ໜ້າຫຼັກ >> ກະວີຊາວບ້ານ >> ຕົ້ນຈຳປາພັນຍອດ ແຕກຫງ່າອ້ອມກອດພະທາດເກົ່າ 400 ປີ
ຕົ້ນຈຳປາພັນຍອດ ແຕກຫງ່າອ້ອມກອດພະທາດເກົ່າ 400 ປີ
ວັນທີ 11 ຕຸລາ 2013 - ເວລາ 14:07:06 ເບິ່ງ 1218 ຄຳເຫັນ 0

ບົດ: ຂ ແສງປະທຸມ

v    ພູມສັນຖານແຫ່ງຫ້ອງ              ບ້ານດ້າງຕໍ່ມະຫາໄຊ

ຕັ້ງຢູ່ແຄມລຳເຊ                         ຊື່ບັ້ງໄຟເນົາຢັ້ງ

ອາດີດເມືອງກອງແກ້ວ                    ຍາວນານປະຫວັດສາດ

ທຳມະຊາດອາບເອ້                      ພູຜາອ້ອມເຂດທົ່ງນາ

v    ດິນແດນງາມດັ່ງວ່ານີ້               ຕົ້ນກຳເນີດໝໍຜະຫຍາ

ຊື່ວ່າລຳມະຫາໄຊ                       ບ້ານຊ່າງແຄນກໍ່ມີພ້ອມ

ປີ່ ຂຸ່ຍ ຊໍ ປະສານເຂົ້າ                   ສຽງດົນຕີ ເອກະລາດ

ແດນຄຳມ່ວນອົງອາດກ້າ             ໄຊຊະນະຍາດໄດ້

ກິນເຫຼົ້າໄຫ ໄກ່ຕົ້ມ ລຳຟ້ອນຊື່ນສະຫລອງ

v    ຍາມນັ້ນລືກແລ່ນຕ້ອງ              ສິງຫາຕໍ່ເດືອນກັນຍາ ( 9 )

ປີ 2012                             ຜູ້ຂຽນຍັງຈຳໄດ້

ທ້ອງຟ້າໃສໄຂແຈ້ງ                      ອາລຸນແສງແດດອ່ອນ

ເຮືອນຳທ່ຽວແລ່ນຂຶ້ນ                     ຕາມສາຍໂຄ້ງລົດເຊ

v    ເລີ້ມຂີ່ເຮືອແຕ່ທ່າບ້ານ              ແກ້ງສະຫວ່າງມະຫາໄຊ

ເທດສະບານມູມເມືອງ                    ບ່ອນທ່າເຮືອຄອຍຕ້ອນ

ຮອດແລ້ວເຮືອຫາງນ້ອຍ                  ລອຍລຳອອກຈາກທ່າ

ເຕັ້ນຕາມຟອງຜ່າຄື້ນ                     ທວນນ້ຳເປັ່ງກະແສ

v    ເວີນສະແນນຫາດແກ້ງ              ມີຊື່ວ່າສອງຄອນ

ແສນສະອອນຍາມຊົມ                    ຝັ່ງເຊທັງສອງເບື້ອງ

ຫາຍຄຳເຄືອງໂສກາເສົ້າ             ສຸກສົມຫວັງເຂົ້າແທນທີ່

ເຫັນທົ່ງນາປ່າເຂົ້າ                       ຜາຊັນຊ້ອງສະຫວາດຕາ

v    ສວນຜະລາໝາກໄມ້               ກ້ວຍ ອ້ອຍ ມ່ວງພວງພັນ

ຄອຍແຄມເຊເຫັນຖຽງນາ                  ຢາກແວ່ເຊົາພໍຫາຍຮ້ອນ

ເຮືອສັນຈອນຫລຽວ​ເຫັນ​ບ້ານ                     ນາກຽວຢູ່ແຄມທ່າ

ຫາດສະເພີນໝູ່ບ້ານ                     ຂວາຊ້າຍລຽບຝັ່ງເຊ

v    ໃກ້ຈະຮອດບ້ານດ້າງ               ບ່ອນຕຽມຕ້ອນນັດໝາຍ

ບ້ານຢູ່ຢາຍແຄມເຊ                      ເກົ່າເດີມດ້ານມູນເຊື້ອ

ວິລະກຳແຂງກ້າ                        ປາງສະໄໝກູ້ຊາດ

ເປັນພື້ນຖານທີ່ໝັ້ນ                      ຂະໜັນແໜ້ນແກ່ນແຂງ

v    ບ້ານດ້າງທີ່ມີທີ່ຕັ້ງ                 ທາງພູມສາດສວຍງາມ

ມີຖ້ຳພູຄູຫາ                            ຄູ່ຄຽງກັບສາຍນ້ຳ

ຕາມປະຫວັດໄຂແຈ້ງ                     ແຍງຫລັກຖານບູຮານກ່າວ

ມີສິມເກົ່າອົງພະທາດນ້ອຍ                 ຈຳປາເຫງົ້າຫງ່າງາມ

v    ວັດຕັ້ງແຄມຝັ່ງນ້ຳ                 ຊື່ຕາມທາດຖານເຈດີ

400 ປີ ອາຍຸ                          ຄຽງຄູ່ຈຳປາຕົ້ນ

ປະຊາຊົນນິຍົມເອີ້ນ                      ວ່າ: ຈຳປາພັນຍອດ

ແຕກເຫງົ້າຫງ່າກວມທາດນ້ອຍ              ຢືນໝັ້ນບໍ່ຫວັ່ນໄຫວ

v    ນີ້ຄືດວງດອກໄມ້                  ບຸບຜາຊາດຕະກຸນລາວ

ສົ່ງກິ່ນຫອມກວມໄກ                     ທົ່ວເຜົ່າພົງພັນເຊື້ອ

ຕະກຸນລາວບໍ່ລືມຕົ້ນ                     ດອກຈຳປາປະຈຳຊາດ

ຮອດວັນງານປະຫວັດສາດ                 ປະເພນີຮີດຄອງເຄົ້າ

ຄອງບໍ່ເສົ້າໝົ່ນໝອງ

v    ດຽວນີ້ຊາວພີ່ນ້ອງ                 ບ້ານດ້າງໃຫຍ່ ມະຫາໄຊ

ກຳລັງປຸນປົວແປງ                       ພັດທະນາຫລາຍດ້ານ

ບ້ານວັດວາ ອາລາມກວ້າງ                 ເຮືອນຊານສະຖານທີ່

ເຮັດນາແຊງ ນາປີ                       ມີເຂົ້າຫລາຍຢູ່ເລົ້າ

                                    ເຫລືອກິນແລ້ວສົ່ງຂາຍ ທ່ານເອີຍ !

 

 

ສະແດງຄຳຄິດເຫັນຂອງທ່ານ
ຊື່ ແລະ ນາມສະກຸນ
ອີເມວ
ຄຳເຫັນ
Captcha
ທ່ານຕ້ອງການລຶບແທ້ບໍ່​ ?