ໜ້າຫຼັກ >> ເວທີນັກຂຽນ >> ເຈົ້າເລືອກໄດ້
ເຈົ້າເລືອກໄດ້
ວັນທີ 25 ທັນວາ 2013 - ເວລາ 09:25:12 ເບິ່ງ 1322 ຄຳເຫັນ 0

ຫຼາຍ​ຄົນ​ວາງ​ວ່າ​ໄວ້                   ວັນ​ປີ​ໃໝ່​ມີ​ຫຼາຍ​ແຜນ

ຈະ​ເກາະ​ແຂນ​ຄວງ​ສາວ              ທ່ຽວ​ຊຶ້ຊົມ​ສິນຄ້າ

​ໄປ​ເປີດ​ຕາ​ເໜືອ​ໃຕ້                   ​ເບີກບານ​ໃຈ​ໃຫ້​ສົດ​ຊື່ນ

ຄ່ຳ​ຄືນ​ຝັນ​ຄິດ​ຄົ້ນ                     ລະ​ເມີ​ໄດ້​ໄປ​ບ່ອນ​ໝາຍ 

 

ອີກ​ບໍ່​ດົນ​ຍິ່ງ​ຫຍັບ​ໃກ້                 ວາລະ​ໃໝ່​ວັນ​ດີ

ສິລິ​ມຸງຄຸນ​ປະ​ປົນ                     ​ແຕ່​ບູຮານ​ພາ​ເວົ້າ

​ໂຊກ​​ໄຊ​ໄຫຼ​ໂຮມ​ເຂົ້າ                 ຄວາມ​ຫງ່ວມ​ເຫງົາ​ຫາຍ​ຫ່າງ

ຈະ​ເປີດ​ທາງ​ຮັບ​ໂຊກ​ແກ້ວ           ຫຼື​ກີດ​ກັ້ນ​ໃຫ້​ໄຕ່ຕອງ ​​ເອົາ​​ເນີ

 

ການ​ສະຫຼອງ​ຮ່ວມ​ຫຼິ້ນ               ວັນ​ປີ​ໃໝ່​ສາກົນ

ຈະ​ປະ​ປົນ​ຫຼາຍ​ສີສັນ                 ຕື່ມ​ເຕັມ​ໃຫ້​ໃສ​ແຍ້ມ

ບາງກຸ່ມ​ແຄມ​ທາງ​ແທ້                ນັ່ງ​ນັບ​ດາວ​ຈົນ​ເດິກ​ດື່ນ

ນັບ​ຖອຍຫຼັງ​ຢ່າງ​ຊື່ນ​ຊ້ອຍ            ​ປະສານ​ຮ້ອງ​ຮ່ວມ​ກັນ

 

ອັນ​ໜຶ່ງ​ເວົ້າ​ເລື່ອງ​ເຫຼົ້າ                 ກືນ​ກິນ​ກ່ອມ​ມືນ​ເມົາ

​ເອົາ​ມາ​ຊຸມ​ມີ​ແຊວສຽງ               ມ່ວນ​ໂຮ​ເຮວ​ຮ້ອງ

ມີ​ສຽງ​ເພງ​ປະສານ​ກ້ອງ              ​ເກີດ​ເນືອງນອງ​ຮອດ​ມື້​ໃໝ່

ທາງ​ຮ່າງກາຍ​ຊ້ຳ​ອ່ອນ​ລ້າ             ​ເງິ​ນຊອກ​ຫາ​ມ້ຽນ​ມັດ​ໄວ້

                                      ​ເລີຍ​ໄກ​ຂ້າງ​ຫ່າງ​ຖົງ

 

ຫຼາຍ​ຄົນ​ລົງ​ນົບ​ໄຫວ້                  ​ຟັງ​ເທດ​ສາສະໜາ

ຮ່ວມ​ກັນ​ມາ​ທຳບຸນ                  ຮັບ​ພອນ​ຊົມ​ຊ້ອຍ

​ໃຈ​ເຫງົາ​ຫງອຍ​​ໄດ້​ຄືນ​ຕັ້ງ             ຫວນ​ມາ​ເຂັ້ມ​ແຂງ​ໃໝ່

​ໄດ້​ທຳບຸ​ນຮ່ວມ​ຊາດ                  ​ໄດ້​ຕັກບາດ​ຮ່ວມ​ໃກ້

                                      ຄອບຄົວ​ໄດ້​ຊື່ນ​ຊົມ  ນັ້ນ​ນາ

 

ບາງ​ຄົນ​ລົມ​ວ່າ​ໄວ້                    ຈະ​ຢຸດ​ຢູ່​ໃນ​ເຮືອນ

ກັບ​ຄອບຄົວ​ແສນ​ແພ​ງ               ຮ່ວມ​ມິ່ງ​ເມຍ​ທັງ​ລູກ

ຜັກ​ທີ່​ປູກ​ກໍ່​ຂຽວ​ກຸ້ມ                 ​ເກັບ​ນຳ​ມາ​ປຸ່ງ​ແຕ່ງ

​ເປັນ​ອາຫານ​ເຊົ້າ​ທ່ຽງ​ແລງ            ຮ່ວມ​ກັບ​ນາງ​ໜຶ່ງ​ນັ້ນ

                                      ລວມລູກນ້ອຍ​ກໍ່​ຊື່ນ​ໃຈ

 

ບາງ​ກຸ່ມ​ກໍ​ຄິດ​ໄດ້                     ຈະ​ໄປ​ທ່ຽວ​ຊົມ​ວິວ

ກິນ​ອາຫານ​ຫວານ​ຄາວ               ​ໃຫ້​ອິ່ມ​ເຕັມ​ຫຼາຍ​ມື້

ນັບ​ນິ້ວມື​ຫຼາຍ​ຮອບ                  ​ໂອ! ຈະ​ກັບ​ຄືນ​ຢາມ​ພໍ່​ແມ່

ລວມທັງ​ຍາດພີ່​ນ້ອງ                  ດົນ​ແລ້​ວທີ່​ຫ່າງ​ໄກ

 

ບາງ​ຜ່ອງ​​ໄວ​ຊອກ​ຊົ້ນ                 ກໍ​ຄົ້ນ​ຄິດ​ຫາ​ແຜນ

​ເຈີດ​ເຊີ່ນ​ແອ່ນ​ເສັງ​ລົມ                ຕາມ​ຖະໜົນ​ລຽນ​ລ້າຍ

ຂັບ​ລົດ​ໄປ​ຂະໜານ​ໜ້າ               ​ເຕັມ​ທົນ​ທາງ​ໃຫ້​ຄົນ​ດ່າ

ຫາກ​ບໍ່​ເຊື່ອ​ລອງ​ເບິ່ງ​ໜາ              ປີ​ໃໝ່​ໃກ້​ຮອດ​ນີ້

                                      ​ໃຫ້​ພີ່ນ້ອງ​ໄຕ່​ຕາມ   ​ເບິ່ງ​ເນີ

 

ຮຽມ​ຂໍ​ຢຸດ​ວ່າ​ໄວ້                     ​ໃຫ້​ຜູ້​ອ່ານ​ຫວນ​ເຫັນ

ຂໍ​ເປັນ​ໜຶ່ງ​ກະບອກ​ສຽງ              ຕິ​ເຕືອນ​ໃຫ້​ຫວນ​ຕັ້ງ

ສິ່ງ​ໃດ​ຫວັງ​ໝາຍ​ມຸ້ງ                  ຈະ​ສົດ​ໃສ​ໃຫ້​ແກ່​ທ່ານ

​ເຈົ້າ​ເທົ່າ​ນັ້ນ​ເລືອກ​ໄດ້                 ປີ​ໃໝ່​ໃນ​ໝໍ່ນີ້

                                      ​ໃຫ້​ເຈົ້າ​ຄົ້ນ​ຄິດ​ຄືນ  ​ເອົ​າ​ເນີ. 

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?