ໜ້າຫຼັກ >> ຂ່າວໜ້າໜຶ່ງ >> ເມືອງ​ທ່າ​​ແຂກ​ຈັດ​ງານ​ປະ​ກວດ​ນາງ​ສັງຂານ​ ໃນ​ໂອກາດ​ບຸນປີ​ໃໝ່​ລາວ ພ.ສ 2556
ເມືອງ​ທ່າ​​ແຂກ​ຈັດ​ງານ​ປະ​ກວດ​ນາງ​ສັງຂານ​ ໃນ​ໂອກາດ​ບຸນປີ​ໃໝ່​ລາວ ພ.ສ 2556
ວັນທີ 23 ເມສາ 2013 - ເວລາ 10:07:12 ເບິ່ງ 298 ຄຳເຫັນ 1

 

 

 ເພື່ອ​ເຮັດ​ໃຫ້​ບຸນປີ​ໃໝ່​ລາວ ພ.ສ 2556 ມີ​ບັນຍາກາດ​ອັນ​ຄຶກຄື້ນ​ມ່ວນ​ຊື່ນ​ທັງ​ຮັກສາ​ໄດ້​ດ້ານ​ຂໍານົບ​ທໍນຽມ​ ປະ​ເພນີອັນ​ດີງາມ​ຂອງ​ຊາດ​ເວົ້າ​ລວມ , ​ເວົ້າ​ສະ​ເພາະ​ຂອງ​ທ້ອງ​ຖິ່ນ​ໃຫ້​ຄົງ​ຢູ່​ຕະຫຼອດ​ໄປ​ນັ້ນ​ເມືອງທ່າ​ແຂກ​ໃນ​ຖານະ​ທີ່​ເປັນ​ເມືອງ​ເທດສະບານ​ແຂວງ​ຄໍາ​ມ່ວນ​ໄດ້​ຈັດ​ງານ​ປະ​ກວດ​ນາງ​ສັງຂານ​ຂຶ້ນຢ່າງເປັນ​ທາງ​ການ​​ເຊິ່ງງານ​ປະ​ກວດ​ດັ່ງ ກ່າວ​ໄດ້​ເລີ້ມ​ຕົ້ນ​ຂຶ້ນ​ໃນ​ຕອນ​ຄໍ່າ​ຄືນ​ຂອງ​ວັນ​ທີ 11 ຈົນ​ເຖິງ​ຄໍ່າ​ຄືນ​ຂອງ​ວັນ​ທີ 12​ເມສາ 2013 ​ເຊິ່ງ​ເປັນມື້​ຄັດ​ເລືອກ​ໄດ້​ສາວ​ງາມ​ທັງ 7​ ເພື່ອ​ໄປ​ແຫ່​ຂະ​ບວນນາງ​ສັງຂານ​ໄປ​ຕາມ​ຖະໜົນວຽງ​ຈັນ​​ກ້ຽວ​ວຽນ​ມາໃສ່ຖະໜົນ​ກຸ​ວໍລະ​ວົງ​ເຊິ່ງ​ເປັນ​ຖະໜົນ​ສາຍ​ກາງ​ເມືອງ​ທ່າ​ແຂກ.ງານ​ປະ​ກວດ​ນາງ​ສັງຂານ​ໃນ​ຄັ້ງນີ້​ໂດຍ​ການ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ພົມ ມາ ພັນທະ​ລັງສີ ​ເຈົ້າ​ເມືອງໆ​ ທ່າ​ແຂກ ໃນນາມຄະນະປະ ທານຈັດງານປະກວດນາງສັງຂານປະຈໍາປີ 2013,ມີບັນດາ​ຜູ້ຕ່າງ​ໜ້າ​ຈາກ​ພະ​ແນ​ກການ​ອ້ອມ​ຂ້າ​ງ​ແຂວງ , ຄະນະ​ກໍາມະການ​ຕັດສິນ,​ແຂກ​ທີ່​ຖືກ​ເຊີນ , ພາກສ່ວນ​ຫ້າງ​ຮ້ານທີ່​ໃຫ້ການ​ອຸປະຖໍາ​ຕະຫຼອດ​ເຖິງພາກສ່ວນ ກ່ຽວຂ້ອງ ແລະ ​ປະຊາຊົນ​ທົ່ວ​ໄປ​ເຂົ້າ​ຮັບ​ຊົມ .

   ສໍາລັບ​ນາງ​ສາວ​ທີ່​ເຂົ້າ​ຮ່ວມ​ການ​ປະ​ກວດ​ແມ່ນ​ມາ​ຈາກ​ສະ​ຖາ​ບັນ​ການ​ສຶກສາ , ​ໂຮງຮຽນ​ມັດທະຍົມ​ຕອນ​ປາຍແຫ່ງ​ຕ່າງໆພາຍ​ໃນ​ເທດສະບານ​ເມືອງ​ທ່າ​ແຂກ​ໂດຍ​ໄດ້​ຮັບ​ການ​ອຸປະຖໍາ​ຈາກ​ບັນດາບໍລິສັດ​ຫ້າງ​ຮ້ານ, ພະ​ແນ​ກການ​ເພື່ອ​ເປັນ​ຕົວ​ແທນ​ໃຫ້​ແກ່​ພາກສ່ວນ​ດັ່ງກ່າວ​ພ້ອມ​ກັນ​ນັ້ນ​ຍັງ​ເປັນ​ການ​ເປີດ​ໂອກາດ​ໃຫ້ ​ແກ່​ແມ່ຍິງ​ລາວລຸ້ນ​ໃໝ່​ທີ່​ມີ​ອາຍຸ​ນັບ​ແຕ່ 16 – 20 ປີໄດ້​ສະ​ແດງ​ຄວາມ​ສາມາດ ​ແລະ ຄວາມ​ກ້າຫານຂອງ​ຕົນ​ເອງ​ອອກ​ສູ່ສາຍຕາ​ຂອງມະຫາຊົນ .

  ການ​ປະ​ກວດ​ນາງ​ສັງຂານ​ຢູ່​ເມືອງ​ທ່າ​ແຂກ ​ແຂວງ​ຄໍາ​ມ່ວນແມ່ນ​ໄດ້​ຈັດ​ໃຫ້​ມີ​ຂຶ້ນ​ເປັນ​ປະ​ຈໍາທຸກໆ​ປີ .  ສໍາລັບ​ປີ​ນີ້​ແມ່ນໄດ້ດໍາເນີນມາ​ເປັນ​ປີທີ 6 ແລ້ວເຊິ່ງໃນຄັ້ງນີ້ມີນາງສາວ ສະມັກເຂົ້າປະກວດຈໍານວນທັງ ໝົດ 23 ຄົນ ໃນນີ້ແມ່ນຈະໄດ້ຄັດເລືອກເອົາ 7 ນາງສາວເພື່ອເປັນຕົວແທນໃຫ້ແກ່ຜູ້ເຂົ້າຮ່ວມປະກວດ ທັງໝົດໃນກິດຈະກໍາແຫ່ນາງ ສັງ ຂານ ໃນຕອນເຊົ້າຂອງວັນທີ 14 ເມສາ 2013 . ສໍາລັບນາງສາວທີ່ຜ່ານ ເຂົ້າສູ່ຮອບຕັດເຊືອກອັນດັບທີໜຶ່ງຈະໄດ້ຮັບລາງວັນເງິນສົດ 5 ລ້ານກີບພ້ອມມຸງກຸດ ແລະ ສາຍສະ ພາຍ, ອັນດັບທີສອງໄດ້ຮັບລາງວັນ 4 ລ້ານກີບ , ອັນດັບທີສາມ 3 ລ້ານກີບ , ອັນດັບທີສີ່ມີ 4 ລາງວັນລາງ ວັນລະ 2 ລ້ານ , ລາງວັນຂັວນໃຈຊ່າງພາບສື່ມວນຊົນ 1 ລ້ານກີບ ແລະ ລາງວັນຊົມເຊີຍລາງວັນລະ 1 ລ້ານກີບ . ພິເສດສໍາລັບປີນີ້ແມ່ນຕ່າງຈາກປີທີ່ຜ່ານມາເນື່ອງຈາກວ່າດ້ານສະຖານທີ່ຈັດງານປະກວດແມ່ນ ຢູ່ໃນຮົ່ມແລະ ກ້ວາງຂວາງ ພ້ອມດ້ວຍສິ່ງເອື້ອອໍານວຍຈໍານວນໜຶ່ງທີ່ສາມາດຮອງຮັບໃຫ້ແກ່ງານດັ່ງກ່າວ .

​ ນອກຈາກ​ນີ້​ທ່ານ​ເຈົ້າ​ເມືອງ​ທ່າ​ແຂກຍັງ​ມອບ​ໃບ​ກຽດ​ຕິ​ຄຸນ ​ແລະ ​ໃບ​ຍ້ອງຍໍ​ໃຫ້​ແກ່​ພາກສ່ວນ​ຕ່າງໆ​ທີ່​ໄດ້​ອຸ ປະຖໍາປະກອບສ່ວນ​ເຂົ້າ​ໃນ​ການ​ບູລະນະ​ປະຕິສັງຂອນ​ພຣະ ທາດ​ສີ​ໂຄດ​ຕະບອງ​ ​ແລະ ງານປະ​ກວດ​ນາງ​ສັງຂານ​ປະ​ຈໍາປີ 2013 .

                                                                                                                                                              ຂ່າວ - ພາບໂດຍ : ແດງສະຫວັດ ແສນພານິດ .

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?