ໜ້າຫຼັກ >> ແນະນໍາແຫຼ່ງທ່ອງທ່ຽວພາຍໃນແຂວງຄໍາມ່ວນ >> ຖ້ຳນ້ຳລອດເຊບັ້ງໄຟແຫຼ່ງທ່ອງທ່ຽວທີ່ໜ້າປະທັບໃຈ ແລະ ຍັງຄົງລໍຄອຍທ່ານໄປສໍາຜັດ
ຖ້ຳນ້ຳລອດເຊບັ້ງໄຟແຫຼ່ງທ່ອງທ່ຽວທີ່ໜ້າປະທັບໃຈ ແລະ ຍັງຄົງລໍຄອຍທ່ານໄປສໍາຜັດ
ວັນທີ 13 ພຶດສະພາ 2015 - ເວລາ 15:44:37 ເບິ່ງ 1056 ຄຳເຫັນ 1

                                         

                                                       ໂດຍ : ແດງສະຫວັດ ແສນພານິດ .

     ແຂວງຄໍາມ່ວນແມ່ນແຂວງໜຶ່ງທີ່ຕັ້ງຢູ່ພາກກາງຂອງ ສ.ປ.ປ ລາວ ເປັນແຂວງທີ່ອຸດົມສົມບູນໄປດ້ວຍຊັບພະຍາກອນທໍາມະ ຊາດ , ຊີວະນາໆພັນ , ມີພູຜາປ່າໄມ້ , ມີແມ່ນ້ຳຫຼາຍສາຍ ແລະ ມີແຫຼ່ງທ່ອງທ່ຽວທີ່ໜ້າສົນໃຈຫຼາຍແຫ່ງທີ່ມີຄວາມສວຍສົດງົດ ງາມເພື່ອດຶງດູດນັກທ່ອງທັງພາຍໃນ ແລະ ຕ່າງປະເທດໃຫ້ເຂົ້າມາທ່ຽວແຂວງຄໍາມ່ວນ .

       ໜຶ່ງໃນບັນດາແຫຼ່ງທ່ອງທ່ຽວເຫຼົ່ານັ້ນທີ່ຂ້າພະເຈົ້າກ່າວເຖິງນັ້ນກໍ່ຄືຖ້ຳນ້ຳລອດເຊບັ້ງໄຟເຊິ່ງຖ້ຳດັ່ງກ່າວມີຕົ້ນກໍາເນີດມາຈາກ ຂອບເຂດສາຍພູຫຼວງລະຫວ່າງລາວ ແລະ ຫວຽດນາມ . ໃນຈິນຕະນາການປຽບສະເໝືອນວ່າ “ ແມ່ນ້ຳໄດ້ສູນຫາຍໄປ “ ໂດຍ ໄຫຼລອດຜ່ານອຸມົງທີ່ຍິ່ງໃຫຍ່ໃຕ້ພູເຂົາຫີນປູນຂອງພູຫີນໜາມໜໍ່ ແມ່ນ້ຳມັນໄດ້ໄຫຼໂພ່ອອກມາປະກົດໃຫ້ເຫັນອີກຢູ່ວັງນ້ຳທີ່ ກວ້າງໃຫຍ່ໄສສະອາດຢູ່ໃກ້ບ້ານໜອງປີງ.ຖ້ຳນ້ຳລອດເຊບັ້ງໄຟມີຂະໜາດການວັດແທກໂດຍສະເລ່ຍຄວາມຍາວ 11 ກິໂລແມັດ , ຄວາມ​ກວ້າງ 76 ​ແມັດ ​ແລະ ສູງ 56 ​ແມັດ , ​ໄດ້​ກໍ່​ເກີດ​ເປັນ​ຖ້ຳ​ໜຶ່ງ​ທີ່​ໃຫຍ່​ທີ່​ສຸດ​ໃນ​ໂລກ​ທີ່​ມີ​ແມ່​ນ້ຳ​ໄຫຼ​ຜ່ານ . ​ເຖິງ​ແມ່ນ​ວ່າ​ໄດ້ ມີ​ການ​ສໍາ​ຫຼວດສອງ​ຄັ້ງ​ໃນ​ສະຕະວັດ​ທີ XX ​ໂດຍ​ຊ່ຽວຊານ​ຈາກ​ປະ​ເທດ​ຝຣັ່ງຄື​ໃນ​ປີ 1905 ​ແລະ 1995 , ຖ້ຳ​ແຫ່ງ​ນີ້​ຍັງ​ຄົງ​ຢູ່​ກັບ​ຄວາມ​ພິ​ເສດ​ທີ່​ຫຼາຍ​ຄົນ​ບໍ່​ໄດ້​ຮັບ​ຮູ້ ຍົກ​ເວັ້ນຄົນ​ທ້ອງ​ຖິ່ນ​ຈົນ​ກວ່າ​ມີ​ການ​ສໍາ​ຫຼວດຂອງ​ທີ​ມງານ​ນັກ​ສໍາ​ຫຼວດພູມ​ສາດ​ແຫ່ງ​ຊາດ ​ໄດ້​ນໍາ​ໄປ​ສ້າງ​ຄວາມ​ສົນ​ໃຈ​ລະດັບ​ໂລກ​ຜ່າ​ນການ​ເດີນ​ສໍາ​ຫຼວດ​ໃນ​ປີ 2008 .

    ຖ້ຳ​ແຫ່ງ​ນີ້​ຈາກ​ປາກ​ຖ້ຳ​ແມ່ນ​ເຂົ້າ​ໄປ​ໄດ້​ດ້ວຍ​ເຮືອ​ປະມານ 2 ກິ​ໂລ​ແມັດ​ຈະ​ໄດ້​ພົບ​ເຫັນ​ແກ້ງ ຄວາມ​ຍິ່ງ​ໃຫຍ່​ຂອງ​ຖ້ຳ​ຫີນ​ປູນ​ຄື​ຄວາມ​ສະຫງ່າ​ງາມ​ຂອງ​ທໍາ​ມະ​ຊາດ​ທີ່​ຕົບ​ແຕ່ງ​ດ້ວຍ​ຫີນ​ຫງອກ , ຫີນ​ຍ້ອຍ ​ແລະ ຄວາມ​ເຫຼື່ອ​ໄສ​ແວວ​ວາວ​ໃນ​ຖ້ຳ​ໃຫ້​ເຫັນ​ຄວາມ​ງົດ​ງາມ​ໜ້າ​ມະຫັດສະຈັນ​ທີ່​ບໍ່​ຄ່ອຍ​ພົບ​ເຫັນ​ມາ​ກ່ອນ . ເມື່ອ​ປີນ​ຂຶ້ນ​ໄປ​ອີກ​ແງ່​ໜຶ່ງ​ຂອງ​ຖ້ຳ​ຈະ​ໄດ້​ເຫັນ​ຄ້າຍໆ​ຮັ່ງ​ໄຂ່​ມັງກອນ ຫ້ອງ​ ໂຖງ​ນີ້​ຈະ​ພາ​ໄປ​ສູ່​ເຂດ​ທີ່​ເປັນ​ຄ້າຍໆ​ລະບຽງ​ທີ່​ສູງ​ໄດ້​ແນມ​ເຫັນ​ພາບ​ແສງ​ສະຫວ່າງ​ສ່ອງ​ສະ​ຫຼົວ​ເຂົ້າ​ມາ​ຈາກ​ປາກ​ຖ້ຳ . ດ້ານ​ນອກ​ຂອງ​ຖ້ຳ​ມີ​ວັງ​ນ້ຳ​ເຫຼື່ອມຫຍິບ​ຫຍັບ ວັງ​ນ້ຳ​ນີ້​ຢູ່​ໃນ​ລັດສະໝີ 200 ​ແມັດ ​ເຊິ່ງຊາວບ້ານ​ໄດ້​ອະນຸລັກ​ເປັນ​ວັງສະ​ຫງວນ , ​ເປັນ​ບ່ອນ​ແຜ່ພັນ​ປາ .

    ຕາມ​ປົກກະຕິ​ແລ້ວ​ຊາວບ້ານ​ຄິດ​ວ່າ​ຈຸດ​ດັ່ງກ່າວ​ນີ້​ເປັນ​ຕົ້ນ​ກໍາ​ເນີ​ດຂອງ​ແມ່​ນ້ຳ​ເຊ​ບັ້ງ​ໄຟ ​ແລະ ຮັບ​ຮູ້​ກັນ​ໃນ​ຊື່​ທີ່​ເອີ້ນ​ກັນ​ວ່າ :   “ ຖ້ຳ​ຂຸນ​ເຊ “ ໝາຍ​ຄວາມ​ວ່າ​ຊາວບ້ານ​ເຂົ້າ​ໃຈ​ວ່າ :​ ຖ້ຳ​ແຫ່ງ​ນີ້​ຄື​ຕົ້ນ​ກໍາ​ເນີ​ດຂອງ​ແມ່​ນ້ຳ​ເຊ​ບັ້ງ​ໄຟ . ຕາມ​ຕໍານານ​ຄວາມ​ເຊື່ອ​ຂອງ​ຊາວບ້ານ​ຖື​ວ່າ​ຖ້ຳ​ແຫ່ງ​ນີ້​ເປັນ​ບ່ອນຢູ່​ອາ​ໄສ​ຂອງ​ດວງ​ວິນ​ຍານ​ຜີ​ຜູ້​ຄຸ້ມ​ຄອງ​ຊາວບ້ານ . ຄັ້ງ​ໜຶ່ງ​ໃນ​ອາ​ດີດ​ມີ​ແຄນ ( ​ເຄື່ອງ​ຫຼິ້ນ​ດົນຕີ ພື້ນ​ເມືອງ ) ຂອງ​ຊາວບ້ານ​ຫັກ​ເພ ​ແລະ ​ໄດ້​ເອົາ​ໄປ​ປະ​ວາງ​ໄວ້​ຢູ່​ປາກ​ຖ້ຳ​ໃນ​ຕອນ​ເຊົ້າ​ຂອງ​ມື້​ຕໍ່​ມາ​ພົບ​ວ່າ​ແຄນ​ດັ່ງກ່າວ​ໄດ້​ຮັບ​ການ​ສ້ອມ​ແປງ​ຄືນ​ສູ່​ສະພາບ​ເດີມ . ດວງ​ວິນ​ຍານ​ດັ່ງກ່າວ​ແມ່ນ​ໄດ້​ຮູ້ຈັກ​ໃຫ້​ຊາວບ້ານ​ຢືມ​ເຄື່ອງນຸ່ງ​ຂອງຖືທີ່ງາມໃນເວລາມີພິທີທາງ ປະເພນີຕ່າງໆພາຍໃນບ້ານ ຈົນກະທັງມາຮອດມື້ໜຶ່ງຜູ້ທີ່ຢືເຄື່ອງນຸ່ງໄດ້ສົ່ງເຄື່ອງຄືນໂດຍບໍ່ໄດ້ມີການຊັກໃຫ້ສະອາດ . ນອກນີ້ຍັງ ມີຄວາມເຊື່ອອີກຢ່າງໜຶ່ງວ່າດວງວິນຍານນີ້ໄດ້ມີຄວາມເມດຕາຄຸ້ມຄອງເຖິງແມ່ນວ່າຊາວບ້ານໄດ້ຕົກຈາກຜາຫີນ ໃນຂະນະທີ່ປີນ ຂຶ້ນເອົານົກແອ່ນ ແລະ ເຈຍຕາມຜາຫີນປາກຖ້ຳໂດຍບໍ່ເຄີຍມີຜູ້ໃດເສຍຊີວິດຍ້ອນເຫດການດັ່ງກ່າວ . ບໍ່ພຽງແຕ່ເທົ່ານັ້ນໃນໄລ ຍະສົງຄາມກໍ່ບໍ່ເຄີຍມີລູກລະເບີດຖິ້ມເຂົ້າໄປໃນຖ້ຳເລີຍ . ແນວໃດກໍ່ຕາມຊາວບ້ານແມ່ນບໍ່ໃຫ້ຄວາມສົນໃຈສູງກ່ຽວກັບການ ແນະນໍາເລື່ອງການຮັກສາຄວາມປອດໄພໂດຍການໃຫ້ມີໝວກກັນກະທົບ ສໍາລັບນັກທ່ອງທ່ຽວທຸກຄົນທີ່ມາເຂົ້າຖ້ຳ . ນອກຈາກ ນີ້ໃນແຕ່ລະປີຊາວບ້ານຍັງໄດ້ມີພິທີໄຫວ້ດວງວິນຍານຜີປາກຖ້ຳ ເພື່ອໃຫ້ສືບຕໍ່ຄຸ້ມຄອງປົກປັກຮັກສາຕໍ່ໄປ . ກະລຸນນາຢ່າທ້າ ທາຍກັບປະເພນີຄວາມເຊື່ອເຫຼົ່ານີ້ໂດຍການເຂົ້າຖ້ຳທີ່ບໍ່ມີຜູ້ນໍາທ່ຽວຂັ້ນບ້ານພາເຂົ້າ .

    ນອກຈາກສະຖານທີ່ທ່ອງທ່ຽວພາຍໃນຖ້ຳແລ້ວນອກຖ້ຳຍັງມີປ່າສະຫງວນແຫ່ງຊາດຫີນໜາມໜໍ່ເຊິ່ງມີເນື້ອທີ່ເຖິງ 82.000 ເຮັກຕາ ເປັນບ່ອນອາໄສທີ່ດີຂອງປະເພດພັນສັດປ່າທີ່ຫາຍາກ ລວມທັງໂຄ່ງ , ຂາແດງ ແລະ ສັດປ່າຊະນິດອື່ນໆທີ່ສໍາຄັນ ໂດຍສະເພາະນົກກົກອີກ 4 ສາຍພັນ . ປ່າສະຫງວນແຫ່ງຊາດຫີນໜາມໜໍ່ ປະຈຸບັນແມ່ນກໍາລັງສະເໜີເຂົ້າຢູ່ໃນບັນຊີລາຍຊື່ ສະຖານທີ່ມໍລະດົກໂລກ  .  ຖ້ຳນ້ຳລອດເຊບັ້ງໄຟແມ່ນນອນຢູ່ໃນສ່ວນໜຶ່ງຂອງເຂດອະນຸລັກ  .  ຊາວບ້ານຄຸ້ມຄອງສະຖານທີ່ນີ້

ໃນຮູບແບບການທ່ອງທ່ຽວພະຈົນໄພຊຸມຊົນມີສ່ວນຮ່ວມເພື່ອສ້າງຄວາມຍືນຍົງແກ່ການດໍາລົງຊີວິດຂອງຊຸມຊົນມີສ່ວນຮ່ວມ ເພື່ອສ້າງຄວາມຍືນຍົງ .

      ນອກຈາກນັກທ່ອງທ່ຽວຈະໄດ້ສໍາຜັດກັບຄວາມງາມຂອງຖ້ຳແລ້ວທ່ານຍັງຈະໄດ້ໃຊ້ບໍລິການຈາກລາຍການນໍາທ່ຽວປະເພດ ຕ່າງໆເຊັ່ນ : ລາຍການພາຍເຮືອແມ່ນສາມາດຈອດເຮືອຢູ່ປາກຖໍ້າ ແທນທີ່ຈະໃຊ້ເຮືອຈັກ ແຕ່ວ່າຊາວບ້ານຕ້ອງໃຊ້ເຮືອພາຍເພື່ອ ເປັນການອະນຸລັກສິ່ງແວດລ້ອມ ແລະ ປະຊາກອນເຈຍຢູ່ພາຍໃນຖ້ຳ . ກຸ່ມບໍລິການພາຍເຮືອຂອງບ້ານໄດ້ມີການຈັດລາຍການ ທ່ອງທ່ຽວໃຫ້ນັກທ່ອງທ່ຽວເລືອກໃຊ້ບໍລິການຄື : ລາຍການທ່ອງທ່ຽວສັ້ນ ທ່ານສາມາດພາຍເຮືອເຂົ້າໄປໃນຖ້ຳປະມານ 300 ແມັດແລ້ວປີນຂຶ້ນໄປເບິ່ງອີກແງ່ໜຶ່ງຂອງຖ້ຳ  ແລະ ເບິ່ງທິວຖັດຈາກເຂດທີ່ເອີ້ນກັນວ່າ : “ ເຂດລະບຽງ “ ຄ້າຍໆຮູບມັງກອນ . ການທ່ອງທ່ຽວນີ້ແມ່ນເໝາະສໍາລັບນັກທ່ອງທ່ຽວປະຈົນໄພຜູ້ທີ່ພ້ອມທີ່ຈະປະເຊີນກັບການຍ່າງຜ່ານຂີ້ຕົມ ແລະ ການປີນຂຶ້ນ ຂ້ອນຂ້າງສູງເຊິ່ງຈະໃຊ້ເວລາ 1 ຊົ່ວໂມງສໍາລັບຂີ່ເຮືອ ແລະ ການປີນຂຶ້ນເຂດລະບຽງຮູບມັງກອນໂດຍມີຄວາມຍາກປານກາງ .

    ສ່ວນລາຍການທ່ອງທ່ຽວຍາວນັ້ນທ່ານສາມາດຂີ່ເຮືອເຂົ້າໄປໃນຖ້ຳປະມານ 2 ກິໂລແມັດຮອດແກ້ງ ແລ້ວຂີ່ເຮືອກັບອອກມາ ແວະເບິ່ງເຂດລະບຽງຮູບມັງກອນທີ່ເປັນແງ່ໜຶ່ງຂອງຖ້ຳເພື່ອເບິ່ງໂຄ້ງສຸດທ້າຍຂອງແມ່ນ້ຳກ່ອນຈະອອກຈາກຖ້ຳ . ລາຍການທ່ອງ ທ່ຽວນີ້ແມ່ນເໝາະສໍາລັບນັກປະຈົນໄພເທົ່ານັ້ນ , ຜູ້ທີ່ຕ້ອງການສໍາຜັດກັບບັນຍາກາດທີ່ສຸດແສນປະຈົນໄພຢູ່ພາຍໃນຖ້ຳເຊິ່ງຈະ ໄດ້ຍິນສຽງກະແສນ້ຳຢູ່ແກ້ງໄຫຼຢ່າງແຮງໃນທ່າມກາງຂອງຄວາມມືດສະໜິດ ແລະ ຈາກນັ້ນຈະໄດ້ປີນຂຶ້ນໄປເທິງໂງ່ນຫີນໃຫຍ່ທີ່ ສູງຊັນກ່ອນທີ່ຈະກັບອອກມາຈາກຖ້ຳເພື່ອຄືນສູ່ຄວາມຮູ້ສຶກວ່າມັນເປັນເວລາກາງເວັນທັງໝົດແມ່ນໃຊ້ເວລາ 2 ຊົ່ວໂມງໂດຍ ໃຊ້ຄວາມຍາກປານກາງ . ນອກຈາກ​ການທ່ອງທ່ຽວ​ຢູ່​ຖ້ຳ​ນ້ຳ​ລອດ​ເຊ​ບັ້ງ​ໄຟ​ແລ້ວ​ກໍ່​ຍັງ​ມີ​ສະຖານ​ທີ່​ທ່ອງ​ທ່ຽວ​ອື່ນໆ​ທີ່​ນອນ​ຢູ່​ໃນ​ວົງ​ຈອນ​ການທ່ອງທ່ຽວ​ເຊັ່ນ : ຖ້ຳ​ບິ້ງ ​ແລະ ຖ້ຳ​ໂລງ . ສໍາລັບ​ຖ້ຳ​ບິ້ງ ​ຖ້ຳ​ນີ້​ກໍ່​ເປັນ​ແງ່​ໜຶ່ງ​ຂອງ​ຖ້ຳ​ນ້ຳ​ລອດ​ເບັ້ງ​ໄຟ​ເຊິ່ງມີ​ທາງ​ເຂົ້າ​ຢູ່​ເທິງ​ພູ​ຢູ່​ທາງ​ທິດ​ເໜືອ​ຂອງ​ວັງ​ນ້ຳ ປາກ​ຖ້ຳ . ທາງ​ເຂົ້າ ​ແລະ ຂະໜາດ​ຂອງ​ຖ້ຳ​ແມ່ນ​ນ້ອຍ​ກວ່າ​ຖ້ຳ​ນ້ຳ​ລອດ​ເຊ​ບັ້ງ​ໄຟ , ຜ່ານ​ເຂົ້າ​ຈະ​ປະ​ທັບ​ໃຈ​ກັບ​ຄວາມ​ງົດ​ງາມ​ຂອງ ຮູບ​ຫີນ​ງອກ , ຫີນ​ນ້ຳ​ຍ້ອຍ ​ແລະ ການ​ກໍ່​ຕົວ​ຂອງ​ຮູບ​ເສົາ​ຫີນ​ຕ່າງໆ​ຖ້ຳ​ແງ່​ນີ້​ມີ​ຄວາມ​ຍາວ​ປະມານ 700 ​ແມັດ ກ່ອນ​ທີ່​ຈະ​ລົງ​ສູ່ ຖ້ຳ​ໃຫຍ່​ໂດຍ​ຈະ​ຕ້ອງ​ໄດ້​ຜ່ານ​ຜາ​ຫີນ​ທີ່​ສູງ​ຊັນ​ຢູ່​ພາຍ​ໃນ​ຖ້ຳ​ອັນ​ກວ້າງ​ໃຫຍ່​ທີ່​ມີ​ແມ່​ນ້ຳ​ໄຫຼ​ຜ່ານ ສະ​ນັ້ນ​ຕ້ອງ​ໄດ້​ກັບ​ມາ​ອອກ​ທາງ​ເກົ່າ​ໂດຍ​ໃຊ້​ເວລາ 1 ຊົ່ວ​ໂມງ​ຍ່າງ​ຈາກ​ແຄມ​ວັງ​ນ້ຳປາກ​ຖ້ຳ​ປີນ​ພູຂຶ້ນ​ໄປ​ເຂົ້າ​ຖ້ຳ​ມີ​ຄວາມ​ຍາກ​ປານ​ກາງ . ສະ​ເພາະ​ຖ້ຳ​ໂລງ​ເປັນ​​ເຖີບ​ຫີນ​ຕັ້ງ​ຢູ່​ຫ່າງ​ຈາກ​ບ້ານ​ໜອງ​ປີງ​ພຽງ​ແຕ່ 300 ​ແມັດ ມັນ​ມີ​ຢູ່​ສອງ​ໂກນ . ກ່ອນ​ສະ​ໄໝ​ສົງຄາມ​ເຊິ່ງ​ເປັນ​ທີ່​ຮູ້ຈັກ​ກັນ​ວ່າ​ຢູ່​ໃນ​ຖ້ຳ​ນີ້​ໄດ້​ມີ​ໂລງ​ສົບ​ຂອງ​ຄົນ​ໃນ​ຍຸກ​ສະ​ໄໝ​ກ່ອນ​ທີ່​ເຮັດ​ດ້ວຍ​ໄມ້​ເນື້ອ​ແຂງ . ມາ​ເຖິງ​ໄລຍະ​ສົງຄາມໂກນດ້ານໜຶ່ງຂອງຖ້ຳໂລງໄດ້ເປັນບ່ອນທີ່ຊາວບ້ານເຂົ້າໄປອາໄສຢູ່ເພື່ອຫຼົບລີ້ລູກລະເບີດໂຈມຕີຈາກສົງຄາມ ( ເຖິງແມ່ນ ວ່າ ຈະມີຫຼາຍໆບ່ອນຫລົບລີ້ກໍ່ຕາມ ) ແລະ ທະຫານຫວຽດນາມເໜືອທີ່ເດີນທາງມາຕາມເສັ້ນທາງໂຮ່ຈີມິນກໍ່ພາກັນມາຫຼົບ ລີ້ຢູ່ອີກໂກນໜຶ່ງຂອງຖ້ຳເຊິ່ງສາມາດບັນຈຸຄົນໄດ້ນັບເປັນຫຼາຍພັນຄົນ ເຊິ່ງການຍ່າງຈາກບ້ານໜອງປີງໄປຫາຖ້ຳນີ້ແມ່ນໃຊ້ເວລາ 30 ນາທີຍ່າງງ່າຍ .

     ສໍາລັບຊ່ວງເວລາທີ່ເໝາະສົມໃນການເຂົ້າທ່ຽວຖ້ຳນ້ຳລອດເຊບັ້ງໄຟແມ່ນບໍ່ແນະນໍາໃຫ້ເຂົ້າລະຫວ່າງເດືອນມິຖຸນາ ຫາ ເດືອນ ຕຸລາເນື່ອງຈາກວ່າກະແສນ້ຳໄຫຼແຮງຈະເປັນອັນຕະລາຍ , ແຕ່ວ່າບ້ານຍັງເປີດບໍລິການສໍາລັບການບໍລິການອື່ນໆເຊັ່ນ : ເຮືອນພັກ ແຮມປະຊາຊົນ ແລະ ເຮືອນພັກລວມຂອງບ້ານ . ເສັ້ນທາງການເຂົ້າເຖິງແມ່ນມີຄວາມຫຍຸ້ງຍາກໃນລະດູຝົນ ແຕ່ວ່າສາມາດເຂົ້າ ເຖິງໄດ້ຕະຫຼອດປີດ້ວຍເຮືອຈາກບ້ານປາກພະນັງ . 

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?