ໜ້າຫຼັກ >> ວົງຈອນກິລາ >> ໂຮງຮຽນ ມໍຕົ້ນຈອມທອງ ຄວ້າແຊ໋ມການແຂ່ງຂັນກິລາບານເຕະເຍົາວະຊົນທົ່ວແຂວງຄຳມ່ວນ
ໂຮງຮຽນ ມໍຕົ້ນຈອມທອງ ຄວ້າແຊ໋ມການແຂ່ງຂັນກິລາບານເຕະເຍົາວະຊົນທົ່ວແຂວງຄຳມ່ວນ
ວັນທີ 30 ມີນາ 2015 - ເວລາ 15:14:37 ເບິ່ງ 731 ຄຳເຫັນ 0

ງານແຂ່ງຂັນກິລາບານເຕະເຍົາວະຊົນລູ້ນອາຍຸບໍ່ເກີນ 13 ປີ ແລະ 15 ປີ ທົ່ວແຂວງຄຳມ່ວນ ຊິງຂັນເລຂາຄະນະບໍລິ ຫານງານສູນກາງຊາວໜຸ່ມປະຊາຊົນ ປະຕິວັດລາວ ໄດ້ສຳເລັດລົງຢ່າງເປັນທາງການໃນວັນທີ 29 ມີນາ 2015 ນີ້ ທີ່ສະ ໜາມກິລາແຂວງຄຳມ່ວນ ໂດຍການເປັນກຽດເຂົ້າຮ່ວມຂອງ ທ່ານ ໂອໄດ ສຸດາພອນ ຮອງເຈົ້າແຂວງໆ ຄຳມ່ວນ, ທ່ານ ດຣ. ແກ້ວອຸດອນ ບຸດສິງຂອນ ເລຂາບໍລິຫານງານຊາວໜຸ່ມແຂວງ, ທ່ານ ສີໄຮ ແກ້ວໄກຖິ່ນ ຫົວໜ້າພະແນກສຶກສາທິການ ແລະ ກິລາແຂວງ, ມີພະແນກການ ບັນດາເມືອງ, ນັກທຸລະກິດ, ຜູ້ປະກອບການ, ຄູ່ຝຶກ ແລະ ນ້ອງນ້ອຍນັກກິລາຈາກ ໂຮງຮຽນປະຖົມ ແລະ ມັດທະຍົມຕອນຕົ້ນເຂົ້າຮ່ວມ.

          ທ່ານ ດຣ. ແກ້ວອຸດອນ ບຸດສິງຂອນ ໄດ້ລາຍງານຜົນການແຂ່ງຂັນກິລາບານເຕະເຍົາວະຊົນດັ່ງກ່າວ ເຊິ່ງມີນັກກິ ລາເຂົ້າຮ່ວມການແຂ່ງຂັນຈາກໂຮງຮຽນປະຖົມ ແລະ ມັດທະຍົມໃນ 9 ເມືອງ ແລະ ເທດສະບານແຂວງເຂົ້າຮ່ວມທັງໝົດ 21 ທີມ, ໃນນັ້ນລຸ້ນອາຍຸບໍ່ເກີນ 13 ປີມີ 10 ທີມ ແລະ ລຸ້ນອາຍຸບໍ່ເກີນ 15 ປີມີ 11 ທີມ, ຜ່ານການແຂ່ງຂັນເປັນເວລາ 15 ວັນນັບແຕ່ວັນທີ 14 ມີນາ - 29 ມີນາ 2015 ເປັນຕົ້ນມາ ຜົນການແຂ່ງຂັນລຸ້ນອາຍຸບໍ່ເກີນ 13 ປີ, ອັນດັບທີ I ແມ່ນທີມນັກກິລາຈາກໂຮງຮຽນມໍຕົ້ນຈອມທອງ ຮັບລາງວັນເງິນສົດຈຳນວນ 1,000,000 ກີບ ພ້ອມຂັນ 1 ໜ່ວຍ, ອັນດັບທີ II ທີມໂຮງຮຽນມໍຕົ້ນບ້ານຕານ,​ ໄດ້ຮັບລາງວັນ 800.000 ກີບ, ອັນດັບ III ທີມມໍຕົ້ນຈອມແຈ້ງໄດ້ຮັບລາງວັນ 600.000 ກີບ, ອັນດັບທີ IV ທີມນັກກິລາມໍຕົ້ນຍົມມະລາດໄດ້ຮັບລາງວັນ 400.000 ກີບ. ລຸ້ນອາຍຸບໍ່ເກີນ 15 ປີ ອັບດັບທີ I ທີມນັກກິລາມໍຕົ້ນເຊບັ້ງໄຟໄດ້ຮັບລາງວັນ 1.000.000 ກີບພ້ອມຂັນ 1 ໜ່ວຍ,​ ອັນດັບທີ II ທີມນັກກິລາມໍຕົ້ນມະຫາໄຊໄດ້ຮັບລາງວັນ 800.00 ກີບ, ອັນດັບ III ມໍຕົ້ນນາກາຍໄດ້ຮັບລາງວັນ 600.000 ກີບ ແລະ ອັນດັບ IV ມໍຕົ້ນຈອມແຈ້ງໄດ້ຮັບລາງວັນ 400.000 ກີບ, ເປັນກຽດມອບລາງວັນ ແລະ ຂັນຄອງແຊັມທັງສອງລຸ້ນ ໂດຍແມ່ນ ທ່ານ ສີໄຮ ແກ້ວໄກຖິ່ນ. ຈຸດປະສົງໃນການຈັດການແຂ່ງຂັນກິລາໃນຄັ້ງນີ້ກໍ່ເພື່ອເປັນການສ້າງຂະບວນການ ຂໍ່ານັບຮັບຕ້ອນວັນສ້າງຕັ້ງຊາວໜຸ່ມ ປປ ລາວ ຄົບຮອບ 60 ປີ ແລະ ວັນສຳຄັນຕ່າງໆ ຂອງຊາດ ທັງເປັນການ ສົ່ງເສີມໃຫ້ນ້ອງນັກຮຽນໄດ້ຫັນມາຫລີ້ນກິລາຫລາຍຂຶ້ນ.​ ການແຂ່ງຂັນກິລາບານເຕະໃນຄັ້ງນີ້ຍັງໄດ້ຄັດເລືອກເອົານັກກິລາ ດີເດັ່ນທັງສອງລຸ້ນຄື : ລຸ້ນອາຍຸບໍ່ເກີນ 13 ປີ ແມ່ນ ທ້າວ ສຸທາພອນ ຈາກທີມໂຮງຮຽນປະຖົມບ້ານຕານ, ລຸ້ນອາຍຸບໍ່ເກີນ 15 ປີ ແມ່ນທ້າວ ສາຍຝົນ ຈາກທີມມໍຕົ້ນເຊບັ້ງໄຟ ໄດ້ຮັບຂອງລາງວັນຄົນລະ 1.000.000 ກີບ, ເປັນກຽດມອບໂດຍ ແມ່ນ ທ່ານ ໂອໄດ ສຸດາພອນ .

ຂ່າວ : ມະນີວັນ

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?