ໜ້າຫຼັກ >> ແນະນໍາແຫຼ່ງທ່ອງທ່ຽວພາຍໃນແຂວງຄໍາມ່ວນ >> ຖ້ຳກອງລໍ ຄຽງຄູ່ກັບປ່ຽນແປງຊີວິດຂອງປະຊາຊົນ
ຖ້ຳກອງລໍ ຄຽງຄູ່ກັບປ່ຽນແປງຊີວິດຂອງປະຊາຊົນ
ວັນທີ 25 ສິງຫາ 2015 - ເວລາ 14:35:45 ເບິ່ງ 1361 ຄຳເຫັນ 0

ຖ້ຳກອງລໍ ຕາມການເລົ່າຂານກັນມາວ່າ: ໃນສະໄໝຂຸນບໍລົມປະຖົມກະສັດລາວລ້ານຊ້າງ ກອງທັບຂຸນລໍຈາກເມືອງຊວາ (ຫຼວງພະບາງ) ໄດ້ມາຕັ້ງທັບເພື່ອລໍຖ້າ ຂຸນເຈັດເຈືອງຈາກເມືອງພວນ (ຊຽງຂວາງ) ເພື່ອພ້ອມກັນໄປຊ່ວຍຂຸນລົກກົມ ເຈົ້າຄອງນະຄອນສີໂຄດຕະບອງ (ຄຳມ່ວນ) ເຕົ້າໂຮມແຜ່ນດິນໃນສະຖານທີ່ເຊິ່ງເປັນທີ່ຕັ້ງຂອງບ້ານກອງລໍໃນປະຈຸບັນ ດັ່ງນັ້ນຈຶ່ງເອີ້ນຖ້ຳດັ່ງກ່າວວ່າ: “ຖ້ຳກອງລໍ” ເຊິ່ງເປັນຖໍ້າທີ່ເກີດຈາກນ້ຳຫີນບູນໄຫຼລອດຊອດອອກມາຕາມສາຍພູທີ່ຂັ້ນກັນລະຫວ່າງບ້ານນາຕານ ເມືອງນາກາຍ ແລະ ບ້ານກອງລໍ ເມືອງຄູນຄຳ ແຂວງຄຳມ່ວນມີຄວາມຍາວປະມານ 7.500 ແມັດ, ຢູ່ໃນຖ້ຳຈະມີຫີນຍ້ອຍ, ແກ້ງຫີນ, ຫາດຊາຍ, ອາກາດເຢັນ ແລະ ມືດສະນິດ.

ນອກຈາກເປັນແຫຼ່ງທ່ອງທ່ຽວມະຫັດສະຈັນທີ່ມີສື່ສຽງລະດັບຊາດແລ້ວ ຖໍ້າກອງລໍຍັງເປັນບ່ອນທີ່ສ້າງວຽກເຮັດງານທຳໃຫ້ແກ່ປະຊົນພາຍໃນບ້ານໃຫ້ມີລາຍຮັບທີ່ສູງຂຶ້ນ ແລະ ເປັນລາຍຮັບທີ່ຍືນຍົງ. ພາຍຫຼັງທີ່ມີການເປີດແຫຼ່ງທ່ອງທ່ຽວດັ່ງກ່າວໃນປີ 2002 ພັກ-ລັດຖະບານ ລວມທັງອົງການຈັດຕັ້ງສາກົນຕ່າງໆ ໄດ້ໃຫ້ການສະໜັບສະ ໜູນເຂົ້າໃນການຈັດຕັ້ງປະຕິບັດແຜນງານ, ໂຄງການ ແລະ ກິດຈະກຳຕ່າງໆ ເພື່ອເຮັດໃຫ້ແຫຼ່ງທ່ອງທ່ຽວດັ່ງກ່າວມີ ຫຼາກຫຼາຍສີສັນ ໂດຍການທ່ອງທ່ຽວແບບປະຊາຊົນມີສ່ວນຮ່ວມ ເຊິ່ງອົງການປົກຄອງຂັ້ນເມືອງໄດ້ແຕ່ງຕັ້ງຄະນະຊີ້ນຳ ແລະ ຄະນະຮັບຜິດຊອບໃນກຸ່ມຕ່າງໆ ໂດຍສະມາຊິກພາຍໃນກຸ່ມແມ່ນໃຊ້ແຮງງານຂອງປະຊາຊົນ ໃນບ້ານເພື່ອສ້າງວຽກເຮັດງານທຳທັງເປັນການສ້າງລາຍຮັບໃຫ້ເຂົ້າສູ່ປະຊາຊົນໂດຍກົງ. ເຊິ່ງປະກອບມີກຸ່ມຮັບແຂກ, ກຸ່ມແຕ່ງກິນ, ກຸ່ມປູກຜັກປອດສານຜິດ ເພື່ອຮອງຮັບນັກທ່ອງທ່ຽວທີ່ມາພັກແຮມຄືນ, ກຸ່ມໂຮມສະເຕ, ກຸ່ມນຳທ່ຽວ, ກຸ່ມຝາກລົດ, ກຸ່ມເຮືອນພັກ-ຮ້ານອາຫານ, ກຸ່ມຫັດຖະກໍາ ແລະ ສະມາຄົມເຮືອ ໃນແຕ່ລະກຸ່ມນັ້ນຈະຄອຍບໍລິການນັກທ່ອງທ່ຽວຕາມພາລະ ບົດບາດຂອງໃຜລາວ ໂດຍສະເພາະແມ່ນກິດຈະກຳຂີ່ເຮືອລອດຖ້ຳ ການເຂົ້າຊົມຖໍ້າຕ້ອງໄດ້ໃຊ້ເຮືອຈັກຫາງຍາວຂອງຊາວບ້ານ (ເຮືອນໍາທ່ຽວ) ເພື່ອຊົມຄວາມສວຍງາມພາຍໃນຖ້ຳ ເຊິ່ງກິດຈະກຳດັ່ງກ່າວແມ່ນຂີ່ເຮືອຈາກປາກຖ້ຳບ້ານກອງລໍ-ປາກຖ້ຳບ້ານນາຕານ ໄປ-ກັບ ຈະໃຊ້ເວລາປະມານ 2 ຊົ່ວໂມງເຄິ່ງ, ແຕ່ຖ້ານັກທ່ອງທ່ຽວທ່ານໃດມັກໃນການທ່ອງທ່ຽວແບບພະຈົນໄພ ໂດຍການຍ່າງຂ້າມຜາຈາກບ້ານກອງລໍ-ບ້ານນາຕານ ແລະ ພັກແຮມຄືນຢູ່ບ້ານນາຕານ ແລ້ວລ່ອງເຮືອກັບບ້ານກອງລໍ ໂດຍຈະໃຊ້ເວລາ 2 ວັນກັບ 1 ຄືນ, ກິດຈະກໍາລ່ອງເຮືອແຕ່ປາກຖ້ຳບ້ານກອງລໍ ລ່ອງລົງຕາມສາຍນ້ຳຫີນບູນ ເພື່ອຊົມທິວຖັດທຳມະຊາດລະຫວ່າງ 2 ຝັ່ງນ້ຳຫີນບູນ ລົງຮອດບ້ານນາກາງແລ້ວກັບຄືນ ໃຊ້ເວລາ 1 ວັນເຕັມ. ນອກນັ້ນຍັງມີການທ່ອງທ່ຽວເພື່ອຊົມວິຖີຊີວິດ, ຮີດຄອງປະເພນີຂອງປະຊາຊົນ ຫຼື ເອີ້ນວ່າ: “ໂຮມສະເຕ” ກິດຈະກຳນີ້ແມ່ນຈະມີການດຳລົງຊີວິດຢູ່ກັບປະຊາຊົນ, ກິນ, ຢູ່, ພັກເຊົາຮ່ວມກັບປະຊາຊົນ. ຈາກກິດຈະກຳຕ່າງໆບວກກັບຄວາມສວຍງາມຂອງທຳມະຊາດບໍ່ວ່າຈະຢູ່ໃນຖໍ້າ ຫຼືທຳມະຊາດໃນບໍລິເວນອ້ອມຮອບຖໍ້າຈົນສາມາດດຶງດູດຈິດໃຈຂອງນັກທ່ອງທ່ຽວໄດ້ດີ ແລະ ຕົວເລກຂອງນັກທ່ອງທ່ຽວທີ່ເຂົ້າມາໃຊ້ບໍລິການແມ່ນເພີ່ມຂຶ້ນໃນທຸກໆປີຄື: ໃນປີ 2012 ມີນັກທ່ອງທ່ຽວຈຳນວນ 9 ພັນກວ່າເທື່ອຄົນ, ປີ 2013 ມີ 16 ພັນເທື່ອຄົນ ສະເພາະ ປີ 2014 ມີ 65 ພັນເທື່ອຄົນ ສາມາດສ້າງລາຍຮັບໄດ້ເຖິງ 5 ຕື້ກວ່າກີບ ສະເລ່ຍລາຍຮັບໃສ່ຫົວຄົນ 18 ລ້ານກີບຕໍ່ຄົນຕໍ່ປີ. ໃນນັ້ນເຮືອນຳທ່ຽວສ້າງລາຍຮັບໄດ້ 2 ຕື້ກີບ, ບໍລິການເຮືອນພັກ 1 ຕື້ກີບ, ຮ້ານອາຫານ 547 ລ້ານກີບ, ໂຮມສະເຕ 75 ລ້ານກີບ, ກຸ່ມນຳທ່ຽວ 42 ລ້ານກີບ, ກຸ່ມຫັດຖະກຳ 37 ລ້ານກີບ, ກຸ່ມຝາກລົດ 22 ລ້ານກີບ ແລະ ສະມາຄົມລົດໂດຍສານ 375 ລ້ານກີບ ຈາກລາຍຮັບດັ່ງກ່າວເຮັດໃຫ້ບ້ານກອງລໍມີໂສມໜ້າໃໝ່, ປະຊາຊົນມີລາຍຮັບທີ່ໝັ້ນຄົງ, ຊີວິດການເປັນຢູ່ດີຂຶ້ນເປັນກ້າວໆ ປະຈຸບັນບ້ານກອງລໍມີສູນຂໍ້ມູນຂ່າວສານ 1 ແຫ່ງ, ມີເຮືອນພັກ 9 ແຫ່ງ ໃນນີ້ມີເຮືອນພັກລວມຂອງບ້ານ 1 ແຫ່ງ, ກຸ່ມໂຮມສະເຕ 31 ຫຼັງ ສາມາດຮອງຮັບນັກທ່ອງທ່ຽວພັກຄ້າງຄືນໄດ້ 340 ຄົນຕໍ່ຄືນ, ມີຮ້ານອາຫານ 10 ແຫ່ງ, ສະມາຄົມເຮືອນຳທ່ຽວ 1 ສະມາຄົມ, ກຸ່ມນຳທ່ຽວ 1 ກຸ່ມ, ກຸ່ມຫັດຖະກຳຕໍ່າຫູກ 1 ກຸ່ມ, ສະມາຄົມລົດໂດຍສານ 1 ສະມາຄົມ ນອກນັ້ນ ຍັງມີກອງທຶນພັດທະນາການທ່ອງທ່ຽວ 1 ກອງທຶນ ມີເງິນຈຳນວນ 60 ລ້ານກວ່າກີບ, ກອງທຶນສົ່ງເສີມການປູກຝັງ-ລ້ຽງສັດ 1 ກອງທຶນ ມີເງິນຈຳນວນ 80 ລ້ານກວ່າກີບ ແລະ ໄດ້ຮັບໃບຢັ້ງຢືນ ເປັນບ້ານສາທາລະນະສຸກແບບຢ່າງ, ບ້ານປອດຄະດີ, ບ້ານແມ່ຍິງ 3 ດີ, ບ້ານວັດທະນະທຳ,  ບ້ານພັດທະນາ ແລະ ຍັງຈະເປັນບ້ານແບບຢ່າງທາງດ້ານການບໍລິການ. ຖ້ຳກອງລໍ ເປັນແຫຼ່ງທ່ອງທ່ຽວມະຫັດສະຈັນທີ່ມີຊື່ສຽງລະດັບ ຊາດທີ່ໄດ້ຮັບຄວາມນິຍົມຂອງນັກທ່ອງທ່ຽວໃນພາຍໃນ ແລະ ພາກພື້ນ ແລະ ຍັງເປັນຊັບສົມບັດອັນລ້ຳຄ່າຂອງ ປະຊາຊົນພາຍໃນບ້ານ ກໍ່ຄືຂອງຊາດລາວຕະຫຼອດໄປ.

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?