ໜ້າຫຼັກ >> ສືບສານວັດທະນະທໍາ >> ເມືອງທ່າແຂກພ້ອມແລ້ວໃນການຈັດງານ ບຸນອອກພັນສາ ແລະ ຊ່ວງເຮືອປະຈໍາປີ 2015
ເມືອງທ່າແຂກພ້ອມແລ້ວໃນການຈັດງານ ບຸນອອກພັນສາ ແລະ ຊ່ວງເຮືອປະຈໍາປີ 2015
ວັນທີ 22 ຕຸລາ 2015 - ເວລາ 10:35:58 ເບິ່ງ 786 ຄຳເຫັນ 0

 

    ທ່ານ ຈັນ ບຸບຜາ​ລີ​ວັນ ​ເຈົ້າ​ເມືອງໆ​ທ່າ​ແຂກ​ ​ໃນ​ນາມ​ຄະນະ​ປະທານ​ຈັດ​ງານ​ບຸນ​ປະ​ເພນີ​ອອກ​ພັນ​ສາ ​ແລະ ຊ່ວງ​ເຮືອ​ປະ​ຈໍາປີ 2015 ໄດ້​ກ່າວ​ຕໍ່​ຜູ້​ສື່​ຂ່າວ​ທ້ອງ​ຖິ່ນ​​ໃນ​ຕອນ​ແລງ​ຂອງ​ວັນ​ທີ 20 ຕຸລາ 2015 ກ່ຽວ​ກັບ​ການຫ້າງ​ຫາ​ກະກຽມ​ຄວາມ​ພ້ອມຂອງ​ການຈັດ​ງານ​​ເຊິ່ງທ່ານ​ໄດ້​ກ່າວ​ວ່າ : ​ເພື່ອ​ເປັນ​ການ​ເສີມ​ຂະຫຍາຍ​ມູນ​ເຊື້ອ ​ແລະ ອານຸລັກ​ຮັກສາ​ຮີດຄອງ​ປະ​ເພນີ​ອັນ​ດີງາມ​ຂອງ​ຊາດ​ເວົ້າ​ລວມ,​ ເວົ້າ​ສະ​ເພາະຂອງປະ​ຊາ​ຊົນ​ລາວ​ບັນດາ​ເຜົ່າ​ເມືອງ​ທ່າ​ແຂກ​ແຂວງ ​ຄໍາ​ມ່ວນ​ທີ່​ໄດ້​ສືບ​ທອດ​ກັນ​ມາ​ແຕ່​ບູຮານ​ນະການ​ໃຫ້​ຄົງ​ຢູ່​ກັບ​ສັງຄົມ​ລາວ​ຕະຫຼອດ​ໄປ ທາງ​ເມືອງ​ທ່າ​ແຂກ​ກໍ່​ໄດ້​ສົມທົບ ກັບ​ຄະນະ​ພັກ ​ແລະ ຄະນະ​ນໍາ​ຂັ້ນ​ແຂວງ​ເພື່ອ​ແຕ່ງ​ຕັ້ງ​ຄະນະ​ກໍາມະການ​ຮັບຜິດຊອບ ​ແລະ ອະນຸ​ກໍາມະການ​ຕ່າງໆ​ຂຶ້ນ​ພ້ອມ​ທັງ​ໄດ້​ເຊີນ​ບັນດາຄະນະ​ກໍາມະການ​ຮັບຜິດຊອບ ​ແລະ ອະນຸ​ກໍາມະການ​ຕ່າງໆມາ​ປະຊຸມ​ປຶກສາ​ຫາລື ​ແລະ ​ແບ່ງ​ຄວາມ​ຮັບຜິດຊອບ​ໃຫ້​ແຕ່​ລະ​ອະນຸ​ກໍາມະການ​ ນໍາ​ໄປ​ຈັດ​ຕັ້ງ​ປະຕິບັດ​ການ​ຫ້າງ​ຫາ​ກະກຽມ​ຈັດ​ງານ​ບຸນ​ປະ​ເພນີ​ອອກ ພັນ​ສາ ​ແລະ ຊ່ວງ​ເຮືອ​ປີ​ນີ້​ໂດຍ​ໄດ້​ແບ່ງ​ຄວາມ​ຮັບຜິດຊອບ​ອອກ​ເປັນ 11 ພາກສ່ວນ ​ແລະ ມອບ​ໃຫ້​ອະນຸ​ກອງ​ເລຂາ ​ເຮັດ​ໜ້າ​ທີ່​ໃນ​ການ​ປະສານ​ງານ​ກັບ​ແຕ່​ລະ​ອະນຸ​ກໍາມະການ ​ແລະ ປະຕິບັດ​ຕາມ​ພາລະ​ບົດບາດ​ຂອງ​ຕົນ​ໂດຍ​ເລີ້ມ​ຈາກ​ການ​ສ້າງ​ບັນດາ​ນິຕິ​ກໍາ​ຕ່າງໆ​ເຊັ່ນ : ​ໃບ​ສະ​ເໜີ , ໜັງສື​ແຈ້ງ​ຂ່າວ​ບຸນ , ​ແຈ້ງ​ລາງວັນ​ເຮືອ​ຊ່ວງ​ປະ​ເພດ​ໃຫຍ່ -ກາງ - ນ້ອຍ,​ເຮືອ​ໄຟ , ​ເສັງ​ກອງ , ​ແຈ້ງ​ລະບຽບ​ການ​ທ່ຽວ​ງານ , ​ແຈ້ງ​ຈຸດ​ບໍລິການ ​ແລະ ​ແຈ້ງ​ການ​ອື່ນໆ .

    ​ໃນ​ງານ​ບຸນ​ປະ​ເພນີ​ອອກ​ພັນ​ສາ ​ແລະ ຊ່ວງ​ເຮືອ​ໃນ​ປີ​ນີ້ກໍານົດ​ເວລາ 3​ ວັນຄື​ເລີ້ມ​ແຕ່​ວັນ​ທີ 25 – 27 ຕຸລາ 2015 ​ແລະ ກໍານົດ​ກິດຈະ​ກໍາ​ໃນ​ງານ​ບຸນ​ທັງ​ໝົດ​ມີ 3 ກິດຈະ​ກໍາ​ຄື : ​ແຂ່ງຂັນ​ເຮືອ​ຊ່ວງ​ປະ​ເພນີ , ປະ​ກວດກາ​ນ​ໄຫຼ ​ເຮືອ​ໄຟ , ​ເສັງ​ກອງ​ແຕ້ - ກອງ​ຈິງ . ນອກຈາກ​ນັ້ນ​ພາຍ​ໃນ​ງານ​ຍັງ​ໄດ້​ມີ​ການຈັດການວາງຂາຍ​ສິນຄ້າປະ​ເພດ​ຕ່າງໆ​ທັງ ພາຍ​ໃນ ​ແລະ ຕ່າງປະ​ເທດ .

  ການ​ຈັດການ​ແຂ່ງຂັນ​ເຮືອ​ຊ່ວງ​ປະ​ເພນີ​ປີ​ນີ້​ໄດ້​ແບ່ງການ​ແຂ່ງຂັນ​ອອກ​ເປັນ 3 ປະ​ເພດມີ​ຈໍານວນ​ທັງ​ໝົດ 58 ລໍາ​ຄື : ປະ​ເພດ​ເຮືອ​ໃຫຍ່ລຸ້ນ 50 – 55 ສີພາຍ ມີ 9 ລໍາ , ປະ​ເພດ​ກາງ​ລຸ້ນ 30 – 35 ສີພາຍ​ມີ 24 ລໍາ , ປະ​ເພດ​ນ້ອຍ​ລຸ້ນ 10 – 12 ສີພາຍ​ມີ 21 ລໍາ ​. ນອກຈາກ​ການ​ແຂ່ງຂັນ​ເຮືອ​ປະ​ເພນີ​ແລ້ວ​ໃນ​ປີ​ນີ້​ເມືອງ​ທ່າ​ແຂກ ​ແລະ ນະຄອນ​ພະນົມ ກໍ່​ໄດ້​ຈັດ​ໃຫ້​ມີ​ການ​ແຂ່ງຂັນ​ເຮືອ​ຊ່ວງ​ມິດຕະພາບ​ຕາມ​ການ​ເຊື້ອ​ເຊີນ​ຂອງ​ທັງ​ສອງ​ຝ່າຍ 4 ລໍາ .

      ທ່ານເຈົ້າເມືອງທ່າແຂກໄດ້ກ່າວຕື່ມວ່າ : ເພື່ອເປັນການອະນຸລັກຮັກສາຮີດຄອງປະເພນີມູນເຊື້ອວັດທະນະທໍາ ອັນດີງາມຂອງຊາດທີ່ ເຄີຍສືບທອດກັນມາແຕ່ບູຮານນະການນັ້ນກໍ່ໄດ້ຈັດໃຫ້ມີການປະກວດໄຫຼເຮືອໄຟເຊິ່ງທາງຄະ ນະກໍາມະການຮັບຜິດຊອບເຮືອໄຟໄດ້ລົງສົມທົບກັບບັນດາເມືອງ , ພະແນກການຕະຫຼອດຮາກຖານບ້ານເພື່ອຊຸກຍູ້ ປຸກລະດົມບັນດາເມືອງ , ພະແນກການ , ກຸ່ມບ້ານຕະຫຼອດຮອດຫົວໜ່ວຍທຸລະກິດໃຫ້ສົ່ງເຮືອໄຟເຂົ້າປະກວດໃນ ງານບຸນປະເພນີອອກພັນສາ ແລະ ຊ່ວງເຮືອປະຈໍາປີ 2015 ນີ້ ຄາດວ່າຈະມີເຮືອໄຟເຂົ້າຮ່ວມງານປະກວດຈໍານວນ 11 ລໍາ , ໃນນີ້ບັນດາເມືອງໃນທົ່ວແຂວງມີ 10 ລໍາ ແລະ ຮາກຖານກຸ່ມເທສະບານເມືອງທ່າແຂກມີ 1 ລໍາ . ດ້ານການ ແຂ່ງຂັນກອງແຕ້ - ກອງຈິງກໍ່ແມ່ນກິລາພື້ນເມືອງປະເພດໜຶ່ງທີ່ໄດ້ສືບທອດ ແລະ ເສີມຂະຫຍາຍວັດທະນະທໍາອັນດີ ງາມ ສະນັ້ນທາງຄະນະກໍາມະການກໍ່ເຊື້ອເຊີນບັນດາເມືອງ , ບ້ານທີ່ເຄີຍເຂົ້າຮ່ວມແຂ່ງຂັນເສັງກອງແຕ້ - ກອງຈິງເຊິ່ງ ໃນປີນີ້ມີກອງແຕ້ - ກອງຈິງເຂົ້າຮ່ວມແຂ່ງຂັນທັງໝົດມີ 27 ຄູ່ ໃນນີ້ມີກອງແຕ້ 12 ຄູ່ ແລະ ກອງຈິງ 15 ຄູ່ .

   ​ໃນ​ການຈັດ​ງານ​ບຸນ​ອອກ​ພັນ​ສາ ​ແລະ ຊ່ວງ​ເຮືອ​ໃນ​ປີ​ນີ້​ຄາດ​ຄະ​ເນ​ການ​ສິ້ນ​ເປືອງ​ທາງ​ດ້ານ​ງົບປະມານ​ທັງ​ໝົດ 600 ລ້ານ​ກີບ , ​ໃນ​ນີ້​ຈະ​ນໍາ​ໃຊ້​ເພື່ອ​ເປັນ​ຂອງຂວັນ​ລາງວັນ​ເຮືອ​ຊ່ວງ , ​ເຮືອ​ໄຟ , ​ເສັງ​ກອງ​ແຕ້ - ກອງ​ຈິງ,ຄ່າ​ທຽບ​ທ່າ , ອັດຕາ​ກິນ​ຂອງ​ສີພາຍ​ເຮືອ​ຊ່ວງ ​ແລະ ຈ່າຍ​ສິ້ນ​ເປືອງ​ບໍລິຫານ​ຮັບ​ໃຊ້​ບັນດາ​ກິດຈະ​ກໍາ​ຕ່າງໆ​ໂດຍ​ລວມ​ແລ້ວ​ເຫັນ​ວ່າ ການ​ກະກຽມ​ງານ​ບຸນ​ປະ​ເພນີ​ອອກ​ພັນ​ສາ ​ແລະ ຊ່ວງ​ເຮືອ​ປີ​ນີ້​ຂັ້ນ​ພື້ນຖານ​ເຫັນ​ວ່າ​ມີ​ຄວາມ​ພ້ອມ​ແລ້ວ , ​ແຕ່​ທາງ​ດ້ານ​ທຶນຮອນ​ວັດຖຸ , ​ເງິນສົດ​ທີ່​ປະກອບ​ເຂົ້າ​ເປັນ​ຂອງຂວັນ​ລາງວັນ​ຍັງ​ບໍ່​ທັນ​ໄດ້​ຕາມ​ແຜນ​ຄາດ​ຄະ​ເນ​ລາຍ​ຈ່າຍ​ໂດຍ​ສະ​ເພາະ​ແມ່ນ​ບັນດາ​ຂອງຂວັນ​ລາງວັນ​ຕ່າງໆ​ສະ​ນັ້ນ​ຈິ່ງ​ຮຽກຮ້ອ​ງມາ​ຍັງ​ບັນດາ​ເມືອງ , ບັນດາ​ພະ​ແນ​ກການ , ສະມາຄົມ , ຫ້ອງ​ການ , ຫົວໜ່ວຍ​ທຸລະ​ກິດ , ບໍລິສັດ , ຫ້າງ​ຮ້ານ ​ແລະ ຜູ້​ປະກອບ​ການ​ຕ່າງໆ​ຈົ່ງ​ໃຫ້ການ​ປະກອບ​ສ່ວນ​ສະໜັບສະໜູນ​ເພື່ອ​ເຮັດ​ໃຫ້​ງານ​ບຸນ​ປະ​ເພນີ​ອອກ​ພັນ​ສາ ​ແລະ ຊ່ວງ​ເຮືອ​ປະ​ຈໍາປີ 2015 ນີ້​ໄດ້​ປະສົບ​ຜົນ​ສໍາ​ເລັດ​ຢ່າງ​ຈົບງາມ .

                                                                       ຂ່າວ - ພາບ​ໂດຍ :​ ແດງ​ສະຫວັດ ​ແສນ​ພານິດ .

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?