ໜ້າຫຼັກ >> ຂ່າວຈາກຕ່າງເມືອງ >> ປະກາດຮັບຮອງເອົາ 4 ບ້ານ​ຂອງ​ເມືອງ​ຫີນ​ບູນ​ ເປັນ​ບ້ານ​ວັດທະນະທຳ
ປະກາດຮັບຮອງເອົາ 4 ບ້ານ​ຂອງ​ເມືອງ​ຫີນ​ບູນ​ ເປັນ​ບ້ານ​ວັດທະນະທຳ
ວັນທີ 03 ເມສາ 2013 - ເວລາ 16:19:29 ເບິ່ງ 1700 ຄຳເຫັນ 2

 

 

           ພິທີປະກາດ​ຮັບຮອງ​ເອົາ​ບ້ານ​ໄຊ​ສົມບູນ, ໜອງ​ປີງ, ໜອງ​ບົວ​ນ້ອຍ ​ແລະ ບ້ານ​ໂຮມ​ພັນ ກຸ່ມ​ນາ​ໂພ ​ເມືອງ​ຫີນ​ບູນ ເປັນ​ບ້ານ​ວັດທະນະທຳ ​ແມ່ນ​ໄດ້​ຈັດ​ຂື້ນຢ່າງ​ເປັນ​ທາງ​ການ​ໃນ​ຕອນ​ບ່າຍ​ຂອງ​ວັນ​ທີ 27 ມີນາ 2013 ຢູ່​ທີ່​ໂຮງຮຽນ​ມັດທະຍົມ​ມໍຕົ້ນບ້ານ​ໄຊ​ສົມບູນ​ໂດຍ​ການ​ເຂົ້າ​ຮ່ວມ​ຂອງທ່ານ ບຸນ​ທຳ ທຳ​ມະ​ວົງ ຮອງ​ຫົວໜ້າ​ພະ​ແນ​ກຖະ​ແຫຼ​ງຂ່າວ , ວັດທະນະທຳ ​ແລະ ທ່ອງ​ທ່ຽວ​ແຂວງ , ທ່ານ ວາດ​ສະໜາ ​ເລື່ອງ​ຈັນທະ​ລາດ ຫົວໜ້າຄະນະ​ຈັດຕັ້ງ​ເມືອງຫີນ​ບູນ, ມີ​ບັນດາ​ຫ້ອງການອ້ອມ​ຂ້າງ , ອຳນາດ​ການ​ປົກຄອງຕະຫຼອດ​ເຖິງພໍ່​ແມ່​ປະຊາຊົນ ແລະ ນ້ອງ​ນັກຮຽນພາຍ​ໃນ 4 ບ້ານ​ເຂົ້າຮ່ວມ.

        ບ້ານ​ໄຊ​ສົມບູນ, ໜອງ​ປີງ, ໜອງ​ບົວ​ນ້ອຍ ​ແລະ ບ້ານ​ໂຮມ​ພັນ ປະກອບ​ມີ 239 ຫຼັງຄາ​ເຮືອນ, ມີ 258 ຄອບຄົວ, ມີ​ປະຊາກອນ​ທັງ​ໝົດ 1.422 ຄົນ, ຍິງ 698 ຄົນ. ການ​ດຳລົງ​ຊິວິດ​ແມ່ນ​ຕິດ​ພັນ​ກັບ​ທຳ​ມະ​ຊາດ, ມີ​ມູນ​ເຊື້ອດຸ​ໝັ້ນຂະຫຍັນ​ພຽນ​ທຳການ​ຜະລິດ​​ເພີ້ມ​ພູນ​ຜະລິດຜົນປູກ​ພືດ-ລ້ຽງສັດ, ມ​ີວັດທະນະທຳ​ຮີດຄອງ​ປະ​ເພນີ​ອັນ​ດີງາມ​ຂອງ​ບັນດາ​ເຜົ່າ, ມີ​ຄວາມ​ສາ​ມັກຄີ​ຊ່ວຍ​ເຫຼືອ​ເຊິ່ງກັນ ແລະ ກັນ . ທັງ 4 ບ້ານມີ​ແຜນ​ສ້າງ​ເປັນ​ບ້ານ​ວັດທະນະທຳ​ມາແຕ່​ປີ 2012 ຄະນະ​ກຳມະການ​ທີ່​ກ່ຽວຂ້ອງ ​ໄດ້​ລົງ​ເຄື່ອນ​ໄຫວ​ເອົາ​ໃຈ​ໃສ່​ຊຸກ​ຍູ້​ວຽກງານ​ຕ່າງໆ ໂດຍ​ສະ​​ເພາະ​ແມ່ນ​ການ​ສ້າງ​ຄອບຄົວ ​ແລະ ບ້ານວັດທະນະທຳ​ ​ແລະ ​ໄດ້​ມອບ​ໃບຢັ້ງຢືນ​ຄອບຄົວ​ວັດທະນະທຳ​ແລ້ວ ຈຳນວນ 248 ຄອບຄົວ ​ເທົ່າ​ກັບ 96,12% ຂອງ​ຈຳນວນ​ຄອບຄົວ​ທັງ​ໝົດ. ມາ​ຮອດ​ປະຈຸ​ບັນ​ແມ່ນ​ສາມາດ​ປະກາດ​ຮັບຮອງ​ເອົາ​ທັງ 4 ບ້ານ​ເປັນ​ບ້ານ​ວັດທະນະທຳ ບ້ານ​ທີ່ 43-46 ຂອງ​ເມືອງ​ຫີນ​ບູນ ແລະ ​ເປັນ​ບ້ານ​ທີ່    247-249        ຂອ​ງ​ແຂວງ​ຄຳ​ມ່ວນ . ໃນ​ພິທີ ຄັ້ງນີ້ ທ່ານ ບຸນ​ທຳ ທຳ​ມະ​ວົງ ​ໄດ້​ເປັນ​ກຽດ​ມອບ​ໃບຢັ້ງຢືນ ບ້ານ​ວັດທະນະທຳ​ໃຫ້​ແກ່​ອຳນາດ​ການ​ປົກຄອງ​ທັງ 4 ບ້ານ ແລະ ​ໃນ​ໂອກາດ​ດຽວ​ກັນທ່ານ ວາດ​ສະໜາ ​ເລື່ອງ​ຈັນທະ​ລາດ ກໍ່​ໄດ້​ກ່າວ​ໂອ້​ລົມເຊິ່ງ ທ່ານ ໄດ້​ເໜັ້ນ​ໃຫ້ການຈັດຕັ້ງທຸກ​ພາກສ່ວນ​ພາຍ​ໃນ​ບ້ານ ພ້ອມ​ກັນ​ຈັດຕັ້ງປະຕິບັດ​ວຽກ​ງານ​ຕ່າງໆທີ່​ໄດ້​ຮັບ​ມອບ​ໝາຍ,ສືບຕໍ່​ເສີມຂະຫຍາຍ​ ​ແລະ ຮັກສານາມມະຍົດ ບ້ານວັດທະ ນະທຳ ​ໃຫ້​ກາຍ​ເປັນ​ບ້ານ​ວັດທະນະທຳ​ທີ່​ອຸດົມສົມບູນ ​ເພື່ອ​ກ້າວ​ໄປ​ສູ່​ການ​ປະກາດ​ເປັນ​ບ້ານ​ພັດ ທະນາ​ໃນຕໍ່ໜ້າ .  ຈາກ​ນັ້ນບັນດາ​ການ​ນຳ​ທີ່​ເຂົ້າ​ຮ່ວມ​ໄດ້​ພ້ອມ​ກັນ​​ເປີດ​ປ້າຍ ​ແລະ ລັ່ນຄ້ອງ​ປະກາດ​ຮັບຮອງ​ເອົາ​ທັງ 4 ບ້ານ ເປັນ​ບ້ານ​ວັດທະນະທຳ​ຢ່າງ​ເປັນ​ທາງ​ການ ແລ້ວ​ເຂົ້າ​ຮ່ວມ​ພິທີ​ບາສີສູ່ຂວັນ​ຕາມ​ຮີດຄອງ​ປະ​ເພນີ​ອັນ​ດີງາມ​ .

                                                                                                                                                                  ຂ່າວ - ພາບໂດຍ : ແດງສະຫວັດ ແສນພານິດ .

                                                                                                                        

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?