ປະຫວັດຄວາມເປັນມາຂອງເວັບໄຊຂ່າວທ້ອງຖິ່ນ (ແຂວງຄຳມ່ວນ)

     ນັບແຕ່ປີ 2003 ຂະແໜງຖະແຫຼງຂ່າວທີ່ຂຶ້ນກັບພະແນກຖະແຫຼງຂ່າວ ແລະ ວັດທະນະທຳແຂວງໃນເມື່ອກ່ອນເຊິ່ງມາຮອດປີ 2012 ພະແນກຖະແຫຼງຂ່າວ ແລະ ວັດທະນະທຳແຂວງ ແມ່ນໄດ້ຍ້າຍຈາກພະແນກຫຼັງເກົ່າ ມາເຂົ້າກັບພະແນກທ່ອງທ່ຽວແຂວງ ເຊິ່ງໄດ້ເອີ້ນຊື່ໃໝ່ວ່າ : ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຈົນເຖິງປະຈຸບັນ.

     ສຳລັບປີ 2003 - 2007 ຂະແໜງຖະແຫຼງຂ່າວແມ່ນເປັນຊື່ໜຶ່ງທີ່ມີພາລະບົດບາດ ໃນການເຄື່ອນໄຫວຂ່າວຄືກັບຊື່ວິທະຍຸ ແລະ ໂທລະພາບຂອງແຂວງ ໃນການເຜີຍແຜ່ແນວທາງ ນະໂຍບາຍຂອງພັກ, ລະບຽບກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມລົງສູ້ຮາກຖານການຜະລິດ, ເຂດຫ່າງໄກສອກຫຼີກໄດ້ຮັບຮູ້ແລະເຂົ້າໃຈ. ໂດຍສະເພາະທາງຂະ ແໜງດັ່ງກ່າວ ໄດ້ທຳການຈັດພິມໜັງສືພິມທ້ອງຖິ່ນຂຶ້ນ ເພື່ອເຜີຍແຜ່ແນວທາງນະໂຍບາຍຂອງພັກ ເຊິ່ງໄດ້ຈັດພິມເປັນຂະໜາດ A4 ໜ້າຫຼັກຂອງໜັງສືພິມ ແມ່ນພິມສອດສີ ສ່ວນໜ້າໃນເປັນຂາວ-ດຳ ລວມທັງໝົດມີ 12 ໜ້າ, ແບ່ງອອກເປັນ 2 ພາກຄື: ພາກຂ່າວ ແລະ ພາກໂຄສະນາ . ການອອກແບບຈັດໜ້າແມ່ນອອກແບບຢູ່ພາຍໃນແຂວງ ແລະ ທໍາການຈັດພິມເປັນລາຍເດືອນຢູ່ໂຮງພິມພາຍໃນແຂວງເຊິ່ງໃສ່ຊື່ໜັງສືພິມວ່າ: ”ຄຳມ່ວນ” ພາຍໃຕ້ການຊີ້ນຳຂອງຄະນະພະແນກຖະແຫຼງຂ່າວ ແລະ ວັດທະນະທຳແຂວງໃນຂະນະນັ້ນ. ດ້ານການຈັດພິມແມ່ນນຳໃຊ້ງົບປະມານຂອງແຂວງສະໜອງໃຫ້ ເຊິ່ງປະກອບມີພະນັກງານວິຊາການພຽງແຕ່ 5 ຄົນເທົ່ານັ້ນ. ສຳລັບຕົວເລກສະຖິຕິການພິມຈຳໜ່າຍໃນເວລານັ້ນແມ່ນ 500 ສະບັບຕໍ່ເດືອນ.ແຕ່ເນື່ອງຈາກເຕັກນິກ ແລະ ຄຸນນະພາບຂອງການຈັດພິມຍັງບໍ່ທັນໄດ້ມາດຕະຖານບວກກັບເຕັກນິກ ແລະ ບຸກຄະລາກອນຍັງມີຈຳນວນຈຳກັດ ເຮັດໃຫ້ມີຄວາມຫຍຸ້ງຍາກໃນການຈັດຕັ້ງປະຕິບັດ ຈຳເປັນຕ້ອງໄດ້ຢຸດໃນການຈັດພິມໜັງສືພິມ.

     ໃນປີ 2008 ຫົວໜ້າຂະແໜງຖະແຫຼງຂ່າວ ແລະ ວິຊາການທີ່ກ່ຽວຂ້ອງ ຈຶ່ງໄດ້ປຶກສາຫາລືກັນແລ້ວສະເໜີໃຫ້ຄະນະພະແນກ ຄົ້ນຄ້ວາພິຈາລະນາ ຫຼັງຈາກນັ້ນ ໄດ້ຕົກລົງໃຫ້ສຳນັກຂ່າວສານປະເທດລາວ ຫຼື ( Lao news Agency ) ປະສານສົມທົບກັບລັດວິສາຫະກິດ ລາວໂທລະຄົມ ຫຼື ( LTC ) ຕິດຕັ້ງລະບົບອິນເຕີເນັດເພື່ອເຮັດໜ້າທີ່ໃນການສົ່ງຂໍ້ມູນຂ່າວສານ, ຮູບພາບສະໜອງໃຫ້ສຳນັກຂ່າວສານປະເທດລາວ ແລະ ແຫຼ່ງຂ່າວຕ່າງໆຢູ່ຂັ້ນສູນກາງ.

     ຮອດປີ 2012 ພາຍຫຼັງທີ່ພະແນກຖະຫຼງຂ່າວ ແລະ ວັດທະນະທຳແຂວງ ແລະ ພະແນກທ່ອງທ່ຽວແຂວງໄດ້ໂຮມເຂົ້າກັນແລ້ວກໍ່ໄດ້ເກີດມີກອງວິຊາການໃໝ່ໜຶ່ງຂຶ້ນມາເອີ້ນວ່າ: ກອງວິຊາການໜັງສືພິມ,ວາລະສານແລະຂ່າວສານໂດຍແຍກຕົວອອກມາຈາກຂະແໜງຖະແຫຼງຂ່າວໃນເມື່ອກ່ອນ ເຊິ່ງໄລຍະນີ້ເອງ ເປັນໄລຍະທີ່ມີການປ່ຽນແປງໂສມໜ້າໃໝ່ຂອງວົງການສື່ມວນຊົນທ້ອງຖິ່ນ ນັ້ນກໍ່ຄືວິຊາການທີ່ມີສ່ວນກ່ຽວຂ້ອງ ໄດ້ມີການຄົ້ນຄ້ວາປຶກສາຫາລືກັນເພື່ອສະເໜີການນໍາຂອງພະແນກ ເພື່ອສ້າງເວັບໄຊທ້ອງຖິ່ນ ໂດຍນຳໃຊ້ງົບປະມານຂອງແຂວງຮ່ວງສົ່ງເສີມວິຊາການ ຫຼັງຈາກນັ້ນເປັນຕົ້ນມາ ເວັບໄຊຂ່າວທ້ອງຖິ່ນຂອງແຂວງ ກໍ່ໄດ້ອອກເຜີຍແຜ່ສູ່ສາຍຕາຂອງບັນດານັກທ່ອງເວັບ ທັງຫຼາຍພາຍໃນແຂວງຄຳມ່ວນ ເວົ້າສະເພາະ, ເວົ້າລວມ ກໍ່ຄືທົ່ວໂລກ ເຊິ່ງມັນເປັນຄັ້ງປະຫັວດສາດໃນວົງການສື່ມວນຊົນຂອງແຂວງ ທີ່ນຳເອົາຂ່າວ, ຮູບພາບນິ້ງ, ພາບເຄື່ອນໄຫວ ແລະ ສຽງລົງໃນເວັບໄຊ ເຊື່ອແນວ່າດ້ວຍຄວາມພະຍາຍາມຂອງພະນັກງານວິຊາການໝົດທຸກຄົນ ບວກກັບການສະໜັບສະໜູນ ແລະ ໃຫ້ທິດຊິ້ນຳຂອງຄະນະນຳແຕ່ລະຂັ້ນ ຈະເຮັດໃຫ້ສື່ມວນຊົນຂອງແຂວງກ້າວໄປຢ່າງບໍ່ຢຸດຢັ້ງ.

ທ່ານຕ້ອງການລຶບແທ້ບໍ່​ ?