ໜ້າຫຼັກ >> ພັດທະນາຊົນນະບົດ >> 7 ບ້ານຂອງເມືອງເຊບັ້ງໄຟ ໄດ້ປະກາດເປັນບ້ານວັດທະນະທຳ
7 ບ້ານຂອງເມືອງເຊບັ້ງໄຟ ໄດ້ປະກາດເປັນບ້ານວັດທະນະທຳ
ວັນທີ 29 ພະຈິກ 2012 - ເວລາ 15:42:44 ເບິ່ງ 1968 ຄຳເຫັນ 2

 

ພິທີປະກາດຮັບຮອງເອົາບ້ານຖ້ຳລາຍ, ບ້ານກົກຕ້ອງ, ບ້ານສ້ອມ, ທ່າຫາດ, ທ່າຄໍ້, ແກ້ງແປ ແລະ ບ້ານສອກບໍ ເປັນບ້ານວັດທະນະທຳຂອງເມືອງເຊບັ້ງໄຟ ແຂວງຄຳມ່ວນ ແມ່ນໄດ້ຈັດຂຶ້ນຢ່າງເປັນທາງການໃນວັນທີ 28 ພະຈິກ 2012 ຢູ່ທີ່ສະໂມສອນບ້ານຖ້ຳລາຍ ເມືອງເຊບັ້ງໄຟ. ເປັນກຽດເຂົ້າຮ່ວມໃນພິທີຄັ້ງນີ້ມີທ່ານ ບຸນທວາຍ ສິລິປັນຍາທອງ ກຳມະ ການພັກແຂວງ, ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ປະຈຳແຂວງຄຳມ່ວນ, ທ່ານ ບຸນສີ ພົມມະໄຊ ເລຂາພັກເມືອງ, ເຈົ້າເມືອງ ໆເຊບັ້ງໄຟ, ມີບັນດາຫົວໜ້າຫ້ອງການຕ່າງໆອ້ອມຂ້າງເມືອງ ຕະຫຼອດເຖິງອຳນາດ ການປົກຄອງບ້ານ ແລະ ພໍ່ແມ່ປະຊາຊົນທັງ 7 ບ້ານເຂົ້າຮ່ວມ.

ໃນຈຳນວນ 7 ບ້ານທີ່ໄດ້ປະກາດເປັນບ້ານວັດທະນະທຳໃນຄັ້ງນີ້ລວມມີປະຊາກອນທັງໝົດ 3.327 ຄົນ, ຍິງ 1.698 ຄົນ, ປະກອບມີ 695 ຄອບຄົວ, ມີເນື້ອທີ່ທັງໝົດ 36.560 ເຮັກຕາ, ປະຊາຊົນມີມູນເຊື້ອດຸໝັ່ນຂະຫຍັນພຽນ, ມີຄວາມສາມັກຄີປອງດອງ. ອາຊີບຕົ້ນຕໍແມ່ນເຮັດນາ, ປູກຝັງ ແລະ ລ້ຽງສັດເປັນອາຊີບສຳຮອງ. ທັງ7 ບ້ານ ໄດ້ມີແຜນສ້າງເປັນບ້ານວັດທະນະທຳແຕ່ປີ 2010 ພາຍຫຼັງຄະນະກຳມະການທີ່ກ່ຽວຂ້ອງ ໄດ້ລົງເຄື່ອນໄຫວ ຊຸກຍູ້ໃນດ້ານ ວຽກງານຕ່າງໆ ສາມາດປະກາດເປັນບ້ານປອດຄະດີ, ບ້ານແມ່ຍິງ 3 ດີ, ບ້ານສາທາລະນະສຸກແບບຢ່າງ, ເດັກໃນເກນອາຍຸ ເຂົ້າຮຽນແມ່ນໄດ້ຮຽນໜັງສື 100%, ເປັນບ້ານໜ່ວຍພັກແຂງຮູ້ນຳພາຮອບດ້ານ ແລະ ໄດ້ຮັບໃບຢັ້ງຢືນຄອບຄົວ ວັດທະນະທຳແລ້ວ 443 ຄອບຄົວ ກວມເອົາ 80% ຂອງຈຳນວນຄອບຄົວທັງໝົດ, ສາມາດປະກາດເອົາທັງ 7 ບ້ານ ເປັນບ້ານ ວັດທະນະທຳ ບ້ານທີ 20-26 ຂອງເມືອງເຊບັ້ງໄຟ ແລະ ເປັນບ້ານທີ 176-182 ຂອງແຂວງຄຳມ່ວນ. ໃນພິທີຄັ້ງນີ້ທ່ານ ບຸນທວາຍ ສິລິປັນຍາທອງ ໄດ້ເປັນກຽດມອບໃບຢັ້ງຢືນບ້ານວັດທະນະທຳໃຫ້ແກ່ອຳນາດການປົກຄອງທັງ 7 ບ້ານ ແລະ ໃຫ້ກຽດໂອ້ລົມຕໍ່ຄະນະພັກ, ອຳນາດການປົກຄອງບ້ານໂດຍທ່ານ ບຸນສີ ພົມມະໄຊ ເຊິ່ງທ່ານໄດ້ຮຽກຮ້ອງ ໃຫ້ພໍ່ແມ່ປະຊາຊົນຈົ່ງໄດ້ພ້ອມກັນເອົາໃຈໃສ່ອະນຸລັກຮັກສາ ແລະ ເສີມຂະຫຍາຍມູນເຊື້ອວັດທະນະທຳ, ຮີດຄອງປະເພນີ ອັນດີງາມໃຫ້ ຄົງຢູ່ຄູ່ກັບທ້ອງຖິ່ນຕະຫຼອດໄປ, ພ້ອມກັນເອົາໃຈໃສ່ສືບຕໍ່ຮັກສານາມມະຍົດບ້ານວັດທະນະທຳ ເພື່ອກ້າວໄປ ສູ່ການປະກາດເປັນບ້ານພັດທະນາໃນຕໍ່ໜ້າ. ຈາກນັ້ນບັນດາການນຳທີ່ເຂົ້າຮ່ວມໄດ້ພ້ອມກັນເປີດປ້າຍ ແລະ ລັ່ນຄ້ອງ 9 ບາດປະກາດຮັບຮອງເອົາ 7 ບ້ານດັ່ງກ່າວເປັນບ້ານວັດທະນະທຳຢ່າງເປັນທາງການ.

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?