ້າມາຫາຕົນ ເອງ, ຄຳຕາລຸກຂຶ້ນ ຕາທັງຄູ່ຈ້ອງໄປທີ່ອ້າຍສິງຫາ.

-  ຄໍາຕາ... ຄຳຕາ ໆ ເຮັດວຽກຕໍ່ໄປເດີ ! ອ້າຍນ້ອງເດເຮັດວຽກຕາມປົກກະຕິເດີ !  ສິງຫາຢຸດເວົ້າແລ້ວ ຫາຍໃຈທາງປາກດັງໂພ່ໆ

-  ແມ່ນມີເລື່ອງຄໍຂາດບາດຕາຍຫຍັງດຽວນີ໋ ຄືວ່າຟ້າວແທ້? ຄໍາຕາເວົ້າປະໂຫຍຄໍາຖາມນີ້ຂື້ນ ອ້າຍນ້ອງ ຢູ່ໃນບໍລິເວນອ້ອມແອ້ມ 5 -6 ຄົນກໍລຸກຂຶ້ນຫຼຽວເບິ່ງຄຳຕາ ແລະ ອ້າຍສິງຫາທັນທີ.

-  ພຸ້ນ!! ເຫັນບໍນະ? ສິງຫາຊີ້ໄປທີ່ທລົດ 2 ຄັນທີ່ຈອດຢູ່ລະຫວ່າງກາງຂົວ ພ້ອມກຸ່ມຄົນຈຳນວນໜຶ່ງ ຍ່າງໄປ ມາຢູ່ບໍລິເວນດັ່ງກ່າວ.

-  ແມ່ນໃຜຫັ້ນ? ແລ້ວມັນກ່ຽວຫຍັງກັບເຮົາ? ຄໍາຕາຖາມດ້ວຍຄວາມສົງໃສ.

-  ເພິ່ນຈະມາກວດກາປະເມີນຜົນ ເພື່ອຕີລາຄາຄືນຄວາມຄືບໜ້າ ໂດຍທຽບໃສ່ແຜນການທີ່ວາງໄວ້ ວ່າປັດຈຸບັນ ບັນລຸຈັກສ່ວນຮ້ອຍແລ້ວ.  ສິງຫາອະທິບາຍ

-  ຮ້ວາຍ! ຄັນຊັ້ນເພິ່ນກາຊິມາຮອດແຖວເຮົາພີ້ຕິຊະ! ອ້າຍນ້ອງຄົນໜຶ່ງເວົ້າຂຶ້ນ

-  ແມ່ນແລ້ວ ! ເອົ້າ !   ເຮັດວຽກຕໍ່.  ສິງຫາເວົ້າແລ້ວກໍ່ຮ່ວມເຮັດວຽກກັບອ້າຍນ້ອງ

 ລົດທັງສອງຄົນໄດ້ຈອດໄວ້ລະຫວ່າງກາງຂົວບໍ່ດົນຂະບວນດັ່ງກ່າວກໍ່ຍ່າງມາຮອດບ່ອນອ້າຍນ້ອງເຮັດວຽກ ແລະຍັງໄດ້ຢຸດສັງເກດເບິ່ງການເຮັດວຽກຂອງຄຳຕາແລະໝູ່ເພື່ອນ,ພ້ອມທັງຖາມບາງບັນຫາທີ່ສົງໃສຄຳຕາກົ້ມ ໜ້າເຮັດວຽກ ພ້ອມທັງເຫຼືອກຕາມຂຶ້ນມາເບິ່ງເຂົາເຫັນຍິງສາວຄົນໜຶ່ງຖືປຶ້ມປົກແຂງຫົວໜຶ່ງພ້ອມທັງການບັນທຶກ ຢ່າງຕັ້ງໃຈ,ອາດເປັນຍ້ອນວ່າເປັນເວລາດົນໃນການເຮັດວຽກຢູ່ຂົວແຫ່ງນີ້ບໍ່ມີຍິງສາວຜ່ານມາດົນ,ຄຳຕາຈິ່ງຢດ ຈຶ້ງຕາເບິ່ງ ໄປທີ່ຍິງສາວຄົນນັ້ນ,ສາຍຕາທີ່ບົ່ມຊ້ອນຄວາມຫວານບວກກັບໃບໜ້າທີ່ອາບໄປດ້ວຍເຫື່ອ,ຍິງສາວ ຄົນນັ້ນຫຼຽວ ເຫັນກໍ່ເລີຍຈຶ້ງຕາເບິ່ງຄືນດ້ວຍຄວາມສົງໃສນາງຍ່າງເຂົ້າມາຫາຄຳຕາ ເຮັດໃຫ້ຄຳ ຕາຕົກໃຈ

- ນໍ້າເຢັນໆບໍ່ອ້າຍ? ສຽງເວົ້າອັນຫວານໆສໍານຽງອີ່ສານ ຄໍາຕາໄດ້ຍິນແລ້ວ ບວກກັບພາບທີ່ເຫັນ ເຂົາບໍ່ຢາກ ເຊື່ອສາຍຕາ ເມື່ອຍິງສາວຄົນນັ້ນນັ່ງລົງແລ້ວຍື່ນນ້ຳດື່ມກາ ເນດສເລ້ມາໃຫ້ 1 ຕຸກ

-  ຂອບໃຈເດີ. ຄໍາຕາຈັບເອົານໍ້າຕາຈ້ອງເບິ່ງໜ້າພ້ອມສົ່ງຮອຍຍິ້ມ

-  ອ້າຍເຮັດວຽກຢູ່ນີ້ດົນແລ້ວບໍ? ຍິງສາວຄົນນັ້ນຖາມ

-  ກໍຕັ້ງແຕ່ເລີ່ມຕົ້ນພຸ້ນແລ້ວ. ຄໍາຕາຕອບດ້ວຍນໍ້າສຽງສັ່ນໆ

-  ອ້າຍເປັນຄົນທ່າແຂກນີ້ບໍ?

-  ແມ່ນແລ້ວ

ຍິງສາວຄົນນັ້ນລຸກຂຶ້ນແລ້ວກ້າວຍ່າງອອກຈາກຄຳຕາ,ແຕ່ບໍ່ຮູ້ມີສິ່ງໃດມາກະຕຸກຊຸກຍູ້ຄຳຕາແນວໃດ,ຄຳຕາຈິ່ງ  ເອີຍຂຶ້ນໃນຄະນະທີ່ນາງກຳລັງຈະໄປ

-  ຂໍໂທດເຈົ້າຊື່ຫຍັງ?   ຍິງສາວຄົນນັ້ນອວ່າຍໜ້າມາແລ້ວຫຍັບເຂົ້າມາຫາຄໍາຕາອີກຄັ້ງ

-  ນ້ອງຊື່ ມາລິສາ. ນາງຕອບ ແລ້ວຈົກເອົານາມບັດມາຍື່ນໃຫ້ຄຳຕາ ແລ້ວຍັງລົງທ້າຍດ້ວຍຄຳເວົ້າສັ້ນໆວ່າ:

-  ມີຫຍັງ ໂທຫາກາໄດ້ເດີ.

ປະໂຫຍກສຸດທ້າຍທີ່ນາງເອີ່ຍເຮັດໃຫ້ຄຳຕາຕ້ອງຍິ້ມຄ້າງ,ໄດ້ແຕ່ຫຼຽວນຳມາລິສາຜູ້ທີ່ມີຮູບຮ່າງອັນກົມກ້ຽງ,ຜິວ ຂາວອົມຊົມພູມັດຜົມດ້ວຍໂບສີແດງ.ຄຳຕາເຮັດວຽກໄປແຍງນາມບັດໄປເຮັດໃຫ້ໝູ່ຢູ່ໃກ້ຈົນຕ້ອງແຊວຢອກຢ່າງ ເປັນໄລຍະ.ແສງຕາເວັນໄດ້ລັບລາຂອບຟ້າຍັງເຫຼືອໄວ້ແຕ່ຄວາມມືດມົວ,ຢູ່ທີ່ຮ້ານປ້າບົວຂ້າງໆແຄັ້ມຂອງຄຳຕາ,ຫຼັງຈາກກິນເຂົ້າແລງແລ້ວອ້າຍສິງຫາຈິ່ງຊວນອ້າຍນ້ອງຊຸມແຊວກັນເລັກໆນ້ອຍໆ,ນ້ຳເບຍຫົວເສືອທີ່ເປັ່ງສີເຫຼືອງ ອ່ອນໆຖືກເທລົງຈອກແກ້ວປົນກັບນ້ຳກ້ອນໃສໆ, ສຽງຕຳຈອກກໍ່ດັງເປັນໄລຍະ ກິ່ງກັ່ງໆໆ.

-  ເປັນຈັ່ງໃດມື້ນີ້ຄືຊິບໍ່ເມື່ອເນາະ ມີຜູ້ສາວມາລົມນໍາ  ຮວ້າຍ! ເບິ່ງແລ້ວກສງາມຢູ່ໃດ!   ອ້າຍສິງຫາເວົ້າກັບ ຄຳຕາ,ຄຳຕາເອງກໍ່ໄດ້ແຕ່ຍິ້ມ ແລະ ສົ່ງສາຍຕາແບບລອຍໆ

-  ແມ່ນກໍາລັງຄິດຮອດເຂົາຢູ່ບໍຫັ້ນ ? ສິງຫາຖາມຕື່ມອີກ

-  ນີ້ເດນາມບັດ ! ຄໍາຕາຈົກເອົານາມບັດນັ້ນອອກມາ

-  ໂອ່ ! ຊື່ມາລິສາ  ປາດໂທ ເຮັດງານກວດກາພຸ້ນໃດ໋!  ສິງຫາອ່ານນາມບັດ

-  ເບີໂທກໍ່ມີໃດ໋ ໂທເບາະ? ໂທບໍ? ສິງຫາຈັບເອົາໂທລະສັບເບີໄທຂອງຕົນອອກມາຍື່ນໃຫ້ຄໍາຕາ

- ບໍ່ດອກ ! ໂອ່ຍເບິ່ງເຂົາງາມປານນັ້ນ,ເຮັດວຽກດີປານນັ້ນ ຊິມາສົນຄົນຄືເຮົາບໍ! ຄຳຕາເວົ້າແບບຄົນກຳລັງທໍ້, ແຕ່ສາຍຕາເຂົາຍັງແນມໄປທີ່ກາງຂົວບ່ອນທີ່ທີ່ພົບກັນກັບນາງໃນຕອນກາງເວັນນັ້ນຄວາມມືດມົວໃນຄ່ຳຄືນນັ້ນ ເຮັດໃຫ້ຄຳຕາຫຼຽວໄປທາງໃດກໍ່ເຫັນແຕ່ໃບໜ້າຂອງມາລິສາເວລາຜ່ານໄປເກືອບ10ໂມງກາງຄືນຄຳຕາຕັດສິນ ໃຈກົດໂທລະສັບໄປຫາມາລິສາສຽງເພງລໍສາຍທີ່ດັງເຮັດໃຫ້ຄຳຕາຍິ້ມອອກມາບາດໃຫຍ່ໆ ເມື່ອໄດ້ຍິນເພງຮ້ອງອອກມາວ່າ:“ກິນເຂົ້າຫຼືຍັງ.........?”ຄືນນັ້ນຄຳຕາແລະມາລິສາໄດ້ລົມກັນທາງໂທລະສັບ ຜ່ານລະບົບວັນທູຄໍດົນເປັນຊົ່ວໂມງຈິ່ງນອນ.ນັບແຕ່ວັນນັ້ນຄຳຕາຊາຍໜຸ່ມໄວ26ປີທີ່ບໍ່ເຄີຍມີຍິງສາວໃດມາຈິງໃຈ ນຳຫຼືເປັນຍ້ອນເຂົາເປັນຄົນຈິງຈັງກັບວຽກງານເກີນໄປບໍຈິ່ງບໍ່ມີຍິງມາສົນໃຈປານໃດ໋,ແຕ່ລະວັນຫຼັງຈາກອິດເມື່ອຍກັບວຽກງານເຂົາກກໍມາຜ່ອນຄາຍໂດຍການລົມໂທລະສັບກັບຍິງສາວທີ່ເຫັນກັນບໍ່ພໍເທົ່າໃດມື້,ທຸກຖ້ອຍຄຳທີ່ມາລິສາເອີ່ຍມາມັນຈັ່ງແມ່ນອ່ອນຫວານແທ້ໆບາງວັນຄຳຕາກໍ່ໂທໄປບາງວັນກໍ່ມາລິສາໂທມາ.ຕອນແລງຂອງວັນໜຶ່ງຢູ່ທີ່ຮ້ານປ້າບົວ ອ້າຍນ້ອງກໍາມະກອນ ແລະ ນາຍຊ່າງທັງຫຼາຍກໍ່ມາກັນກິນ ເຂົ້າກິນນ້ຳຢ່າງເປັນຂະບວນ.

ມື້ນີ້ບໍ່ກິນເບຍບໍນໍ? ປ້າບົວຖາມໄປທີ່ສິງຫາ ທີ່ນັ່ງຮ່ວມກັບອ້າຍນ້ອງ ລວມທັງຄຳຕາ.

ຄົງຊິບໍ່ກິນແລ້ວມື້ນີ້! ແຕ່ຂໍເປັນບັດເຕີມເງິນວັນທູຄໍແທນສາ! 

ສຽງໂຮແຊວຈາກອ້າຍນ້ອງດັງຂຶ້ນພາຍຫຼັງສິງຫາເວົ້າສຸດຄວາມ ແຕ່ລະຄົນຈ້ອງຕາມໄປທີ່ຄຳຕາ, ສ່ວນ ຄຳຕາ ກໍ່ລຸກຍ່າງອອກໄປບ່ອນນອນ ກໍບໍ່ມີວຽກອື່ນໃດອີກແລ້ວໃນຕອນນີ້ ນອກຈາກລົມໂທລະສັບກັບສາວໄທ

-  ອາໂຫຼ! ນອນແລ້ວບໍ?  ຄໍາຕາຖາມດ້ວຍນໍ້າສຽງຫວານໆ

ນ້ອງຍັງບໍ່ນອນດອກ  ຍັງຈະເຮັດວຽກຢູ່.  ມາລິສາຕອບ

-  ຄັນຊັ້ນອ້າຍກໍ່ລົບກວນເຈົ້າຕິຊັ້ນນະ?

-  ບໍ່ດອກ

-   ເປັນຫຍັງອ້າຍຄືຢາກໂທຫາເຈົ້າທຸກວັນໆແທ້ ຢາກລົມນໍາເຈົ້າດົນໆ ຢາກພົບເຈົ້າອີກເດ ! ຄຳຕາເວົ້າອອກ ດ້ວຍຄວາມຄິດຮອດ

ຢາກພົບກໍ່ມາພົບໃນວັນຊ່ວງເຮືອນະຄອນພະນົມນີ້ເດ, ຊິນັ່ງໃຫ້ລົມນຳດົນໆເລີຍລະ! ມະລິສາຕອບພ້ອມ ສຽງຫົວຄ່ອຍໆ

- ເອົາລະອ້າຍບໍ່ລົບກວນເຈົ້າແລ້ວ ວັນໜ້າຈະໂທຫາໃໝ່  ແຕ່ຢ່າລືມທີ່ເວົ້ານັ້ນເດີ

-  ບ່າຍໆ

-  ບ່າຍໆໆ

 ຕະຫຼອດໄລຍະເວລາໜຶ່ງອາທິດທີ່ລໍຄອຍ ງານຊ່ວງເຮືອທີ່ນະຄອນພະນົມ ເຊິ່ງຈະຈັດກ່ອນທ່າແຂກໜຶ່ງ ວັນ, ດ້ວຍຄວາມດີໃຈທີ່ຈະໄດ້ພົບກັບມາລິສາອີກຄັ້ງ,ບໍ່ຮູ້ວ່ານາງມີຫຍັງພິເສດຈິ່ງເຮັດໃຫ້ຄຳຕາຕ້ອງຫຼົງໄຫຼເຖິງພຽງນີ້,  ຄຳຕາກໍ່ຄິດສະເໜີວ່ານາງຄົງຈະມີຄວາມຮູ້ສຶກດີໆນັ້ນແກ່ຕົນເຊັ່ນກັນ.

ວັນທີ່ຄຳຕາຄອງຄອຍກໍ່ມາເຖິງ,ຝົນທີ່ລິນເປັນສາຍແຕ່ກາງຄືນຈົນຮອດເຊົ້າບໍ່ໄດ້ເປັນອຸປະສັກແກ່ຄຳຕາເລີຍ,ຄຳ ຕາກັ້ງເອົາຄັນຮົ່ມຍ່າງມຸ້ງໜ້າມາທີ່ດ່ານທ່າແຂກເພື່ອໄປທ່ຽວງານ ຊ່ວງເຮືອຝັ່ງນະຄອນພະນົມເຂົາກ້າວຂາຍ່າງ ລົງເຮືອສາຍຕາແນມໄປທີ່ຝັ່ງໄທເຫັນເຮືອຍາວກຳລັງຊ່ວງເສັງກັນສັງເກດໄດ້ຈາກສີເສື້ອຂອງສີພາຍທີ່ເປັ່ງແສງ ສີຂຽວ,ສີແດງ,ສີຊົມພູເປັນລ້າຍໆເຮືອອອກມາຮອດກາງຂອງຄຳຕານັ່ງບໍ່ຕິດເລີຍຢືນຍິ້ມຫຼຽວທາງຝັ່ງໄທ ຕະຫຼອດເວລາ,ເຮືອມາທຽບຝັ່ງຄຳຕາຟ້າວລົງຈາກເຮືອແລ້ວມຸ້ງໜ້າຂຶ້ນໄປທີ່ງານ,ເສື້ອຜ້າອັນງົດງາມ,ເຄື່ອປະດັບ ເອ້,ຮ້ານອາຫານທີ່ຈັດວາງຢ່າງສວຍງາມຄຳຕາບໍ່ໄດ້ສົນໃຈເລີຍເຂົາໄດ້ແຕ່ຫຼຽວຊ້າຍຫຼຽວຂວາຍ່າງໄປເກືອບທົ່ວງານ,ຈົນເວລາລ່ວງເລີຍໄປເກືອບບ່າຍໂມງການແຂ່ງຂັນເຮືອຊ່ວງກໍ່ຍັງສືບຕໍ່ຊ່ວງເສັງກັນໄປແຕ່ຄຳຕາບໍ່ສົນໃຈ ເລີຍ,ເຂົາໄດ້ມານັ່ງກິນເຝີຢູ່ຮ້ານແຄມຂອງເສັ້ນເຝີທີ່ໜຽວນຸ້ມ,ນ້ຳຕົ້ມທີ່ຫອມຫວນ ກໍ່ບໍ່ຊ່ວຍດຶງດູດໃຈຄຳຕາເລີຍ, ເຂົາກິນເຝີໄດ້ພຽງ 5 ຄຳກໍ່ຢ່າແລ້ວແຕ່ດ້ວຍຄວາມອິດເມື່ອ ຈິ່ງນັ່ງພັກຢູ່ທີ່ນັ້ນ ຊົ່ວຄາວ, ສຽງບາດຕີນຄົນຍ່າງ ບວກກັບສຽງໂຄສົກພາກເຮືອຢູ່ທາງແຄມຂອງນັ້ນດັງມາເປັນໄລຍະຄຳຕາກໍ່ຍັງວົນນຳການກົດໂທລະສັບໄປມາຢູ່ນັ້ນ.

ເປັນຫຍັງຄືໂທບໍ່ໄດ້, ກົດໝົດມື້ແລ້ວແຕ່ກໍບໍ່ໄດ້, ຄຳຕານັ່ງຈົ່ມພື່ມພ່ຳດ້ວຍສຽງຄ່ອຍໆ

ປ້າຊື້ນໍ້າປັ່ນແນ່! ສຽງຍິງສາວຄົນໜຶ່ງ ກໍາລັງຊື້ນໍ້າປັ່ນກັບແມ່ຄ້າຢູ່ຮ້ານຂ້າງໆ, ສຽງນັ້ນຈັ່ງແມ່ນຄຸ້ນເຄີຍແທ້ໆ ຄຳຕາເງີຍໜ້າຂຶ້ນມາເບິ່ງພາຍຫຼັງນັ່ງຊຶງຢູ່ດົນ

- ມາລິສາ!ມາລິສາອີ່ຫຼີຄໍາຕາເວົ້າສຽງຄ່ອຍໆ ພ້ອມທັງຮອຍຍິ້ມ,ຄຳຕາລຸກຂຶ້ນ ກຳລັງຈະເຂົ້າໄປຫາຍິງຄົນນັ້ນ, ແຕ່ເຂົາຕ້ອງຕົກຕະລຶງເມື່ອືເດຫັນພາບນັ້ນ,ຍິງທີ່ເຂົາຕິດຕໍ່ນຳທຸກວັນ,ຍິງທີ່ເຂົາຝາກຄວາມຫວັງໄວ້ນຳ,ກຳລັງ ຄວງແຂນຊາຍໜຸ່ມຄົນໜຶ່ງຍ່າງທ່ຽວງານບຸນຊ່ວງເຮືອ,ຕາທັງສອງໜ່ວຍຂອງຄຳຕາຄ້າງກັບທີ່,ຂາທັງສອງອ່ອຊາ ລົງຈິດໃຈຮ້ອນຮົນປານກັບຖືກໄຟລົນ.

ຕອນນີ້ນ້ອງບໍ່ມີໃຜ ຍັງໂສດຢູ່!  ຄໍາຕາຄິດເຫັນຄຳເວົ້າຂອງມາລິສາ ເຄີຍເວົ້າທາງໂທລະສັບ

-  ນີ້ບໍ ເຂົາວ່າ ຮັກແທ້ແພ້ຄວາມໃກ້ຊິດ!! ຄຳຕາຄິດໃນໃຈພາບທີ່ເຂົາເຫັນໄດ້ລຶບລ້າງຄວາມຕັ້ງໃຈຂອງເຂົາ ຈິ່ງຕັດສິນໃຈກັບມາທ່າແຂກດ້ວຍຄວາມອ່ອນລ້າທັງກາຍແລະໃຈ,ກັບມາຮອດເຮືອນກໍບໍ່ເວົ້າບໍ່ລົມກັບໃຜມາຮອດ ກໍເຂົ້ານອນເລີຍ,9ໂມງກາງຄືນຄຳຕາຍັງນອນມືກ່າຍໜ້າຜາກ,ສຽງໂທລະສັບດັງຂຶ້ນກິ່ງໆໆໆໆໆເຂົາບໍ່ຢາກເຊື່ອ ສາຍຕາເລີຍວ່າເບີທີ່ໂຊນັ້ນເປັນເບີຂອງຍິງທີ່ເຮັດໃຫ້ເຂົາເຈັບຊ້ຳໃຈ

-  ສະບາຍດີ!

- ອ້າຍຄໍາຕາ! ໃສວ່າອ້າຍຈະມາທ່ຽວງານບຸນຊ່ວງເຮືອບ້ານນ້ອງ ມື້ນີ້ນ້ອງຍ່າງເລາະຫາອ້າຍໝົດມື້ເລີຍ ໂທຫາອ້າຍກໍ່ບໍ່ໄດ້.

ຄຳເວົ້າດັ່ງກ່າວມັນຄືໜາມມາຕຳໃສ່ໝາກຫົວໃຈຂອງຄຳຕາເລີຍ, ພາບທີ່ເຂົາເຫັນກັບຄຳເວົ້າທີ່ເຂົາໄດ້ຍິນມັນບໍ່ ກົງກັນເລີຍ.

-  ອ້າຍບໍ່ໄດ້ໄປ    ຄໍາຕາຕອບດ້ວຍປະໂຫຍກສັ້ນໆ

-  ອ້າຍຄາວຽກແມ່ນບໍ້ນ້ອງຄິດແລ້ວບໍ່ຜິດ. ຄວາມລ່າເລີງຕາມແບບປົກກະຕິຂອງມາລິສາ ຈັ່ງແມ່ນມັນທັບຖົມ ຄວາມຫງ່ວມເຫງົາຂອງຄຳຕາແທ້ໆ,ຄຳຕາໄດ້ແຕ່ມິດງຽບໄປດົນເຕີບ.

-  ອ້າຍຄໍາຕາ ! ອ້າຍຄຳຕາ ! ອ້າຍນອນຫຼັບແລ້ວບໍ ? ມາລິສາຖາມ

-  ຍັງເທື່ອ !

-  ມື້ອື່ນນ້ອງຈະໄປທ່ຽວບ້ານອ້າຍເດີ

ຄຳຕາບໍ່ຮູ້ສຶກຫຍັງເລີຍ,ຄຳວ່າມະລິສາຈະມາທ່ຽວບ້ານຂອງຕົນຄຳຕາກໍໜ້າຈະດີໃຈແຕ່ເຂົາພັດເຮັດເສີຍໆບໍ່ຮູ້ສຶກ ວ່າຈະດີໃຈຫຼືເສຍໃຈດີ.ແສງແດດໃນຍາມເຊົ້າເລີ່ມເຈີດຈ້າອອກ,ເມກຢູ່ເທິງຟ້າກໍເປັນກຸ່ມກ້ອນເບິ່ງຄືມັນຕຽມຊິຕົກລົງມາອີກແລ້ວ,ແຕ່ງານອອກພັນສາບຸນຊ່ວງເຮືອທ່າແຂກປີນີ້ຈັ່ງແມ່ນຄຶກຄື້ນອີ່ຫຼີ,ລົດລາງຕາມທ້ອງຖະໜົນຕ່າງ ກໍມຸ້ງໜ້າໄປທີ່ແຄມຂອງຜູ້ຄົນຈາກຕ່າງແຂວງ,ຕ່າງເມືອງກໍຫຼັງໄຫຼເຂົ້າມາທ່ຽວຊົມເບິ່ງໃຜໆກໍໃບໜ້າຍິ້ມແຍ້ມ ແຈ່ມໃສ,ຈັ່ງແມ່ນມັນກົງກັນຂ້າມກັບຄຳຕາແທ້ໆ.

ຄຳຕານັ່ງຢູ່ແຄມຂອງກ້ອງຮົ່ມຕານຕາລ່ຳມອງໄປທີ່ເຮືອຂົນສົ່ງຜູ້ໂດຍສານມາຈາກຝັ່ງໄທເປັນຂະບວນລຳໃດກໍ ເຕັມຫຼັງໄຫຼມາເປັນຍ່ານໆ.

ວັນນີ້ຄຳຕາກໍອອກມາຄົນດຽວດັ່ງເຄີຍ.ເຮົາຍັງມີຫວັງຢູ່ບໍຫຼືວ່າເຮົາໃກ້ຈະໝົດຫວັງ,ຄຳຕານັ່ງຄິດຄົນດຽວ,ເກືອບ ຕາເວັນທ່ຽງຄຳຕາຍັງນັ່ງຢູ່ທີ່ນັ້ນເຂົາກຳລັງແນມໄປເບິ່ງເຮືອຊ່ວງກຳລັງຊິງກັນຢູ່ກາງວັງດ້ວຍໃຈຈົດໃຈຈໍ່,ບວກ ກັບສຽງພາກເຮືອຂອງບ່າວເອກະໄຊຈັ່ງແມ່ນຄັກແທ້ໆທິວທັດສະນີຍະພາບອັນງົດງາມໄດ້ຖືກປິດມືດມິດດ້ວຍມື ທັງສອງຂ້າງມາແຕ່ທາງດ້ານຫຼັງຂອງຄຳຕາ, ຄຳຕາຕົກໃຈ ແລະ ມິດງຽບໄປຄາວໜຶ່ງ.

-  ຄືມານັ່ງຄົນດຽວແນວນີ້! ? ສຽງຍິງສາວເວົ້າອກມາເບົາໆ ພ້ອມສຽງຫົວສະອິກສະອ້ອຍ

-  ມາລິສາ ນ້ອງມາກັບໃຜ? ຄຳຕາຖາມພາຍຫຼັງໄດ້ເອົາມືທີ່ປິດຕາຂອງຕົນອອກ

- ພຸ້ນເດ ! ນ້ອງມາສອງຄົນ.  ມາລິສາຊີ້ໄປທີ່ຊາຍໜຸ່ມທີ່ກໍາລັງເລືອກແຜ່ນຊີດີຢູ່ຮ້ານກົງກັນຂ້າມ,ຄຳຕາຫຼຽວ ເຫັນຍິ່ງເຈັບຊ້ຳເຂົ້າໃນວ່າງໃຈຕື່ມອີກ

-  ຢູ່ພຸ້ນກໍ່ເຮັດໃຫ້ເຈັບແລ້ວ, ມາພີ້ກໍ່ຍັງນຳມາອີກບໍ ! ຄໍາຕາຄິດໃນໃຈແລ້ວຖາມມາລິສາວ່າ:

-  ມາລິສາເປັນຫຍັງນ້ອງບໍ່ບອກເລື່ອງນີ້ກັບອ້າຍເລີຍ?

-  ແມ່ນເລື່ອງຫຍັງ ນ້ອງບໍ່ເຫັນຈະເຂົ້າໃຈ ?

-  ນ້ອງຮູ້ບໍວ່າອ້າຍຕັ້ງຄວາມຫວັງໄວ້ນໍາເຈົ້າຫຼາຍພຽງໃດ? ມາລິສາໄດ້ຍິນຄາຕາເວົ້າກໍ່ໄດ້ແຕ່ຍິ້ມ ສ່ວນຄຳຕາ ເບິ່ງຄືຊິຢາກເຜີຍຄວາມໃນໃຈເຕັມທີແລ້ວ

ມາລິສາ ໄປ໋ ໄປເບິ່ງເຂົາແຂ່ງເຮືອທາງດ້ານພຸ້ນ. ຊາຍໜຸ່ມຄົນນັ້ນມາຈັບແຂນມາລິສາແລ້ວຊວນໄປມາລິສາ ລຸກຂຶ້ນພ້ອມຈັບແຂນຄຳຕາ

- ໄປທ່ຽວທາງນັ້ນນໍາກັນເນາະອ້າຍ ! ມາລິສາຊວນ

- ພວກນ້ອງໄປສາ ອ້າຍຈະນັ່ງຢູ່ທີ່ນີ້.

ທັງສອງກໍ່ພາກັນໄປເບິ່ງຊ່ວງເຮືອທາງດ້ານຝາມໄຊ,ຄຳຕາແນມນຳພາບຂອງຍິງທີ່ຕົນຮັກຍ່າງຄຽງຂ້າງຊາຍໜຸ່ມ  ເຫັນຍາມໃດກໍ່ເຈັບຍາມນັ້ນ,ເຮົານີ້ຄົງຈະເຈັບແລ້ວເຈັບອີກເຈັບເລື້ອຍໆໄປຊັ້ນບໍ!! ຄໍາຕາຈົ່ມເວລາຜ່ານໄປເກືອບ  ບ່າຍສອງໂມງແລງຄຳຕາກໍ່ຍັງນັ່ງຢູ່ທີ່ເກົ່າ,ດ້ວຍຄວາມແປກໃຈເປັນຫຍັງຄຳຕາຈິ່ງຊຶມເສົ້າແນວນັ້ນ,ມາລິສາຍ່າງ   ກັບມາກໍຍັງເຫັນຄືເກົ່າ ຈິ່ງເຂົ້າໄປຫາອີກພ້ອມກັບຊາຍໜຸ່ມຄົນນັ້ນ.

-  ອ້າຍຄໍາຕາດື່ມນໍ້າເຢັນໆອ້າຍ ! ມາລິສາຍື່ນນໍ້າດື່ມກາຫົວເສືອໃຫ້ເຮັດໃຫ້ຄຳຕາອົດຄິດເຫັນ ພາບທີ່ເຂົາພົບ ກັບມາລິສາຄັ້ງທຳອິດບໍ່ໄດ້.

-  ອ້າຍເປັນຫຍັງຄືເຮັດໃບໜ້າເສົ້າແທ້?

-  ບໍ່ມີຫຍັງດອກ ພຽງແຕ່ຂ້ອຍຄິດຫຍັງໄປເພີນໆເທົ່ານັ້ນ

- ໄປ໋ລຸກຍ່າງໄປນໍາກັນ!ເທື່ອນີ້ມາລິສາຕ້ອງດຶງແຂນຄໍາຕາໄປພ້ອມ,ຊາຍໜຸ່ມຄົນນັ້ນກໍ່ໄດ້ແຕ່ຍີ້ມແລະສົ່ງສາຍ ຕາແບບເປັນມິດໃຫ້ແກ່ຄຳຕາ.

-  ຢູ່ບ້ານອ້າຍນີ້ຈັ່ງແມ່ນເປັນລະບຽບຈົບງາມແທ້ເນາະ! ມາລິສາເວົ້າຂຶ້ນ ຄໍາຕາກໍໄດ້ແຕ່ງຶກຫົວ, ທັງສາມຄົນ ຍ່າງໄປລົມກັນໄປຈົນຮອດເວລາ 4 ໂມງເຄິ່ງມາລິສາຕ້ອງກັບແລ້ວຈິ່ງຍ່າງໄປທີ່ທ່າເຮືອກຽມທີ່ຈະລົງເຮືອ, ພາບທີ່ປຽບເໜືອນທະນູໄຟກໍ່ພຸ່ງມາໃສ່ໃຈຂອງຄຳຕາອີກແລ້ວມາລິສາລົງເຮືອໄປພ້ອມກັບຄວງແຂນຊາຍຄົນນັ້ນ,ນາງຫຼຽວຫຼັງໂບກມືລາພ້ອມສົ່ງຮອຍຍິ້ມ,ຫຼັງຈາກມະລິສາລົງເຮືອແລ້ວຄຳຕາກໍ່ຍ່າງຂຶ້ນມານັ່ງຢູ່ຂ້າງໆດ່ານ ຍິ່ງຄິດກໍ່ຍິ່ງເຈັບ, ບາງເວລາຈົນເຖິງຂັ້ນກັ້ນນ້ຳຕາໄວ້ ເວລາຜ່ານໄປເກືອບ10 ນາທີ.

-  ອ້າວ! ອ້າຍຄຳຕາ  ບໍ່ທັນເມືອບໍ?

-  ມາລີສາຂຶ້ນມາຫຍັງ ຄືບໍ່ທັນເມືອ?  ຄໍາຕາຖາມຄືນ

-  ນີ້ເດ! ນ້ອງຂຶ້ນມາຊື້ອັນນີ້ໃຫ້ພີ່ຊາຍ. ມາລິສາຍົກເບຍລາວ(ເບຍປ໋ອງ) ສອງປ໋ອງໃຫ້ເບິ່ງ

-  ພີ່ຊາຍ...ພີ່ຊາຍ...  ອ້າຍ!!! ຊາຍຄົນນັ້ນເປັນອ້າຍຂອງນ້ອງເບາະ? ຄໍາຕາຖາມຂຶ້ນດ້ວຍນ້ຳສຽງທີ່ດັງ

-  ແລ້ວອ້າຍຄິດວ່າເຂົາເປັນຫຍັງກັບນ້ອງລະ?

 ຄຳຕາເລີ່ມມີສີໜ້າຍິ້ມແຍ້ມແຈ່ມໃສອອກມາອີກຄັ້ງ,ເຂົາດີໃຈເກືອບຫ້າມຕົນເອງບໍ່ໄດ້ທີ່ຈະແລ່ນເຂົ້າໄປກອດຍິງ ສາວຄົນນັ້ນ.

-  ອ້າຍໂລດ ຄິດວ່າ:.....!!!

-  ເປັນແຟນນ້ອງແມ່ນບໍ່?  ສົມພໍດອກຈິ່ງໜ້າບູດໜ້າບຶ້ງ  ນ້ອງບໍ່ມີໃຜດອກ ມີແຕ່ອ້າຍນີ້ແຫຼະ ! ມາລິສາເວົ້າ ທັງຮອຍຍິ້ມແບບເຂີນໆ

-  ບໍ່ຟ້າວເມືອບໍ່ໄດ້ບໍ? ອ້າຍມີເລື່ອງຫຼາຍໆເລື່ອງຢາກລົມນຳ

-  ບໍ່ໄດ້ດອກເຮືອນັ້ນຖ້ຽວສຸດທ້າຍແລ້ວນ້ອງຕ້ອງໄປກ່ອນເດີ້

ຄຳຕາຈັບມືມາລິສາໄວ້

-  ຫວັງວ່າຈະໄດ້ພົບເຈົ້າອີກໃນໄວໆນີ້. ຄໍາຕາເວົ້າພ້ອມຈ້ອງໄປທີ່ທສອງຕາຂອງຍິງທີ່ຢູ່ຕໍ່ໜ້າເຂົາ

-  ໂອຍ! ດ໋ຽວງານເປີດຂົວມິດາຕະພາບສາມນີ້ ກໍພົບກັນອີກຫັ້ນແລະ !  ແຕ່ຢ່າລືມໂທຫາເດີ.

-  ອ້າຍຈະໂທຫາເຈົ້າທຸກວັນເລີຍ

ມະລິສາກ້າວຂາຍ່າງລົງເຮືອຈາກໄປ,ເຮືອຖ້ຽວສຸດທ້າຍໄດ້ມຸ້ງໜ້າໄປທີ່ດ່ານນະຄອນພະນົມຜ່ານກະ ແສຟອງນ້ຳທີ່ລົມພັດພາມາເປັນຄື້ນໆ,ຄຳຕາຢືນແນມເຮືອລຳນັ້ນພ້ອມຮອຍຍິ້ມເຮືອໄດ້ຫ່າງອອກເທື່ອລະໜ້ອຍ ຈົນສຸດສາຍຕາເຫຼືອພຽງພາບພໍຄິມມິມເທົ່ານັ້ນ.

ຊາຍທີ່ໂສກເສົ້າຫງ່ວມເຫງົາໄດ້ສົດຊື່ນຂຶ້ນມາແຕ່ລະວັນກໍ່ໄດ້ແຕ່ພົວພັນກັບມາລິສາທາງໂທລະສັບເທົ່ານັ້ນແລະ ຄິດສະເໜີວ່າຈະໄດ້ພົບກັບມາລິສາຍິງທີ່ຮັກໃນງານວັນເປີດຂົວມິດຕະພາບສາມຄຳມ່ວນ-ນະ ຄອນພະນົມຢ່າງແນ່ນອນ. ( ຈົບ )

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?